Friday, June 27, 2008

الرد على نبيل شرف الدين فى دفاعه عن مهدرى الغاز

وماله ياسيدى... إحنا الهتيفة



خير اللهم أجعله خير كدة سمعت عن صحفى أسمه نبيل شرف الدين كتب مقالة يدافع عن الاخوة اللى أهدرو الغاز و تحديداً عن السيد حسين سالم (الدستور:محنة حسين سالم.. حين تستنسر الغربان علي الصقور) ومهاجماً من يعملون فى الحملة الشعبية لتصدير الغاز و واصفاً إياهم "بالهتيفة"، وماله ياسيد نبيل شرف الدين.... إحنا الهتيفة ..إحنا الحنجوريين وأنتوا الناس الكويسين، إحنا يا سيدى الفاضل أسوء ناس و أنت ومن تدافع عنهم أحسن وأجدع ناس، و لكننا ياسيد نبيل لم نضيع على بلدنا مصر 200 مليار ولم نكن همزة وصل فى ضياعهم أيضاً ( ودى أقل قيمة للخسائر) وإذا كان من تدافع عنهم سيادتك خدموا مصر فكل واحد فى مصر بيخدم مصر وكلنا فى خدمة الوطن لأن كلنا بتشتغل كتروس الساعة ولو فى ترس واحد عطل قد يؤدى ذلك إلى عواقب وخيمةعلى الساعة كلها؛ ومش معنى أن فى حد خدم مصر أنه بعد كدة يكون له علاقة بصفقة تضيع مستقبل مصر والاجيال القادمة فى مصر.

أما عن وصفك بالرويبضة فنحن شاكرين أفضالك وكرم سيادتك فى إستخدام المفردات الحوارية والإهانات، ونسأل سيادتك إذا كان لدينا من الخبراء من يقول إنه تم إهدار ثروة مصر ولدينا من العلم والتكنولوجيا ما مكننا ان نعرف كأفراد عاديين ما حدث من إهدار لثروتنا(وذلك على الرغم من التعتيم الرسمى وعدم عرض الموضوع على مجلس الشعب إلا بعد الضغط الشعبى) فعن أى رويبضة تتحدث...؟؟؟.

أما كلامك عن أننا مبتلون بأمراض التنظيمات السرية و.... و.... فربنا يعافيك مما إبتلانا يا سيدى الفاضل ولو لا قدر الله جالك العدوى من واحد مننا ممكن تاخد قرص أنتشى بيوتشيك ( أنتى بيوتك = مضاد حيوى ) .

أما عن عن إحتياج جهاز الامن القومى للرقابة عليه وهل جهاز فى مثل وطنيته يحتاج للرقابة فأنا أحب أسأل حضرتك امال مجلس الشعب وظيفته أيه ومن ينوب عن الشعب فى مراقبة مصالحه ..اللهم إلا إذا كنت أنت تؤمن أن مجلس الشعب لا يؤدى دوراً رقابياً ولا فائدة منه...؟؟

أما عن المتربحين و .. و.. وشوية الكلام بتاع الانظمة الشمولية فنشكرك على كرمك ومفراداتك وياريت تكتر من إهانتك ونذكرك بالحديث النبوى الذى سأل فيه رسول الله (صلعم) :” أتدرون من المفلس...” إلى أخر الحديث.

أما عن دفاع الرجل عن نفسه وقصة شمشون و... و... فحضرتك ممكن الراجل يروح مجلس الشعب ويجتمع مع أعضائه ويقول كل اللى فى نفسه وده على إفتراض إن الموضوع فيه سر أساساً وذلك اللهم إلا إذا كنت انت سيادتك ترى ان أعضاء المجلس الموقر غير أمناء على أسرار الوطن.....؟؟؟!!! وإذا كنا بنتكلم على تصدير فجل وخيار فتبقى مصيبة إن إحنا نصدر لأعدائنا بسعر رخيص أما والكلام عن تصدير سلعة إستراتيجية تمس الامن القومى للبلد والاجيال القادمة فالمصيبة أفدح...!!!

أما عن كلامك عن اللى باعوا القضية من الفلسطنيين والاردنيين و الملكيين أكتر من الملك و.. و.. فالقصة مش كدة حضرتك ؛ القصة قصة مستقبل الاجيال القادمة وحصتهم من الطاقة والاموال التى أهدرتها حكومات الوطنى... وأسمح لى أقول لسيادتك حاجة كمان ...، فى مصطلح فى اللغة العربية أسمه الامن القومى ..، أسمه أيه... الامن القومى ؛ أنا هاكلمك عن الحدود الشرقية للامن القومى المصرى بس( أنا مش هطوِّل عليك لأن الموضوع طويل) و دى حضرتك تمتد لحد العراق و تركيا شرقاً ؛ يعنى بالعربى كدة حتى لو فى حد باع القضية ( وده مع نفيى الشديد عن أبناء فلسطين والأردنيين من الوطنيين الشرفاء أنهم باعوا قضيتهم) فماينفعش إننا نبيع أمننا القومى ونعطيه لإسرائيل كهدية فوق البيعة.

أما عن إسرائيل فهى دولة " معادية" بيننا وبينها معاهدة سلام ولم ولن تكون دولة صديقة ولو مش مصدق أنت حر بس ده لن ينفى الحقيقة الواضحة وضوح الشمس وبالنسبة للواقع فأحب أقولك على واقع إخوانك من المصريين اللى بيموتوا كل يوم فى طابور العيش والحكومة بتقول أنا ماعنديش فلوس أجيب عيش (مع إنها مضيعة 200 مليار ) أحب أكلمك عن أخوانك من المصريين اللى مش لاقيين العلاج على نفقة الدولة والدولة بدل ما تزود ميزانية وزارة الصحة ؛لاء راحت ضيعت الفلوس ؛ أحب أكلمك عن البنزين اللى غِلى علشان الحكومة تلاقى تدفع العلاوة بتاعة مايو لأن الحكومة ماكنش معاها 40 مليار علشان تدفع للناس..يكفيك الواقع ده ولّا أقولك كمان.

أما عن الصدمات فياريت تدخل على المواقع دى وتشوف إسرائيل عملت أيه فى أخواتك يمكن حضرتك تتصدم وتعترف بالواقع الحقيقى

http://egyptianpows.net

http://www.youtube.com/watch?v=vj30PHW1Jts

http://www.youtube.com/watch?v=0krBwybvP8w

أما عن الواقع السياسى وإستحلاب الكرايهة و...و..... فممكن حضرتك ماتاخدتش مُستحلب الكراهية أبقى خد أى مستحلب يعجبك بس أبقى فكر وقولنا كدة أنت هتقدر تجيب ال 200 مليار المهدرين دول إزاى وياريت ماتنساش تجيب كمان تعويضات لأسرى الحرب الذين قتلتهم إسرائيل ماهو ده برضه واقع ومصلحة برضه يا أستاذ نبيل شرف الدين.

أما عن الكلام من قِبَل رجال الدين عن الصفقة وإعتبارها خطأ فادح فسيادتك يعنى عايزهم يشوفوا الناس مش لاقية العيش الحاف والمرضى الفقراء مش لاقيين العلاج والحكومة راحت أهدرت 200 مليار ويشكروا الحكومة ولّا أنت عايز أيه بالضبط ....؟؟؟؟ وحضرتك أساسا لما تكون حاجة تمس كل مصرى يبقى لازم الحكومة قبل ما تاخد القرار يكون المصريين موافقين عليه ؛ الحكومة المصرية الموقرة ما إشترتش الشعب المصرى من سوق العبيد ؛ الحكومة تنوب عن الشعب فى إدارة مصالحه و أملاكه ومسؤلة أمام الشعب ونوابه مسؤلية كاملة.

أما عن التعايش السلمى اسمح لنا أن نقول لك إن التعايش السلمى لايساوى أهدار أموالنا علشان الدول الاخرى تدلع مواطنيها على قفانا

الدستور:تخفيض أسعار الكهرباء في إسرائيل بسبب الغاز المصري

وفى النهاية ياريت تشرح لنا سيادتك إزاى يكون الإندماج فى الإقتصاد العالمى عن طريق إهدار 200 مليار جنيه مصرى فى وقت مصر أحوج فى لكل جنيه وياريت تفسر كمان إزاى يكون الحرص ثروة مصر تخلف و...و....( شوية الكلام المكلكع اللى مالوش معنى اللى أنت كتبته فى الاخر)

والله المستعان ......فى الحفاظ على ثروة مصر من مهدريها و المدافعين عنهم


أيوة... أستنى ...أستنى ...أنت لَقَّحت بالكلام عن معاهدة كامب دافيد فى أول مقالتك ..والنبى يا عم الشباب أبقى هات كلام موثق بوثائق وقوله بصراحة وبلاش تلقيح كلام وعلى فكرة الدكتور يحى الجمل علق وقال فى الندوة بتاعة نقابة الصحفيين إن مفيش حاجة فى إتفاقية كامب دافيد تجبر مصر على تصدير الغاز لإسرائيل فمابالك بتصيدره رخيص.



Wednesday, June 25, 2008

Who's fault is it?

طب ده ذنب مين



الصراحة أمام التعليق ده أنا ماقدرتش أمسك نفسى،أنا أقصد أول تعليق تحت الموضوع ده التى أتنشر فى جريدة المصرى اليوم

أساتذة الجامعات يهددون بتصعيد معركة«زيادة الدخول» ضد هاني هلال .. واقتراح بـ«عصيان المجلس الأعلي

الراجل قال أنه بعد حساب التكاليف و.. و..و .. طلع متبقى له 100 جنيه فى الشهر وده غير الديون اللى عليه بسبب الدكتوراة.طب ما تيجى "نتخيل إن ده ممكن يكون طبيب" دلوقتى لما نيجى نبص على اللى بيجرى فى المجتمع "وهو الإنهيار الكامل " ونقعد نجعجع ونقول أخطاء الاطباء ومش أخطاء الأطباء وشوية الكلام ده ...الفيديو بتاع

مستشفى المطرية

يظهر المجهودات بتاعة الاطباء ويدحض موال إهمال الاطباء اللى الجرايد بتخرم دماغنا ( وعلى الاخص إحنا الاطباء) بيه . طب ما نتيجى نقف شوية ونقول الاخوة بتوع مستشفى المطرية وزيهم من ملايين الاطباء اللى عايشيين بيجاهدوا فى سبيل الله ( بلاش فى سبيل الله والوطن لأن الوطن حالياً مش طالبة معاه أطباء) إزاى مطلوب منهم يحافظوا على أعلى مستوى علمى (لأن ربنا هيحاسبهم عليه) وأعلى مستوى خدمة طبية ويعيش ب 100 جنيه وذلك مع العلم أنه مش هيتجوز ( ده حاجة خاصة بالبنى آدمين مش الاطباء) ومش هيمرض مع أنه بيتعرض لأقوى أنواع المراض وأكثرها مقاومة للأدوية ومش هيسكن ( خاليه قاعد مع أهله عقاباً ليهم على أنهم طلعوه طبيب) وهياكل مرة واحدة فى اليوم وهتكون شقة فول وهيلبس بدلة حديد ( ومش حديد عز طبعاً) إزاى ممكن ال 100 جنيه دول يكَفُّوه ولو حتى مواصلات ومع العلم إن عادة الاطباء بيصرفوا من جيوبهم الخاصة على المستشفيات وذلك لنقص المواد الطبية. طب إذا قلنا إنه هيشتغل بعد الظهر ويجيب قرشين ،المفاجأة إن بسبب سياسات الحكومة الموقرة أصبح عدد الاطباء فى الليمون و بحكم ميزان العرض والطلب أصبح المعروض أكثر بكثير من المطلوب و بقيت مرتبات الأطباء فى الأرض. طبعأ كالعادة هيطلع واحد رذل من الاخوة الرذلة يقول ماهو كشف الدكتور ب 100 وب 200 ، أنا من دلوقت ىرد عليه و أقول له دول الاطباء اللى بقالهم 30 سنة شغالين أنا بتكلم عن الاغلبية الصامتة اللى خير الحكومة مغرقها ( ودى بجد لأن حكومات الوطنى غرقت الكل وهتمشى وتسيبنا ) ..إلهى ربنا يوقعهم فى مستشفى يضطروا يعملوا عملية والنور يقطع عليهم يارب...آميييييين

Friday, June 20, 2008

Let's change our destiny

ألم يئن للذين يأسوا أن يرجعوا للحياة




مش جه الوقت علشان نبطل يأس و إنهزامية...، مش كفايه سياسة جنب الحيط اللى ودتنا ورا الشمس، مش كله زهق من سياسة شوف حالك بقى( ماهو حالنا وحال أهلينا واقف بفضل الحكومة).طب نعمل أيه ...؟؟

أبسط حاجة و " حيث إن إحنا لسه فى مرحلة اليأس المدقع" هى إنك وأنت قاعد كده تدوس على زرارين ...؟؟؟

يعنى بصراحة كدة لو أنت بعت إيميل لوزارة البترول ده ممكن يحتسب كخطوة نحو التصحيح. زرارين تضغط عليهم ...مش مشكلة كبيرة ..مش هتخسر حاجة....، يلا بطل يأس وإنهزامية و إعملها ...يلا


إيميل وزارة البترول


أبعت الإيميل دلوقتى متتأخرش ..متتحججش ...القصة مش هتاخد من وقتك كتير وبعدين ماأنت بتضيع وقت كتير فى حاجات هايفة كتير هى جت على المهم والوقت ضيق يعنى أبعت الإيميل و أعمل فرق فى مصيرك ...أعمل فرق فى مستقبلك ...أيوة الإيميل اليتيم اللى أنت هتبعته هيعمل فرق ولو تقدر تخلى أصحابك كمان يبعتوا يكون أحسن وأحسن

Sunday, June 15, 2008

Good good GOV

الحكومة السَنِيَّة ومشاكل الثانوية


أيه أحوال الثانوية العامة والتسريب على حِسَك ...لوز يا معلم مش كدة. ألا ما لاحظتش إن الحكومة بتتصرف وعلى قلبها مراوح و ولا كأن المصيبة القومية دى فى مصر ولّا كأنها فى بلاد واق الواق.طب ما خدتش بالك أن الإمتحان بيتبعت بالفاكس ( يعنى قابل للتتبع مووووووووووووت) طب يعنى هو اللى بعت الإمتحان بالفاكس للصحفى "اللى راح قدم الإمتحان وعمل بلاغ للنائب العام" بعته ليه..؟؟؟؟ هل هو بنى آدم بُرَم ..؟؟ ولّا هو بنى آدم وَحش وقادر يلعب مع الاسد..؟؟؟؟

طب بذمتك وعافيتك يا شيخ إن شاء الله الحكومة تِغلى عليك البنزين تانى يا شيخ ، مش حاسس إن الموضوع فيه حاجة غريبة..؟؟ يعنى الفار مش بيلعب فى عِبَّك...؟؟؟

وبالمناسبة أنا أتوقع أن تحتل اخبار الثانوية ومشاكلها كل الصحف" وبالذات الحكومية... ويسلام لما يرَّكزوا" عليها كمان .

طب هل ينفع نتكلم فى نظرية المؤامرة شوية ... يا سيدى إقرا بس كدة معايا بالراحة.

طب مش هى دى الحكومة اللى غيرت العقد اللى بينك وبينها فى السريع البنى ( الحكومة غيرت عشرات المواد فى الدستور فى حركة واحدة من غير ماتاخد راى الناس والموافقات بتاعة الوطنى كانت جاهزة على بياض)... يعنى من الأخر الحكومة دى زى ما واحد محترم جداً وصفها بتعاملنا على إننا العدو...فهى بتفجأك بكل قرار من غير ما تعرَّفك قبلها ولا تاخد رأيك فى أى حاجة كأنك أنت إسرائيل فى حرب 73.

الحكومة زمان كانت كل شوية تلاعبنا بمشاكل أندية الكرة كنوع من المسكن ( طبعاً أنت فاكر الراجل أبو قلب أسد واللَبش اللى كان عامله وبيخبط فى الكبير قبل الصغير) وبعدين لما الراجل ده خلاص الناس زهقت منه الحكومة دورت على حاجة تانية وبقيت كل شوية تطلع لنا حاجة من كمها علشان تلهينا بيها.أهو علشان الناس ماتزهقش أو تفكر فى المستقبل المظلم اللى جاى ( وهو جاى قُريِّب موووت والحكومة تكاد تخفيه)، وخلاص الاشية بقت فل الفل والحكومة كل شوية تلهينا بحاجة وتكمل مقالب ؛مشيها مقالب علشان حرية الرأى؛بس المرة دى الموضوع شكله كبير شوية بمعنى إن المرة دى الحكومة شكلها مِرَقد على مصيبة كبيرة حاجة كدة من نوعية المصايب التى لا تبقى ولا تَذَر، ممكن نقول إن الحكومة مِرَقَّدة على تمرير قانون الإرهاب فى هذه الدورة البرلمانية( وده على أقل تقدير) بس هى علشان تمرره لازم تمرره من غير ما حد ياخد باله وأحسن طريقة لكدة كالعادة إن الحكومة تطلع لنا مصيبة سودا نتلهى فيها وننشغل عقبال ما هى تخلص اللى هى عايزاه.... وممكن نقول برضه إن الحكومة الموقرة مِرَقَّدة على حاجة أنقح ..هى أيه بقى ..؟؟؟ الله أعلم...وربنا يستر.

Friday, June 13, 2008

Facebook group to make our GOV look good

أخر محاولات من أهدروا الغاز لتحسين صورتهم....

هيعملوا جروب على الفيس بوك

للدعاية لبيع الغاز لإسرائيل....!!!!



طبعاً الموضوع باين من عنوانه ومش محتاج كلام ، الاخوة الافاضل المحترمين سابوا ال 200 مليار اللى أهدروهم عن عمد وسابوا البحث والتنقيب عن البترول والغاز ودلوقتى بيشغلوا نفسهم بعمل جروب على الفيس بوك "قال يعنى كدعاية مضادة للحملة...” ،....والله عال يا عبد العال...يعنى بعد ماضيعتوا ثروة مصر فأنتوا بدل ماتدوروا تصلحوا المصايب بتاعتكوا ...لاء ... كان عندكوا من الوقت و الفراغ إنكم تجمَّعوا المرؤسيين ليكم وتقهروهم علشان تعملوا جروب مضاد ...

الصراحة معاكوا حق ما أهو خلاص أنتوا ضيعتوا كل حاجة ومبقاش فى حاجة تشغلكم وبقيتم قاعدين فاضيين وبتفكروا إزاى تحسنوا صورتكم

عار عليكم جميعاً ...كيف تجرؤن على هذا ....بل كيف تجرؤن على مجرد التفكير فى هذا....؟؟؟؟ إلم يكفكم مافعلتم...؟؟؟؟ ألم يكفكم أنكم ساعدتم أعدائنا...؟؟؟؟ ، الم يكفكم شهداء الحروب و اسرانا الذين ذبحوا وقُتِّلوا أبشع قِتلَة على أيدى هولاء السفاحين...؟؟؟؟

الا تهتموا لدماء محمد الدرة...؟؟؟ ومليون محمد الدرة...الا تهتموا لإخوانكم الذين ذبحهم الإسرائيليون...؟؟؟؟ وللتذكرة دى عينة من اللى حصل لنا من الإسرائيليين:

الهولوكوست الإسرائيلى فى حرب 56

وأدى عينة من اللى حصل فى حرب 67

قتل الضباط المصريين الاسرى العطشى بأيدى الإسرائيليين

سحق الضباط المصريين الاسرى بالدبابات الإسرائيلية

طب الا تهتموا لدماء شهداء طوابير العيش ..الناس الللى بيموتوا فى طابور العيش كل يوم......الظاهر إنكم مش بتهتموا بالمصريين أنتوا بتهتموا بحاجة تانية غير المصريين.

ياناس حرام عليكم ده أنتوا لما علاوة ال 30% جت قلتم إحنا عايزين 40 مليار علشان ماعندناش وسوَّدتم علينا عيشتنا، قوم يطلع إنكم مضيَّعين 200 مليار ومكَتِّمين ، يعنى كان ممكن العلاوة تبقى 150% والحكومة ماترفعش سعر البنزين ...بلاش 150% خليها 100% ، كان ممكن العلاوة تبقى 100% واسعار البنزين ما تزيدش...؟؟؟


طبعاً هيطلع المسؤل الفاضل ويقول إن الكلام ده مش صحيح وينفى نفياً قاطعاً أو يقول إن فى شوية ناس متطوعين عايزين يعملوا كدة من نفسهم علشان مصلحة مصر ( ياسلام على الكلام) ، طب ما أنا كمان ممكن أعمل زى المسؤل المحترم ده وأقول :” إن الشمس اللى بتطلع فى الدنيا مش إسمها الشمس...لاء دى إسمها مخيمر وليها أخ إسمه زقلط وعليه أحكام كمان... عادى، من حق كل إنسان أن يدعى مايشاء ولكن إدعاءه لن يغير من شيئاً من الحقيقة.


Sunday, June 08, 2008

KEEP OUR GAS 3



الغاز و200 مليار جنيه خساير"مبدئية" للصفقة بتاعة الحكومة الموقرة



بمناسبة الغاز والكلام اللى عليه وإن الكلام ساعات بيكون مكلكع فنفسر الكلام سوا كدة واحدة .. واحدة:

الألف قدم = 28 متر مكعب وده تقريباً بيطلع مليون وحدة حرارية بريطانية واللى بنقولها مجازاً مليون وحدة حرارية

نقول تانى مليون وحدة حرارية= 28 متر مكعب تقريباً

و أدى أصل الكلام فى دائرة المعارف

المقطع الثانى فى الحتة بتاعة :

Energy content, statistics and pricing

هنقول سبعة مليار متر مكعب( وده بصفة مبدئية وتقريبية) لما نقسمها على 28 ( علشان نعرف كام وحدة حرارية)=250 مليون مليون وحدة حرارية

طب نقول سعر المليون وحدة حرارية 75 سنت

يبقى : 0.75 دولار لما نضربها فى 250 مليون =187 مليون دولار=حوالى مليار جنيه مصرى إلا شوية ( وده على حساب إن الدولار بخمسة جنيه بس)

طب لو قلنا إن الحكومة باعته بدولار =250 مليون دولار =1.25 مليار جنيه

طب دولار ونص ( يلا يا عم هنعيّش الشعب فى نغنغة)= 375 مليون دولار = حوالى 2 مليار جنيه مصرى إلا شوية فكة

طب لو قلنا إن الحكومة باعته ب10 دولار ( مش 13 علشان 13 ده رقم نحس)=يبقى القصة 2.5 مليار دولار

طب لما نقلبهم بالجنيه ( معلش خلينا مع بتوع الفول والطعمية) :

2.5 مليار دولار فى 5 جنيه ( مشيها 5 علشان خاطر الحكومة)=12.5 مليار جنيه



يعنى فى القصة دى إحنا خسرنا كدة تقريباً: 12.5 مليار -2 مليار = 10.5 مليار جنيه فى السنة دى كدة فتح كلام و بمجموع 200 مليار للصفقة ككل و" بصفة مبدئية قابلة للزيادة"

وعلى فكرة الحسابات فيها نقطة ضعف وهى إن سعر الغاز بيزيد مع الوقت فالرقم بتاع الخساير هيزيد مع الوقت إن شاء الله وعلى فكرة أنا ما حسبتش تكلفة نقل وتحويل الغاز إلى سائل اللى للأسف علينا بموجب العقد
وده غير الفقرة دى من مقال الاستاذ عادل حمودة وخد بالك من الحتة بتاعة إن إحنا هنشترى من الشريك الاجنبى والسعر اللى هنشترى بيه من الشريك الجنبى ( وخد بالك إن السعر اليومين دول 10 دولاروطالع):
ملحق: إلي رئيس مجلس إدارة شركة كهرباء إسرائيل.. عزيزي السير.. بعد اللقاء مع سعادة المهندس سامح فهمي وزير البترول المصري وسعادة المهندس إيلي سويزا وزير البنية التحتية الإسرائيلي والذي عقد في القاهرة يوم 13 أبريل عام 2000 وأشار إلي اجتماع مجلس إيجبك في 12 أبريل عام 2000 نؤكد أن شركة غاز شرق المتوسط (إيمج) تعتبر بائعاً مصرحا له بتصدير الغاز الطبيعي إلي إسرائيل عبر خط أنابيب العريش إلي سيهان مرورا بنقاط استقبال إسرائيلية. وعلي الهيئة المصرية العامة للبترول أن تضمن لشركة غاز شرق المتوسط الكميات المتفق عليها سواء من حصة الشركة أو من حصص شركاء أجانب وهي الحصة المتفق عليها بين إيمج وإسرائيل والتي تصل إلي 7 مليارات متر مكعب في العام لمدة 20 سنة قابلة للتجديد باتفاق متبادل.. المخلص لكم ــ رئيس مجلس إدارة الهيئة المصرية للبترول.
(
ومعني تلك الفقرة أن مصر تقدم الكميات المحددة بسعر يتراوح ما بين 70 سنتا ودولار ونصف لوحدة الغاز وعليها أن تضمن توافر هذه الكميات لشركة حسين سالم ولو من حصة الشريك الأجنبي الذي يستخرج الغاز والشريك الأجنبي يحصل علي ثمن الغاز الذي يبيعه بالسعر العالمي فلو كان السعر العالمي كما هو الآن 9 دولارات فإنها تكون قد باعت بدولار ونصف الدولار واشترت بتسعة دولارات وهي كارثة تكلف الخزانة المصرية مليارات الدولارات في عقد مدته عشرين سنة).

شكراً للأخوة فى حكومة الوطنى اللى مش عارفة تجيب فلوس منين

والكلام التالى هدية للحكومة المسكينة اللى مش عارفة تجيب فلوس منيين للناس الوحشين اللى مش مقدرين خير أسيادهم عليهم لدرجة إنهم عملوا مظاهرات ( بعد ما كانوا بيموتوا بعض بس بقوا يعملوا مظاهرات كمان... فعلاً الدنيا إتقلب حالها)

مظاهرات فى البرلس بسبب نقص الخبز

15 مصابا في احتجاجات على نقص الخبز بمصر

طب نشوف خيرات الحكومة على إسرئيل

تخفيض أسعار الكهرباء في إسرائيل بسبب الغاز المصري

وملحوظة أخيرة وهى إن الحكومة لما رئيس الجمهورية قال أنه هيدى علاوة؛الحكومة زودت سعر البنزين بدعوى إنه مفيش فلوس وهتجيب منين و وملحوظة تانية وهى إن حكاية المفاوضات اللى رئيس الوزارة بيقول عليها...؛ إسرائيل بتقول عليها "شىء عارى من الصحة" ومش هيحصل أساساً

يارب يجى علينا اليوم اللى الحكومة تخفض فيه سعر أى حاجة( غير البنى أدم طبعاً) زى ما إسرائيل خفضت سعر الكهرباء على حس الغاز الرخيص بتاعنا وياريت الأخ الرِخم اللى هيطلع يدافع عن هذه الصفقة الخاسرة و يقول شوية كلام مكلكع فيه شوية حسابات فارغة وشوية فيزياء غلط يرحمنا ويسيبنا نموت بس من غير ما يفقع مرارتنا؛ يعنى هنموت فى طابور العيش أو فى أى مصيبة بس حتة واحدة يا عمنا...؛ إرحم وخلى رحمة تنزل.


Friday, June 06, 2008

KEEP OUR GAS 2

محاكمة من أهدروا الغاز

نحن صامدون...

وإن رفض الرافضون وتراجع المتراجعون



فى مثل هذه الايام منذ 41 سقطت مصر و الامة العريبية سقطة كبرى وقد قيل أنها نكسة أو... أو ... ولكن النكسة الحقيقية التى أُصيبنا بها هى الفكر الإنهزامى ، ذلك الفكر الذى أدى بنا إلى أننا بدلاً من أن نصلح بلادنا إستسهلنا اليأس والهزيمة وأصبحنا ندارى على ذلك بأنه :” يا عم كبر دماغك " ،“ يا عم مفيش فايدة " “ ياعم دول (الناس الوحشين أياً كانوا) يقدروا يعملوا... ويعملوا... ويعملوا... ، دول عملوا ..وعملوا .. وعملوا ..” ،" يا عم شوف أكل عيشك"،وفى النهاية أََل أمرنا إلى ما أََل إليه الآن وكلنا عارفين ، القصة مش محتاجة كلام.


بس يا أخواننا الكلام ده مينفعش لأن السياسة الإنهزامية اللى إحنا فيها ولا أقصد أفعال الحكومة الموقرة بل أقصد سياسة كل واحد فينا تجاه حقه ونفسه؛ هى اللى جابتنا ورا بمعنى إن الغلاء اللى إحنا فيه ده مش من صنع وظلم الحكومة لوحدها لاء ده فى شريك له الجزء الاكبر...، والشريك يبقى إحنا بصمتنا على الظلم وإتباع سياسة خانعة .......، كام واحد إستجاب للدعوة الشعبية لمنع بيع الغاز بتراب الفلوس ..؟؟ كام...؟؟ لا وايه القصة تمس كل واحد منّا بطريقة مباشرة وموجعة لأن الحكومة لسه رافعة سعر المحروقات "بدعوى إن مافيش فلوس وهتجيب منين علشان تدينا العلاوة...؟؟؟مع إنها لو إتصرفت صح كانت زودت الدعم والناس حياتها بقيت أسهل (عن طريق الفائض اللى هيجى لما نبيع الغاز بسعره العالمى مش ب 1\10 من سعره) ولكن كل واحد فينا لما الدنيا غليت عليه ومصاريف المدارس زادت والاسعار إتضاعفت وحياته زادت سواد على سواد ؛ ماحدش فكر إنه يهز طوله ويضغط على الحكومة علشان ما تضيعش فلوسه ، بل على العكس كل واحدحاول إنه يشقى ويتعب زيادة علشان يفضل يادوبك عايش


يا أخواننا حرام علينا اللى بنعمله فى نفسينا ماينفعش يبقى إبنى على كتفى وأروح أدوّر عليه

إحنا لازم نضغط على الحكومة علشان تتصرف صح فى فلوسنا مش على مزاجها والموضوع قانونى ومافيهوش حاجة وحشة لاسمح الله ..يعنى ماتخافش وبطل الكلام بتاع جنب الحيط وجوة الحيط ده ...الحيط هتقع يا حلو و مش هتلاقى حاجة تبنيها لأن اأسعار وصلت للسما

موعدنا

يوم الأثنين 9 يونيو 2008 فى نقابة الصحفيين

وذلك لعقد المحاكمة الشعبية لمن أهدروا ثروة مصر وأفقروا شعبها