Thursday, August 22, 2013

الان تظهر حقيقة اعتصامات الاخوان


1- هل قادة الاخوان اغبياء؟الاجابة لاء طبعاً
2-طب ليه اصروا على انهم مش هيفضوا الاعتصام غير لما يرجع مرسى؟؟مع انهم عارفين مرسى مش راجع؟؟ليه كانوا دايما بيحطوا العقدة فى المنشار؟؟!!!
دقق معايا فى الحالة الاقتصادية،خد بالك ان ازمة البنزين حقيقية واننا اتنغنغنا "مؤقتا" بسبب احتياطى الجيش،دلوقت بقى بص على حالة البلد فى ظل وجود الاعتصامين.....الواقع هو كساد كامل،توقف لحركة الاقتصاد،الكل خايف الاخوان هيعملوا ايه النهاردة ،هيروحو يخرّبوا فين.!!!
3-المفاوضات دايما  كانت فاشلة لأن الهدف الحقيقى للاخوان هو شل حركة البلد  لحد ما الاقتصاد ينهار،وعلشان كدة كانوا دايما بيردوا ردود غير معقولة و متعالية
4-اظن ان الاقتصاد كان قرب يصل لنقطة حرجة ، وده اللى خلى الدولة تصل لقناعة انه لازم الاعتصام ده يتفض لان  غير كدة البلد كانت هتقع
5- فى كلام عن ان البرادعى كان رافض فض الاعتصام علشان الدم واللذى منه، ممكن يكون معاه حق،بس الاخوان حطوا البلد فى NO WIN SITUATION
، مهما الدولة عملت كانت هتحصل خسائر
6- حد هيقول الضحايا،طب يعنى قعدنا نبوس ايديهم شهر بحاله انهم يبعدوا  علشان الاخوان ما يستعملوهومش كدروع بشرية(للعلم تقريباً 10% من الاعتصام بس كانوا اخوان)،هم اللى رفضوا واصروا.طب انت انسان برىء لكنك واقف بتحمى شخص  بيقضى على البلد،اتحايلنا عليك وبوسنا ايدك وانت رافض...طب نموت كلنا علشان خاطر انت رافض تفهم؟؟!!!
7-للعلم شاهدت "بعينى" ما فعله الاخوان فى شارع الطيران جنب مصطفى النحاس،عندى شهادات كتير على حرق الاخوان للسيارات،ده طبعاً غير تبادلهم لاطلاق النار على الشرطة،"غير الشقق اللى خبوا فيها السلاح فى رابعة"....تانى علشان اللى رافض يفهم ...الشقق اللى خبوا فيها السلاح فى رابعة(مصدر الخبر هو اهالى رابعة مش الشرطة).


فى النهاية اقول لكم ان الاعتصامين لم يكونا إلا لاضعاف الحالة الاقتصادية للدخول فى سيناريو الفوضى الشاملة واى تأخير فى فضهما كان هيؤدى الى تدهور اخر فى الحالة الاقتصادية

Saturday, July 06, 2013

كيف استشهد الشيخ عماد عفت


كيف استشهد الشيخ عماد عفت


طبعا كلكم شفت الفيديو بتاعة مذبحة سيدى جابر،،لينك الفيديو
https://www.youtube.com/watch?v=XiXOZFV7RNk&feature=youtube_gdata_player 
تعالوا لما ندقق فى الفيديو شوية،شوفوا البنى ادم ده،
صورة 1

ايده الشمال جوه كويس او شنطة.
الصورة 2


دلوقت الشنطة او الكيس ده فى الوضع الافقى،ومازلك ماسقتطش لتحت،بالعربى فيه حاجة صلبة ماسكة نفسها
تعالى نبص على صورة 3


دقق كدة هتلاقى ان ايده الشمال ماسكة حاجة صلبة ليها ماسورة او انبوبة،بالعربى كدة ده مسدس.ايديه اليمين فيها مطواة على فكرة
غالباً واحد من دول كان فى محمد محمود،كان واقف جنب الشيخ عماد عفت وضربه من قريب والمسدس ماكانش باين لأنه جوة الشنط.

Tuesday, March 01, 2011

What to do with the police forces refusing to work

قصة خلى الجيش ينفعكوا



بسمع كتير عن ناس تحصلها مشاكل ويروحوا على القسم يقدموا بلاغ، يترد عليهم بكلام من عينة :”خلى الجيش ينفعكم،قدموه على الفيس بووك، إحنا عندنا اوامر نتواجد شكلياً فقط"، بصوا بقى الكلام ده كلام فارغ، اللى مش عاجبه الشغل كضابط شرطة يبقى يستقيل.قصة إنهم يإما يذلونا ونبقى عايشين فى امان أو يإما نعيش بكرامة بس من غير امن دى ماتنفعش.الحل هو:
1- أى حد تحصله مشكلة يطلع على القسم يعمل محضر
2-أتأكد أن ماحدش ضحك عليك وقيده محضر إدارى، اصل دى حركة سخيفة بيعملوها علشان ياخدوك على قفاك
3-لو حد تهاون فى اداء واجبه بأى طريقة من الطرق يبقى تطلع على مديرية الامن اللى انت تتبع ليها(يعنى فى القاهرة تبقى مديرية الامن فى القاهرة وفى الجيزة تبقى مديرية امن الجيرة وهكذا) وتروح إدارة التفتيش وتقدم بلاغ فى القسم والضباط اللى تهاونوا فى اداء مهام وظيفتهم وخد صورة من بلاغك وخليهم يمضوا :”استلمت الاصل"...علشان مايعملش ناصح ويقول ماخدتش حاجة
4- تتابع البلاغ بتاعك ولو بعد تلات ايام لقيت إدارة التفتيش ماعملتش حاجة ، هتقدم بلاغ تانى وتمضيهم على الصورة
5-كمان تلات ايام شرحه
6-كمان تلات ايام شرحه
7- لو لقيتهم ماعملوش حاجة بعد كمان تلات ايام ، يبقى تطلع على النائب العام وتقدم بلاغ فى إدارة التفتيش بتاعة الداخلية تتهمها بالتقصير فى اداء مهام وظيفتها وتلحق ببلاغك الصور اللى انت ممضيهم إنهم استلموا اصولها
8-تنشر قصتك لكل اصحابك وتبلغهم إنك قدمت بلاغ للنائب العام
9-لو النائب ماعملش حاجة ...سيب لنا إحنا الطلعة دى يا معلم وإحنا هنكمل....وكله بالقانون

WE SHOULD PRESENT THE EX-PRESIDENT TO THE INTERNATIONAL CRIMINAL COURT

ماتيجيى نقدم الرئيس السابق
للمحكمة الجنائية الدولية


دلوقت إحنا عندنا اكتر 300 شهيد بكتير ده غير الاف الجرحى ( والاغلبية انضربوا فى عينهم) ده غير معركة الجمل..و...و... اقولكم ايه ولّا ايه الهم كتير وبعدين تلاقى الدنيا ماشية بالحنيّن خالص ولا حد عمل حاجة للرئيس السابق ولا حاسبوه على الجرايم دى (سواء بصفته او بشخصه)، ايه يا جدعان امال الشهداء دول دمهم فين بح...فركش... بمبة؟؟؟؟، وبقالهم شهر مع ان القصة معروفة، وفى النص تلاقى عبد اللطيف المناوى يطلع يقولك جات ليا اوامر وقت موقعة الجمل احول الكاميرا على كوبرى هادى، يعنى العصفورة اللى ادته اوامر...؟؟؟( وطبعا هتلبس فى أى حد بعد نشر الكلام)
بصوا بقى مايجبش حق الشهداء دول غير المحكمة الجنائية الدولية،إحنا عندنا شهادات ووثائق للركب واهالى الضحايا متحسرين، وعندنا ناس تعرف توصل للمحكمة الجنائية...يبقى على البركة كدة ونقدم الورق ليها؛ وللعلم بعد الثورة السلمية فى صربيا،الشعب الصربى قدم الرئيس الصربى للمحكمة الجنائية الدولية بتهمة جرائم ضد الإنسانية ارتكبها فى حق شعب البوسنة؛إحنا نقدم الرئيس السابق بتهمة إرتكاب جرائم حرب ضد الإنسانية تم إرتكابها فى حق الشعب المصرى

Sunday, February 20, 2011

Frist step to to prevent the counter revolution

إحذروا الثورة المضادة


يوم ورا يوم بتبتدى تظهر امارات التكاسل الغريبة بدون معنى:يعنى تلاقى كدة لسه نفس الوزارة اللى عينها رئيس الجمهورية السابق ، تلاقى حبيب العدلى بيتوجه له تهم فى الخفيف مش فى الصميم(فين الكلام عن القناصة)، يجيلك خبر من العاملين ببواطن الامور إن القصة فى كلام فشنك كتير، تسمع بلال فضل وهو بيحذر لتانى مرة من مصيبة.بوضوح كدة النظام لسه فيه حِيِل وبيرتب على ثورة مضادة، تلاقى عمار الشريعى يتهم صفوت الشريف علناً وولا حد يرد يقول ايه قصة موقعة الجمل بس يقولوا بنحقق فيها(قال يعنى التليفونات كلها مش متراقبة ولا حاجة والحياة بمبى ) وده سر القلق اللى ابتدى يظهر عند كتير من الناس بدون سبب واضح...الناس متوغوشة بالبلدى كدة
حيث إن فيه ثورة مضادة يبقى من دلوقتى هنرتب وهننجح بأذن الله، زى ما هزمنا الطغيان فى الاولى هنهزم الاذناب فى التانية بأذن الله. المقترحات هى:
1-سيبك من الناس اللى كانت مع النظام فى مرحلة قبل الثورة ودلوقتى طلعوا وغيروا وشهم زى تامر امين، خيرى رمضان، ...إلخ
2- لو حد أنت مش عارف تحكم عليه قوى ولقيته بيشغلك عن الخطوة القادمة بالتشفى فى رموز النظام السابق يبقى تقلبه
3-ركز وخد بالك مين من المسؤلين بيتحاسب، وبيحاسبوه على ايه، يعنى ما يبقاش واحد زى حبيب العادلى عمل المصايب دى كلها ويمسكوا بس فى إهدار مال عام(ولسه ماحدش جاب سيرة القناصة ولا امن الدولة اللى اتقبض عليهم فى الميدانفى موقعة الجمل)؛ ولّا واحد زى صفوت الشريف تم إتهامه علناً على التليفزيون من عمار الشريعى وماحدش عبَّرنا بحاجة والانقح إن عمار الشريعى نفسه جات له تهديدات بعدها لدرجة إن الراجل جاله ذبحة صدرية ودخل العناية المركزة
4-أوعى إنك تتكاسل وتفتكر إن البلد تم إنقاذها بفارس على حصان ابيض وخلاص هنخش الجنة..لا يا فالح لسه خفافيش الظلام موجودة وانتبه بدل ما تتاخد على خوانة
5- رتب نفسك إنك ممكن فى أى لحظة ترجع على التحرير تانى (ماهى دى اللى جابت معاهم) وياريت لو تقدر ترتب على مليونية الجمعة يبقى ياريت اهو يوم اجازة وخلينا نخوفهم ...ياروح مابعدك روح