KEEP OUR GAS 2

محاكمة من أهدروا الغاز

نحن صامدون...

وإن رفض الرافضون وتراجع المتراجعون

فى مثل هذه الايام منذ 41 سقطت مصر و الامة العريبية سقطة كبرى وقد قيل أنها نكسة أو... أو ... ولكن النكسة الحقيقية التى أُصيبنا بها هى الفكر الإنهزامى ، ذلك الفكر الذى أدى بنا إلى أننا بدلاً من أن نصلح بلادنا إستسهلنا اليأس والهزيمة وأصبحنا ندارى على ذلك بأنه :” يا عم كبر دماغك " ،“ يا عم مفيش فايدة " “ ياعم دول (الناس الوحشين أياً كانوا) يقدروا يعملوا... ويعملوا... ويعملوا... ، دول عملوا ..وعملوا .. وعملوا ..” ،" يا عم شوف أكل عيشك"،وفى النهاية أََل أمرنا إلى ما أََل إليه الآن وكلنا عارفين ، القصة مش محتاجة كلام.

بس يا أخواننا الكلام ده مينفعش لأن السياسة الإنهزامية اللى إحنا فيها ولا أقصد أفعال الحكومة الموقرة بل أقصد سياسة كل واحد فينا تجاه حقه ونفسه؛ هى اللى جابتنا ورا بمعنى إن الغلاء اللى إحنا فيه ده مش من صنع وظلم الحكومة لوحدها لاء ده فى شريك له الجزء الاكبر...، والشريك يبقى إحنا بصمتنا على الظلم وإتباع سياسة خانعة .......، كام واحد إستجاب للدعوة الشعبية لمنع بيع الغاز بتراب الفلوس ..؟؟ كام...؟؟ لا وايه القصة تمس كل واحد منّا بطريقة مباشرة وموجعة لأن الحكومة لسه رافعة سعر المحروقات "بدعوى إن مافيش فلوس وهتجيب منين علشان تدينا العلاوة...؟؟؟مع إنها لو إتصرفت صح كانت زودت الدعم والناس حياتها بقيت أسهل (عن طريق الفائض اللى هيجى لما نبيع الغاز بسعره العالمى مش ب 1\10 من سعره) ولكن كل واحد فينا لما الدنيا غليت عليه ومصاريف المدارس زادت والاسعار إتضاعفت وحياته زادت سواد على سواد ؛ ماحدش فكر إنه يهز طوله ويضغط على الحكومة علشان ما تضيعش فلوسه ، بل على العكس كل واحدحاول إنه يشقى ويتعب زيادة علشان يفضل يادوبك عايش

يا أخواننا حرام علينا اللى بنعمله فى نفسينا ماينفعش يبقى إبنى على كتفى وأروح أدوّر عليه

إحنا لازم نضغط على الحكومة علشان تتصرف صح فى فلوسنا مش على مزاجها والموضوع قانونى ومافيهوش حاجة وحشة لاسمح الله ..يعنى ماتخافش وبطل الكلام بتاع جنب الحيط وجوة الحيط ده ...الحيط هتقع يا حلو و مش هتلاقى حاجة تبنيها لأن اأسعار وصلت للسما

موعدنا

يوم الأثنين 9 يونيو 2008 فى نقابة الصحفيين

وذلك لعقد المحاكمة الشعبية لمن أهدروا ثروة مصر وأفقروا شعبها

KEEP OUR GAS

الغاز لتانى مرة

التقرير الذى أذاعته الاستاذة منى الشاذلى "فى لحظة خاطفة "عن محاكمة الغاز غير صحيح ومنافى لما علمه ورأه مراسلين العاشرة مساء حيث أنهم قد علموا أن النقيب قد أمر بمنع عقد المحاكمة وذلك بدعوى أنه لا يعلم شىء عن ذلك كما أنهم علموا أيضاً بالمشاكل الأخرى....!!!!!!

أنا كنت هأقول كلام ناشف وشديد بس مالوش لازمة لأن أحداث 6 أبريل كانت كاشفة للرقابة الامنية والاستاذة منى الليلة دى وهى بتتكلم عن الموضوع (فى 3 ثوانى) كانت مرتبكة و"كان باين عليها شويتين"

والسؤال لتانى مرة للسيد النقيب "رجل القضاء الواقف" : هل سيادتك توافق ان يُقتل المصريين كل يوم وتسيل دماءهم بسبب طوابير العيش والحكومة بتحجج أنها ماعندهاش فلوس ولا توافق على عقد محاكمة شعبية لمن باعوا مستقبل مصر وذلك بسبب خطأ إدارى فى النقابة التى ترأسها سيادتك

Happy Easter

كل شم نسيم وأنت طيبين

حيث إن النهاردة يوم شم النسيم وهو يوم مفترج إن شاء الله، أنا كنت قاعد فى بيتنا كدة لا بيا ولا عليا وبقرأ جورنال الدستور ( ما أنا أصلى قاطعت الجرائد اللى بتخنقنى وبتتكلم عن بلد تانية غير مصر) المهم كدة الاقى خبر فى الصفحة الاخيرة أن فى حوداث خطف فى محافظة الدقهلية وأن الناس بقيت خايفة موووووووت لأن الحوادث إتكررت ، لاء وايه كمان ده القصة وصلت لحد إن أبن عضو مجلس الشعب كان هيتخطف من مدينة المنصورة....؟؟!!!!( الف مبروك للحكومة على إنجازاتها فى حفظ الامن)

المهم ن الولد كان بيحكى عن الواقعة و إن الراجل اللى كان هيخطفه نزل من عربية سودا وكان أصلع وزى البودى جارد و.... و.. و...؛ بس اللى خطر على بالى فعلا هل الحكومة هتقبض على اللى بيعمل كدة فعلاً ولّا هتطلع وتقول واحد مختل عقلياً بيسوق عربية سودا وبيخطف العيال...؟؟؟؟ ولّا لقصة دى هتكون زى قصة برىء بنى مزر ؟؟؟؟؟؟؟؟؟؟؟

أغلب الظن إ ن الحكومة هتكدب الولد الصغير وممكن تدعى ان الاولاد المخطوفين دول بيلعبوا فى كاس السوبر مع موزمبيق أو ممكن إن الحكومة تقول إنهم معتقلين على خلفية أحداث 6 أبريل بتهمة المشاركة فى أضراب قانونى والإضرار بمصالح الدولة و الإقتصاد القومى..؟؟؟؟

كل سنة وأنتى طيبة يا حكومة ( ربنا عالم باللى فى ضميرى ) وكل شم نسيم والناس طيبين

Strike...... 1 nothing for the people

الإضراب وسنينه

طبعاً الناس كلها قاعدة تقول الإضراب نجح والحكومة الموقرة وجرايدها ( اللى بتقول الحقيقة دايماَ.... بس عن بلد تانية غير مصر ) بتقول إن الإضراب فشل ( قال يعنى هم اللى ناجحين قوى)، ماعلينا خلينا فى المهم اللى ماحدش نفسه يعترف بيه( وده بالنسبة للحكومة طبعاً)،وهو إن الإضراب نجح... نجح... نجح... وناجح ساحق كمان، إذ يكفى أنه فى بلد زى مصر ( ممسوكة بقبضة من حديد) أن الحكومة نفسها تعترف بالإضراب قبل ما يحصل وتعمل له قيمة لدرجة إن وزارة الداخلية ( اللى الوزير بتاعها مش بيروح مجلس الشعب ) عملت قيمة للإضراب والوزير بذات نفسه عمل إجتماع علشان الإضراب( شوف أنت بقى الأمَلَة وقَدَّر مدى أهمية ونجاح الإضراب)، بس طبعاً بما إن الحكومة ستنا وتاج راسنا و إحنا كلنا ... و.... فكلام الحكومة طبعاً صح واللى عمل الإضراب ده واحد من جماعة الاخوان المحظورة أسمه جورج أسحق ( مش أنا اللى بقول ده ستى حكومة اللى بتقول)........؟؟؟؟؟؟؟؟؟؟!!!!!!!!!!

خلينا فى المهم ونتكلم فى الإضراب :

1- الحكومة ضيقت على الناس كل حاجة ومش سايبة لهم مخرج ده حتى العيش غلّوه ( ده إحنا بنسمى السعى على الرزق ؛ أكل عيش) وده طبعاً غير الامراض والادوية والدروس الخصوصيةوالكهربا و النظافة ، فالحكومة بمنتهى الذكاء (إلهى ربنا يزيدها من نعيمه) عملت فى نفسها كدة والأسوء أنها بتستسهل وتقوم فى كل مصيبة تعالجها معالجة أمنية فقط لا غير، طب والنبى يا أخواننا يا بتوع الوطنى ياللى أنتو خدتوا44الف من أصل 49 الف مقعد بالتزكية فى الإتخبات المحلية أنتوا فين وفين تواجدكم فى الشارع المصرى ...؟؟؟!!!.

2- وبعدين نيجى للناس اللى فجأة أتجمعوا بالالوف (زى ما الحكومة بتقول ) ؛ فجأة أيه بس يا أخواننا إحنا هنضحك على بعض ، ده الاضراب بقاله قد كده الناس بتتكلم عليه والحكومة مطنشة (أيوة الحكومة طنشت لأن الكلام كان على عينيك يا تاجر) وبعدين أساساً ده الناس بعد كل ماتش أهلى وزمالك ولّا منتخب مصر؛ كانت بتتجمع فجأة برضه وتقفل الدنيا ... يعنى بالمختصر القصة مش جديدة لاء دى قديمة موووووت

3- طب نجى لحكاية القطر و رمى الطوب :

أ‌- ممكن يكون الناس العادية هم اللى رموا الطوب وحطموا المنشأت زى ما الحكومة ما بتقول ( بس هى دى برضه الحكومة بتاعة قضية بنى مزار اللى لسه ماظهرش مين الفاعل لحد دلوقت والحكومة قدمت واحد برىء للمحاكمة)ولو هم الناس العادية اللى عملوا كدة فده يبقى من التحرش الحكومى المعتاد على العنف بدون داعى (وطبعاً إصابات الناس مش محتاجة توكيد)

ب‌- طب لو مش الناس العادية وكانت القصة فعلاًَ إن الحكومة سَرّحِت البلطجية يعملوا كدة ..!!؟؟ وماله برضه مايضرش ما هو أصل انتخابات مجلس الشعب اللى فاتت تشهد وتقول على الحكومة والبلطجية .

ج- أغلب الظن إن القصة خليط من ده وده بسبب عادات الحكومة الكريمة وبعدين فى الفيديوهات التى أُذيعت ،فيها لقطة لقوات الحكومة هى بتتراجع قدام رشق الحجارة وحتى كان فى عربية مصفحة فى اللقطة.، وبالمناسبة فالاخوة فى قناة بى بى سى العربية ناس مية مية وأما عن الناس التانية فربنا يقويهم وربنا يسامحهم على التغطية "أم موافقات أمنية" التى طلعت متاخرة 24 ساعة لحدث فى بلدهم

4- طب نيجى بقى للحرائق والتدمير والذى منه فده ممكن فعلاً يكون من البلطجية بتوع الحكومة أو ممكن ( وهو الاحتمال الاسوء) أنه يكون من ناس عادية وده إحتمال أسوء لأن معناه إن ثورة العامة أبتدت والثورة دى لما هتحصل (وهى حتحصل إن شاء الله بسبب الفشل السياسى المريع بالإضافة أن الأسلوب الذى يتم التعامل به مع المشاكل من هذا النوع بيكون تعامل أمنى فقط وده هو اللى بأذن واحد أحد هيخرب البلد (وهو ده اللى كان من نتيجته صنع أسوء أرهابيى العالم)، أما عن سبب تأخر التدخل السياسى وحدوثه بتعليمات مباشرة من رئيبس البلاد فده من عادة الحكومة( ماهى دى الحكومة اللى سابت الف مصرى يغرقوا 16 ساعة وانشغلت بكاس الأمم الفريقية )

وفى النهاية أحب أن أتنبأ ( يعنى هى جت عليا أنا) إنه سواء نجحت المعالجة الأمنية أو فشلت فى معاجلة هذا الإضراب فالموضوع مش فارق كتير ودة بسبب أن الحكومة( والحكومة المقصودة فى هذا المقال هى حكومة الوطنى بصفة عامة وليس حكومة د.أحمد نظيف تحديدا ً) حملت الامن فوق ما يحتمل من أجل معاجلة الأمور السياسية أمنياً وجعلته يترك الأمور الأمنية الأصلية ( وده حقيقى للأسف) حتى أصبح أمن مصر يساوى تفيذ التعليمات (الخاصة بمعالجة الامور السياسية معالجة امنية) فقط لا غير.

Stop the holocaust done by Israel

الهلوكوست للجميع

تسمع عن الهولوكوست( المحرقة النازية لليهود فى الحرب العالمية الثانية) ..؟؟؟، هل تؤمن به..؟؟؟، هل تعلم أن الهولوكوست غير مسموح بمناقشته صحته من عدمه أوحتى أعداده فى بعض دول أوربا ( والكلام بنص القانون)..؟؟.

طب أيه رأيك فى اللى بيحصل فى فلسطين ..؟؟ مش ده هولكوست برضه طب أيه رأيك أن المسؤلين الإسرائيليين نفسهم بيقولوا عليه هولوكوست...؟؟؟؟

مسؤول إسرائيلي يتوعد غزة بـ"هولوكوست" وغزو شامل

طب ماهو انت لو بنى آدم مسلم وزعلان قوى علشان الرسوم المسيئة للرسول (صلعم) طب ماهو الرسول نفسه قال فى خطبة الوداع على جبل عرفات :"ولدمُ إمرىءٍ مسلم أعظمُ عند اللهِ من حرمةِ يوكم هذا فى بلدك هذا"، أمال أنت ساكت ليه...؟؟؟؟؟؟

طب لو انت مش مسلم فدول برضه أخوانك الفلسطينيين بيحرقوا أحياء أمام عينيك،.....أنت ساكت ليه..؟؟؟

طب لو أنت مش عربى و كمن أنت مقتنع بأن العر ب كلهم وحشين وكلهم إرهابيين ليه ساكت على الهولوكوست الإسرائيلى أنت مش دافعت عن اليهود بسبب الهولوكوست النازى ،طب ايه اللى مسكتك عن الهولوكوست الإسرائيلى..؟؟أنت مش بنى آدم متحضر وبتزعل على الكلاب لما الناس بتعاملهم وحش وبتزعل من إن المصريين بيدبحوا الخرفان بطريقة بشعة، طب أيه اللى مسكتك على دبح الفلسطينيين..؟؟

ده عنوان الإيميل بتاع البيت الابيض وده عنوان ن الإيميل بتاع ناب الرئيس الامريكى على الاقل إبعت رسالة تطالب بوقف الهلوكوست الإسرائيليى

و أدى اصل الصفحة علشان تصدقنى

وأدى الصفحة هنا( ومترجمة كمان)

وللأمانة الفكرة دىمش فكرتى ، ده أنا سمعت الاستاذ أحمد المسلمانى فى برنامج الطبعة الاولى بيقول على الفكرة دى.

أوقف الهولوكوست

أنت تقدر على هذا