A grat show in Egypt

أدى مرة كنت فيها بنى آدم

أسعفنى الحظ وصديقتى العزيزة Sunshine بحضور حفلة نيران الاناضول السنة دى. المرة اللى فاتت الحفلة كانت فى قلعة صلاح الدين وكانت رائعة فوق الوصف (فعلاً ساعتها حسيت بآدميتى وتمنيت لو يبقى فيه فرقة مصرية بهذا القدر من الاداء الفنى العالى (فين ايام فرقة رضا ؛والله اعمالهم القديمة لحد دلوقتى بحب اتفرج عليها) وأكتر حاجة عجبتى لما استعملوا اسوار القلغة كجزء من مشهد العرض قرب النهاية. اما المرة دى كانت فى الهرم فى مكان الصوت والضوء وكانت جامدة جداً (بس بصراحة حفلة القلعة كانت أحلى). والحضور كان ضخم جداً ؛الغريب ان المرة دى لقيت عدد كبير من أصحابى بيحضر...؟؟؟؟.(وانا عارف أن Aqua كمان راح حضرها فى شرم ومستنى منه مفاجأت لما يرجع).المهم كالعادة لأن أنا بنى آدم محظوظ الاقى أيه ..؟؟؟ عدد لا بأس به من الاخوة المشاهدين المحترمين قبل نهاية العرض قاموا يمشوا علشان يلحقوا قبل الزحمة...!!!طب ياخواننا ده فيه ناس بذلت مجهود علشان تمتعكوا ... ولا الهوا ولا كأن فيه فنانين مبدعين متقنين جايين من اخر الدنيا علشانكوا...! .ماعلينا المهم اتنقطت انا واصحابى فى نهاية الحفلة من هذا السلوك الردىء .... بس مش مشكلة الحفلة دى تستاهل كل المصاعب اللى شفتها فى اليوم ده علشان اروحها. بالمناسبة أول 3 صور دول من التغطية الاعلامية بتاعة برنامج العاشرة مساء(ماشاء الله شفتوا الشاب نط إلى ارتفاع اد ايه).الصورتين الاخرانين دول سنة 2004 من اليورو فيجن

ملحوظة:

دى غالبا هتكون من المرات القلائل الى أخرج فيها عن خط سيرى بس أصل الحفلة كانت أكتر من رائعة

Well done

عاش الرجال

بص كدة شوف شوية ناس بتحب مصر كشفوا ايه شكراً ليهم وليك انت كمان (لأن عدم ذهابك زنق المفسدين والمزورين فى خانة اليك)

Thank you , you are a real hero

تحية واجبة

تحية عطرة لكل من رفض الذهاب إلى هذا الإستفتاء المزعوم.أشكرك ......بلدك كمان بتشكرك..... أيوة....... مصر بتشكرك أنك ماروحتش وأثبت بالادلة الدامغة للعالم أنهم لا شعبية لهم(علشان ماحدش يعمل جدع ويقول الوطنى هو حزب الاغلبية...لاء أهى الاغلبية ردت عليكوا رد واضح دامغ يا رجالة الوطنى). ضحايا التعذيب يشكرونك ؛ أرواح الشهداء الذين توفوا دفاعاً عن مصر ترفرف سعيدةً بك ،أرواح كل من استشهد نتيجة للإهمال (العبارة والقطارات و... و...) ترفرف سعيدةً بك؛ أنهم الآن يحسون أن دمائهم لم تذهب سُدى. أنت بطل مصر...!!!! أيوة مصر بتشكرك يا بطل....!!!!..شكراً لك سيدى الفاضل،سيدتى الفاضلة هذه هى أول خطوة تتخذها من أجل الدفاع عن بلدك ضد كل مهمل و فاسد. مهما حاولوا أن يوهموك أنك لا تساوى شىء ..لا تصدق ،مهما قالوا أنهم يحكمون البلد... لاتصدق ،وكلما أشتد محاولتهم فى إقناعك أعلم أنهم إنما يحاولون بأستماتة نظراً لأنهم يعلمون بأزدياد ضعفهم ....!!!! أيوة أزدياد ضعفهم... صدقنى فعلاً ؛ طب لو مش مصدق قوللى ليه قدام شوية ناس متظاهرين لا يزيدون على المئات(ده إذا كملوا المية اساساً) تلاقى الوف من قوات الامن المركزى ومكافحةالشغب واقفة ضدهم ؟؟؟؟؟ يعنى هم الشوية دول هم اللى هيخربوا الدنيا ولا الفساد المستشرى فى البلد ؟؟؟؟ دول حتى مش عارفين يقبضوا على سفاح المعادى لحد دلوقتى دة غير سفاح بنى مزار اللى قتل كام نفر كدة وخلاص بَح ولا من شاف ولا من درى يا معلم دة غير المية والهواء اللى التلوث ماليهم.أشترى دماغك كل مايأكدوا أنهم اسود أعرف أن ضعفهم بيزيد .كمل و مايهمكش.... البقاء ليك...... أنت الاصلح...... أنت الاقوى..... حارب على قد ماتقدر كل فاسد مرتشى وماتخافش ؛أسوء حاجة ممكن تحصلك أنك تفضل زى ماأنت ؛ يبقى أنت ماخسرتش حاجة ياباشا(وذلك عملاً بالمثل العظيم:هيسخطوك ياقرد قالهم هيعملونى غزال ، مع إحترامى ومش قصدى). بص ياعم ده حتى مولانا ولى النعم الخليفة فى واشنطن نفسه ماقدرش يوالس المرة دى معاهم. وبص كدة الحكومات اللى بتعمل حساب لشعوبها بتعمل ايه لما شوية بحارة يُحتجزوا بره بلدهم مش تدوسهم الدبابات (طالع المقال المنشور فى الدستور صفحة 9 عدد الأربعاء 29 مارس 2007) ؛ آه صحيح بص بريطانيا عملت ايه كمان النهاردة

خد عندك ادى عينة من نتائج أهمالنا فى حق بلدنا فى الفترة الماضية وأدى عينة تانية وأدى عينة تالتة ورابعة كمان

دلوقتى نرجع للحياة اليومية العظيمة اللى إحنا عايشينها خد عندك يامعلم:

الشريف وشهاب‏ :‏ الأيام ستثبت أن حرية المواطن مصونة ولا مجال للتخوفات الحقيقة أن الرد على الكلام ده هو:

1- ادى خيرات تولى السيد صفوت الشريف وزارة الإعلام وتأييده المطلق ضد البرامج الدينية وفعلاً سيادتك معاك حق لاداعى للتخوفات أن ماسيحدث سيطول فقط الناس العادية اللى ماعندهاش بودى جاردات(جمع بودى جارد وهو الحارس الشخصى) ومش هيطول اى حد له ضهر، وده لأن اللى له ضهر مابينضربش على بطنه.

2- أما السيد الدكتور مفيد شهاب فهذا هو ردى على سيادتك:نشكرك شكراً جزيلاً لأنك لما كنت وزير تعليم عالى ما غيرتش فى التعليم حاجة خالص والحمد لله مصر دلوقتى مافيهاش أى جامعة ضمن احسن 700 جامعة على مستوى العالم وده طبعاً غير قانون الجامعات الذى صدر فى عهد سيادتكم الموقر اللى بيعامل اساتذة الجامعة بعد مايطلعوا معاش كأنهم خيل الحكومة(ومع أحترامى الشديد ليهم) .

IT'S TIME ....IT'S NOW OR NEVER,AND THIS TIME IT'S FOR REAL

قوم يامصرى

مصر دايماً بتناديلك :"خد بأيدى ...نَصرى دين واجب عليك

أخى المصرى ؛أختى المصرية؛ هذه هى أول رسالة أبعث بها أليك (وأعتذر عن عدم سابق المعرفة) و لعلها أخر مرة أبعث بها أليك .آن الاوان ايها المصرى كى تترك مقعد المتفرج وعويلك الدائم :"دول عملوا فينا دول هيعملوا فينا ...لينا رب أسمه الكريم (الله من هذا الكلام برىء فقد أمرنا أن ناخذ بالاسباب ولم يأمرنا بالكسل والتواكل).آن أوان أن تعلم الادارة الحاكمة لجمهورية مصر العربية بوجودك و بقيمتك كبنى آدم لازم تعمله ألف حساب ..(خد بالك أن كسلك فى اللى فات نتج عنه ده).

هتقوللى إزاى الكلام الفارغ ده هقولك أنك ممكن تحسس الحكومة بيقمتك عن طريق أنك بكرا يوم الاستفتاء ماتروحش (انا عارف ان القصة يمكن يكون فيها غرامة 100 جنيه ...بس يا عم اشترى دماغك ماهم لما يكسبوا ويعملوا اللى هم عايزينوا هياخدوا بدل المية الوف).

طب هنقول ونروح لاء...ها ها ها هاااااااااى ياحلوا هى كدة كدة مضروبة يامعلم ومتستفة.أمال أنا بتكلم ليه...؟أبدا يامعلم أنت لما متروحش وانا ماروحش و الناس كلها ماتروحش ،ويقوموا ضاربين النتيجة كالعادة.هنبقى قدمنا دليل دامغ على تزييف أرادتنا.... .حلو يامعلم على الاقل شىء احسن من لاشىء

طب هتقولى لاء اصل الدكتور مفيد شهاب قال اطمنوا كله هيبقى كويس (قال الكلام ده امبارح فى برنامج البيت بيتك وطلب أن احنا نستنى ونشوف قانون الارهاب وبعدين نتعترض على راحتنا).أقولك أرجع بالذاكرة يامعلم وافتكر لما كان ماسك التعليم العالى وقالوا له يقلل اعداد الطلبة اللى داخلة طب و هندسة علشان تبقى متناسبة مع احتياجات سوق العمل ،شوف قال ايه ؛قال :"انا ماأقدرش اقف قدام احلام وطموحات الشباب".طب هو عرف منين انا املى أتطحن فى الطب وبعدها أطلع مااأتعلمتش حاجة ومش لاقى شغل ومش لاقى فرصة اتعلم وشهادتى مش معترف بيها دولياً (علشان كمان معرفش اسافر برة و اتعلم). وفى الاخر يقولوا لك أخطاء الاطباء. أما عن الدكتور فتحى سرور أستنى عليا شوية بقى ؛ أصل الدكتور سرور لما كان وزير التعليم عمل ايه....لغى سنة سادسة وقام ضم خامسة وسادسة على بعض ونتج عن هذا انه هو بقى اللى أضاع احلام الشباب بجد لأن التانى فى دفعة فجأة بقى الرابع يعنى كل واحد فى حركة واحدة كدة ترتيبه تراجع للخلف الضعف(تسلم أيدك ياحكومة). استنى استنى لما أقولك على الدكتور مفيد شهاب كمان :بص ياسيدى فى عهده لما كان وزير التعليم العالى طلّع قانون الجامعات ؛اللى بيخلى خيرة علماء مصر (الثروة الوحيدة اللى عندنا) بعد مايتموا السبعين نرميهم (أو نقتلهم معنوياً علشان يحصلّوا خيل الحكومة) ومن 60 إلى 70 مرتبهم يقل بشدة(قال يعنى هو ناقص ) وايه كمان علشان لما يبقى عنده 3 أو 4 أمراض ومعاه المرتب العظيم ده مايعرفش يجيب علاج. ملحوظة هامة:اقسم بالله العظيم؛اقسم بالله العظيم ؛أقسم بالله العظيم أن أحد افضل اساتذة الجامعات (التى تعتبر ركيزة اساسية فى مصر) سفّروه برا؛ بعدين الفلوس اللى أدوها له طلعت قليلة جداً(وخد بالك من الامم اللى بتسافر على نفقة الدولة من ال.. وال....) المهم سابوه هو و مراته محتاسين ياعينى ومراته نشرت نداءات فى الجرايد علشان الفلوس خلصت ...حلو يا عم أدى الناس اللى بتقولك خليك واثق فينا .(ملحوظة اللى أنا كاتبه عندى ادلة عليه وانا دماغى طقت وركبتنى الجنونة ..يعنى ماحدش يعمل جدع ويقول لاء ماحصلش).

نرجع للمهم دلوقتى جت فرصتك علشان تبقى سيد فى بلدك ولو حتى يوم واحد فى حياتك....يوم واحد تقول فيه لاء ياأخوننا أنا المصرى سيد هذا البلد ولست عبداً لكم ولرغباتكم.

أنا أقترح عليك تبعت الرسالة لأصحابك وتقول لهم يبتعوها لأصحابهم يمكن لعل وعسى تبقى قدمت خدمة لبلدك .أنا مش هاقولك روح اعمل مظاهرة (علشان ماينفعش أقترح عليك حاجة أنا ماعنديش الجرأة اعملها)بس على الاقل ماتروحش بكرا أثبت للعالم أن الناس دى مالهاش شعبية)(أيوة أنت هتعمل فرق ،أنت ممكن تغير مصير بلدك كله... ماتستهونش بفسك..... انت تسوى كتير بس هم اللى بيقللوا قيمتك).ماتسكتش ماتتهزمش ...انت قوى.....أنت تقدر تغير مستقبلك ومستقبل مصر كله وممكن سلمياً مش لازم بالعنف.غاندى غيّر الهند سلمياً وانت مش أقل منه وتقدر تغير بالسلم برضه.

ولو على أسوء الفروض انت ساعدتهم فى تحقيق غايتهم؛ بكرا تشوف ياحلوا هيعملوا فيك ايه(خد بالك انهم دلوقتى ما بيساعدوش حد حتى شهداء الجيش والشرطة ولو مرضت ياباشا بص هيحصلك ايه )

أه صحيح لو مش عارف قصة التعديلات ايه بص هنا

وبص ياباشاأخر خيرات الحكومة

ودى كمان

The changes of the constitution

حكومة الوطنى الحريصة على المصريين

دلوقتى جه وقت التعديلات الدستورية والاستفتاء عليها والحكومة الموقرة بنوابها بتقول ان ده من مصلحة الشعب( مع أن الناس عارفة الحقيقة ياحكومة ) بس و ماله خلينا نعتبر نفسنا مش فاهمين وتقول من الأول تانى علشان الحكومة:

1-عملتم ايه لاهالى العبارة..؟

ج: الناس حقهم ضاع والمجرمين مش موجودين وكله موجود ومعروف (الملف 1 ميجا وهو جزء من برنامج الحقيقة)

2-عملتم ايه فى الجنيه..؟

آآآآآآآآآآآآآآآآآآآآآآآآآآآآآآآآآآآآآآآآآآآآآآآآه ....من غلاء الاسعار على ايديكم الكريمة ضيعتوا حق كل مواطن شريف

3- عملتم ايه فى السحابة السودة؟؟؟

ما هى باينة بلاش إجابات أحسن خلينا ساكتين

4-عملتم ايه فى المية؟

الإجابة واضحة وصريحة

4-عملتوا ايه لأى مواطن شريف بيدافع عن بلده؟؟؟

خليها عليا وهجاوب أول إجابة المرة دى

وخد عندكوا الاجابة دى كمان( علشان نعرف عملتوا ايه مع القضاة ......قضاء مصر الشامخ ياحكومة )

5- طب عملتم ايه فى حكاية الاسرى بتوع 67(قبل ما الاوامر تيجى من فوق)؟؟؟؟

اول اجابة

تانى اجابة

ده حتى ياحكومةالوطنى أنتوا مش بتقدرّوا رجالتكوا ؛طالع المقال بتاع حسنين كروم فى عدد 21/3/2007 جريدة المصرى اليوم وعنوانه "شهداء الشرطة واصول الجماع عند الاخوان" ؛ياحكومة أنتو بتحولوا شوية ناس للمحاكمة العسكرية والناس دول(شوية ناس عادية و شوية الطلبة بتوع الازهر) مش أخطر من القتلة اللى قتلوا الشهيد المتناوى والشهيد تامر عبد الفضيل ، صحيح ده قتلة الشهيد تامر دول لازم يطبق عليهم اشد مواد القانون عقاباً بس ياريت محدش يعمل جدع ويقول علشان كدة هنعمل قانون الارهاب ؛ لاء مواد القانون الحالى كافية ورادعة بس بتطبق بس على أعداءكم انتوا مش أعداء مصر ولا قتلة شهداء مصر . وبعدين بعد ده كله جايين بتقولوا أنكم حريصين على مصر ..!!!حريصين على ايه بالضبط....!!!!!ألا بامناسبة أنا عندى سؤال أنتوا لما بتبصوا فى المرايا الصبحية بتحسوا بأيه لما تفتكروا شهداء الواجب اللى أنتوا ماعملتوش حاجة لقَتَلَتِهم...!!! طب بلاش علشان مصر نقول أنهم مش شهداء مصر نقول انهم شهداء الشرطة طب هى الشرطة دى برضه جزء من الحكومة ولا ضباط الشرطة لما ينفذوا اوامركوا يبقوا كويسين وأول ما يستشهدوا بتعاملوهم كأنكم ولا كنتم تعرفوهم ولا سمعتوا حاجة عن ناس أسمهم ضباط شرطة ؛ويلا مافيش مشاكل علشان يبقوا زى ضباط الجيش فى 67 ومايبقاش حد أحسن من حد(وأهه كله لما بيموت الحكومة بتنفض له ولعيلته) ولا ايه بالضبط. وسؤال تانى لما بتشوفوا عيالكوا فرحانين وبيلعبوا بتحسوا قد أيه عيالهم حزانى بعد ماتيتموا .... ؟؟؟؟

يا أعضاء الوطنى الافاضل انتم فقط المستفيدين من وجودكم وتعديلاتكم وافكاركم لحماية انفسكم و ليس أمن مصر ولا أى حد فى مصر .أرحمونا من محاولتكم تبرير ماتفعلونه لمصلحتكم الخاصة...الرحمة .... الرحمة ... و أهه ......جدعنة منى أقر أنا كاتب هذا الكلام أن انا حمار ومش فاهم حاجة وأن الحكومة هى ستى وتاج راسى ؛بس بلاش تتصرفوا على أن إحنا أغبياء

نيجى به اخيراً وليس أخراً حكاية حريق قلعة الكبش الحكومة الفاضلة كانت مشغولة بشوية ناس مسالمين بيتظاهروا فى دولة ديموقراطية وسابت الناس اللى بتدعى أنها بتحميهم يولعوا و بيتوههم تتحرق. بصوا كده يا حكومة واسمعوا كلام الست الضريرة بتقول ايه فى الفيلم ده ؛الفيلم ده من قناة المحور ياحكومة (الفيلم 450 كيلو بايت تقربياً)

أول صورة لأثار الحريق ؛التانية الناس بقيت فى الشارع ...شكراً للحكومة علشان خلت الشعب كله فى الشارع، الثالثة الناس نزلت بهدوم البيت لأن الحكومة خلتهم يبيعوا الباقى ، أما الرابعة دى علشان الحكومة تتأكد أن الست دى ضريرة بحق وحقيق .

الحكومة تقول أن التعديلات الدستورية هى لأمن مصر وسلامتها

وسلامة شعب مصر

هنقول ايه ولاّ ايه ولاّ ايه ياحكومة

مش عارف ليه المثل ده فى ذهنى:

أفتكرلك ايه يابصلة و كل قطمة بدِمعة

The Egyptian constitution 1

خيرات حكومة الوطنى على وطنى مصر

أدى الجزء الخاص بالعبارة من برنامج العاشرة مساءً حلقة يوم الاثنين 19/3/2007 أتفرج وشوف خيرات الوطنى والسعى الدؤب لمصلحة الغلابة . خد بالك أن التعديلات الدستورية بيقولوا عليها لمصلحة الغلابة...لمصلحة مين يا معلم.... الغلابة بتقول مين يا باشا ......الغلاااابة.

الملف مقسم لجزئين كل جزء 2.5 ميجا تقريباً

أدى ياسيدى أول جزء

وأدى ياسيدى الجزء الثانى

شكراً لكل من شارك فى هذا السبق من قناة دريم

The Egyptian boat disaster

يا أدارة الوطنى

أرفعوا أيديكم عن وطنى

فقد

خربتموه

بما فيه الكفاية .....وزيادة

النهاردة كنت ببص على النت ولقيت الخبر الغبى ده :أسرائيل تدعى ان المصريين قتلوا اسراها فى حرب 73 بصراحة أنا هقول رأى بقى :ما أهو اصل لو أسرائيل بتعمل حساب للإدارة الحاكمة ما كانتش أذاعت الفيلم بتاع روح شاكيد وبعدين لو إسرائيل بتحترم عقلية هذه الادارة ماكانتش أستخفت بيها علشان تذيع الفيلم التانى ده وتحاول المحاولة العبيطة. حاجة تحرق الدم يعنى مش كفاية انهم قتلوا اسرانا؛ لاء كمان بيستخفوا بعقولنا ..!!! وكل ده وادارة الوطنى الديموقراطى كتر خيرها صدعتنا :مصر اكبر دولة فى الشرق الاوسط ؛مصر اقوى دولة عربية..مصر... . ومع اختلافى الشديد مع الإدارة الحاكمة ولكنى لا أقبل أن يعاملها أحد هذه المعاملة السيئة بمنتهى عدم الاحترام (صحيح أن الادارة دى هى اللى عملت فى نفسها كدة بس هم برضه مصريين ومايصحش حد يعاملهم كدة).

الليلة دى ليلة كوبيا أكتشفت أن مجلس الشعب أقر التعديلات الدستورية التى ستفضى أخيراً إلى غرق مصر بسرعة(ياااااااه أخيراً هتخرب ونقعد على تلّها...... بس لوحدنا المرة دى بعد مايكونوا سابوها ومشيوا). الأسوء أن كمان برنامج العشرة مساءً أذاع فيلم يظهر بعض الناجين فى العبارة (بس ايه بقى مش أى ناجين....؛ ده فى منهم المفقودين..ايوة المفقودين ياترى يا هل ترى يا حكومة الوطنى الناس دول فين ....،القطة كلتهم ولا ايه....؟؟؟؟) الفيلم بيتكلم لوحده ورقم العربية واضح!!!! كمان طب دلوقتى فى ناس من اللى كانوا فى العربية دول رجعوا لأهاليهم طب الباقى فين؟؟؟؟؟؟؟؟؟؟؟؟.

أبعث بهذا النداء إلى المهندس حمدى الطحان ( هذا الرجل الذى أقدم له كل أحترامى و أعزازى و لاأقصده هو وغيره من الشرفاء فيما هو مكتوب أعلاه)الذى صرح لصحيفة الدستور و قال :"نحن فى اللجنة نقاتل حتى اخر لحظة للثأر ممن تسبب فى هذه الجريمة وتقديمه للمحاكمة فلا يجوز أن نتعامل مع هذه الكارثة إلا بالصدق خاصة أنها تتعلق بأرواح أناس أبرياء" . ياسيادة العضو يوجد دليل يساعد فى أحقاق الحق فى هذه الكارثة لدى قناة دريم 2.ننتظر رد فعل سيادتكم.

الدليل واضح به كل شىء؛ رقم السيارة ؛وبعض من الموجودين فيها رجعوا إلى اهلهم اما الباقى فلم يرجعوا و على الرغم من ان أهالى بقية من كانوا فى السيارة تعرفوا على أقاربهم المفقودين فى هذا الفيلم ولكن بقية هولاء النس لم يظهر لهم أثر فى مصر ....أين هم؟ ياسيادة رئيس لجنة تقصى الحقائق؟؟؟

1- الصورة الأولى من فوق فيها واحد من الناجين اللى رجع لأهله رجع لمين ياخواننا لأهله.

2- الصورة اللى تحتها فيها الراجل اللى رجع لأهله على ايمين وباين حتى من وشه و على شمال الصورة باين واحد مارجعش لأهله (طب أشمعنى ده) وبعدين فى الصورة برضه صورة قديمة لهذا المفقود أحضرها أحد أقاربه....!!

3- مين اللى راكب فى العربية من قدام ده وايه اللبس الشيك اللى هو لابسه ده

4- أدى العربية ونمرتها كمان

5- الصورة الاخيرة دى صورة واحد مراته اتعرفت عليه من الحرق اللى فى أيده اليمين

6- الأخيرة دى وصلة علشان لو عايز تشوف الفيلم (حجمه 1.5 ميجا )

Free file hosting from File Den!

The Eyptian consitution

فى أوقات كده لازم نجر خط؛ ونقف وقفة؛ونقول

لاء

فى بعض من الايام يحدث من المواقف ما يجعلك ...تجر خط كبير كدة وتقول لاء.إن ما يحدث الآن من محاولات لتغيير الدستور هو كا رثة بكل المقاييس التعديلات مذكور بعضها على موقع مصراوى (أقرا ما هو مكتوب على موقع الجزيرة والعربية وشوف الوطنى بيعمل ايه( تابعت ما يحد ث من مناقشات فيها. والآن أعلن (و أقدم إعتذارى لكل الناس) لاء ....لاء....لاء يا سادة أنتم تقتلون مصر. أتنم قتلتتم كل شىء جميل فى هذا البلد تركتم دماء الشهداء إلى أن جت الاوامر من فوق (الرئيس مبارك يعنى).أنتم تركتم حقوق الغرقى فى العبارة (عدى سنة دلوقى ولا من شاف ولا من درى) أنتم تذرعتم بالأمن من أجل كل شىء فعلتوه فى البلد والنتيجة سفاح بنى مزار محدش قبض عليه لحد دلوقتى، سفاح المعادى نفس الكلام والجرايم مالية البلد وده بسبب أنكم شغلتم أفراد الشرطة بحمايتكم و مراقبة منافسيكم وياعينى لما حد بيستشهد أثناء تأدية واجبه ؛ القصة بتبقى ترقية للرتبة الاعلى مع أن المفروض أنه يترقى مساعد أول وزير الداخلية وأهله ياخدوا المعش ده وتبقى دى اقل حاجة عملتوها للشهيد!!!!!!!.طب نيجى نشوف عملتوا ايه للتعليم :صفر على الشمال أنتم جعلتكم التعليم على اسوء مايمكن عن عمد والنتيجة اعداد ضخمة فى كليات سوق عملها متشبع زيادة عن اللزوم فى حين أن المفروض تخططوا علشان الطالب لما يخش كلية يطلع يلاقى شغل (وبلاش هزار وحد يقول ماأقدرش أقف أمام أحلام الشباب ؛أنا شاب ومش من أحلامى أطلع حمار وشحات أنا كان نفسى اطلع الاقى شهادتى معترف بيها فى العالم والاقى شغل كويس) يعنى تخططوا كلية ايه هتقبل كام نفر!!!!. طب نيجى نبص للصحة ...أتكلم براحتك أنتوا صرفتوا كام على تعليم الاطباء والتمريض والخدمات الطبية. طب بلاش نبص للصناعة أنتوا حتى ماعملتوش استيكة ياخوننا .طب بلاش.... نبص للزراعة...فين دهب مصر الابيض اللى درسنا عنه فى المدرسة ،بلاش.... ليه التصدير لأوربا قل أوى ؟؟؟؟؟؟ليه الاكل بيطلع طعمه زى الخيار(كل الفوكه والخضار) ليه،بلاش ليه رقعة الارض الزراعية مش بتزيد الزيادة الكافية(ده على إفتراض انها بتزيد).طب .......طب بلاش نتكلم عن المية ..المية والنيل ياأخوننا ده حتى المية طعمها زفت الزفت وكل شوية نلاقى مكان طلع فيه تلوث مياه الشرب بالمجارى...!!!!!!.بلاش كل ده ماشى راضيين بالهم ده كله ...ياظلمة ياجببارة أنتوا رفعتوا سعر البنزين 30% فى يوم ...يامفتريين هتقولوا ايه لربنا طحننا الناس واللى فضل منهم أكلناه كدة أنتوا خدتوا من شقا عمر كل واحد فى مصر 30% فى حركة واحدة يعنى كل واحد شريف مش بيسرق الحكومة اخدت منه 30 % من شقا عمره (و حتى رجالتكوا أنتوا لو ماعوضتوش شقا عمرهم يبقوا برضه فلوسهم ضاعت) ويسلام بقى لما نحط على الكلام ده زياة سعر الدولار من كام سنة يبقى ياباشوات المصرى الأصيل دلوقتى بسببكم راح من 60%-70% من شقا عمره كدة فى 4 سنين تسلم أيديكوا و رجليكم خلتوا المصريين يشحتوا و الحمد لله.لكن دلوقت جه الوقت علشان نجر خط أحمر ونقول لاء......لاء يا أعضاء الوطنى لقد خربتم حياتنا بما فيه الكفاية مع العلم بأن لديكم من الكفأات من نخبة النخب بما فيه الكفاية و زيادة . كفاية اللى راح من عمرنا .بطلوا بقى وسيبونا نختار مصيرنا بأيدينا مش بتفكيركم اللى خرب البلد طول الفترة الماضية .لاء و ايه أنتم عايزيين كمان تتجسسوا على الناس فى بيوتها من غير موافقة النيابة......!!!! عادى(ماهى ناقصة اصلها )وممكن أى حد يتحبس ويعتقل...!!!!!! عادى (يعنى حاجة ببلاش كدة). ده حتى موريتانيا(مع إحترامى الشديد ليهم) موريتانيا يا ظلمة بقيت أحسن مننا .دلوقت الشعار بقى المصرى بيتهان جوه بلده وبره بلده. فيتهان جوه بلده احسن.والشعار الاخر المصرى هيفضل مصرى...... الجوع كواه والهم جواه(مع الأعتذار لأصحاب هذه الافكار وصاحب فكرة المصرى الأصيل). حرااااااااااااااااااااااااااااااااااااااااااااااااام ياخوننا إحنا دلوقتى قاعدين بين شقى الرحى (المطحنة يعنى) ما بين كوارث استبدادكم والاعتقالات و الناحية التانية إرتفاع أعداد العاطلين والجريمة(أشى وسط البلد و أشى مشاكل مكرم عبيد و أشى الاستاد فى كاس الامم الافريقية ) حراااااااااااااااااااااااااااااااااااااااام ده ده إحنا قربنا خلاص على الانهيار العظيم أرجوكم أبعدوا وثقوا فى الناس ...ايوة الناس أحنا شعب بيحب بلده (على الرغم من كل اللى بيجرى له فيها) وبطلوا تعملوا أوصياء عليهم.

من موقعى هذا وبعد ماشفت السيد العضو فى مجلس الشعب (العضو عن الحزب الوطنى) فى 90 دقيقة اليوم 18/3/2007 أقدر أقول :لاء. لازم الناس دى تروح والكلام ال..... بيقولوه . والتعديلات السيئة دى الف لاء كمان

بص شوف رأى بعض من الرجال المحترمين ( والله حاجة تشرح القلب) فى برنامج 90 دقيقة يوم 18/3/2007:

1- 90 دقيقة 1

2- 90 دقيقة 2

3- 90دقيقة 3

وشوف بقى غم الليلة دى بتاع سيادة العضو فى لجنة الأمن القومى و أعترافه الضمنى أن التعديلات دى كلها علشان الاخوان مايمارسوش الحياة السياسية:

1- 90 دقيقة 1

2- 90 دقيقة 2

See for yourelf

جزء من الحكاية لو عايز تشوف بعينيك

ده جزء من برنامج العشرة مساءً :بيتكلمو فيه عن الكارث.الملف يعمل ب:Media player classic وحجمه 4 ميجا.ممكن تجرب بأى برنامج تانى(jet audio مثلاً).أنا آسف ماعرفتش أعيد أخراجه خالص

Israeli Masakers o f the egyptians

الأسرى المصريين....من لهم؟؟؟؟

بصراحة مش عارف اكتب ايه ولا ايه ولاايه.... اكتب على قصة السفير الإسرائيلى اللى بيتصرف على اساس أن المصريين عبيد للسيد الوالد (وحط فى ذهنك وانت بتقرا الكلام إسرائيل عملت ايه علشان جلعاد شاليط)ولاّ أكتب عن السيد الوزير اللى بيتصرف كأن الحكاية زلطة و واحد رماها على سيارة دبلوماسية (انظر تصريحات السيد الوزير فى الوفد و المصرى اليوم) ولاّ أكتب عننا أحنا كمصريين راضيين عايشيين متهنيين....!!!! كل واحد فينا لما يتزنق يمد ايده فى جيب اللى جنبه ويسرق اللى فيه القسمة والنصيب، مع أن الدايرة بتلف تلف تلف و هو كمان هيتسرق...!!!! فى حين أن فى حرامى كبير موجود بيسرق الكل ويتسسبب فى الكثير واهدار حقوق الكثير والناس سايبة الحرامية الكبار و سايبين حقوقهم وقاعدين ولاّ اكتب عن قصة الطحالب تغزو مياه الشرب في بورسعيد ولا اكتب عن المقال بتاع إبراهيم عيسى اللى مكتوب فى عدد اليوم من صحيفة الدستور وخد عندك من الكلام الغم المكتوب:

1- تصريح الخارجية الإسرائيلية:إننا على قناعة وثقة بأن الحكومة المصرية ستفعل كل ماهو مطلوب من أجل طرح الوقائع على حقيقتها(يسلاااااااام) وتعمل من أجل تهدئة الخواطر

2-تنبأ المقال أن الادارة الحاكمة ستقوم بقمع كل من يتظاهر من أجل حقوق أسرنا المذبوحين

3- وأنتقد المقال أيضاً السيد الرئيس والسيد جمال مبارك وذلك لعدم تعليقهم على هذه الكارثة

والباقى تقروه بقى فى الجورنال ..!!!!!

المهم أن انا تخيلت جنود مصر البواسل بيحموا حدود مصر وبعدين لما يلاقوا جثث زملائهم مشوهة ومرمية فى التراب(حتى ماأندفنوش كويس ...حسبى الله ونعم الوكيل) ياترى الناس اللى بتسهر الليل دى (الجنود يعنى) ، إحساسهم ايه وهم عارفين أن مالهومش دية لو ماتوا ولا حد هيسأل فيهم لو أصيبوا أثناء خدمة مصر (يعنى كان حد عمل حاجة لجمعة الشوان غير ال70 جنيه معاش اللى بياخدهم دلوقتى ) ولو قتلوا غدر ماحدش هيعَبّرهم (ماهم شايفين قدام عينيهم أهُم) . طب بأى وش هنطلب منهم أنهم يحمونا ويضحوا بأرواحهم علشان إحنا ننام فى بيوتنا على سرايرنا مع عائلتنا متهنيين وآمنين ...!!!!!!. وبعدين تحقيق ايه ده اللى عايزين إسرائيل تعمله ده ؟؟؟؛هم عايزين إسرائيل تدين وزائها و كبار قادتها علشان خاطر المصريين؟؟؟!!!!.هم ماشافوش إسرائيل عملت ايه علشان جلعاد شاليط ولا ايه (ياااااه د أنا عملت حساب لإسرائيل لأنها علشان عسكرى واحد دكت فلسطين فمابالك هتعمل ايه علشان كبار القادة والوزراء...!!!!!!!)طب ليه الأخوة المسؤلين المحترمين مارتبوش علشان نحاكم المذنبين كمجرمى حرب .إذا كان إسرائيل سعت ورا مرتكبى الهولوكوست ولم تترك أحداً ..لم تترك أحداً حتى المرشحين كرؤساء الجمهوريات ؛ وخد عندك الرئيس النمساوى كورت فالدهايم والتحقيق اللى حصل معاه ؛وهوكان مرشح كرئيس جمهورية واخد بالك أنت وهومرشح كرئيس جمهورية تم الحقيق معاه علشان فظائع الهولوكوست.

السؤال الآن :ماذاسيحدث بعد ذلك؟؟؟هل ستتم محاكمة هولاء السفاحين كمجرمى حرب مثلما حوكم النازيين ؟؟؟ ماهو رد فعل السيد رئيس الجمهورية والسيد امين لجنة السياسات فى حزب الاغلبية(الاغلبية حالياً ياسادة فى أشد الغضب وتناديكم لإتخاذ أشد الإجراءات الرادعة الحاسمةلإرجاع حقوق اسرانا المذبوحين)؟؟؟؟هل سيتخذ الرئيس مبارك بطل الطلعة الجوية (المعروف عنه حمايته الشديدة لرجاله) إجراءات رادعة لإرجاع حقوق أبناءه ورجاله فى الجيش؟؟؟ أم هل ستصدق نبؤة إبراهيم عيسى فعلاً ونُترك فريسة لكل من هب ودب من هولاء السفلة السفاحين؟؟؟؟؟

الصور دى هدية لسيادة وزير الخارجية وهى لبعض المدنيين فى الاسماعيلية بعد الحرب؛بعد ايه سيادتك...بعد الحرب (الصور دى من قناة دريم 2برنامج العاشرة مساء) يمكن يحن شوية على الشعب المصرى

How could we do this to a Judge

هذا هو ما تفعله حكومة جمهورية مصر العربية مع قضاء مصر الشامخ

برضه كنت ببص على النت ولقيت الخبر الغم ده رئيس نادي مجلس الدولة: القضاء المصري يعيش محنة على موقع جريدة المصرى اليوم والاقى ايه جوه الخبر أن فى قاضى شاب يحتاج جراحة فى المخ والحكومة رافضة طب الناس رفعوا قضية(وخد بالك من بطء إجراءات التقاضى) و كسبوها ...!! والوزير برضه رافض وبعدين فى وسط الخبر مكتوب :"ولم يتمالك المستشار دكروري نفسه وانخرط في البكاء حزنا علي القاضي المريض الذي لم يقف به القدر عند صراعه مع المرض، وإنما دخل رغما عنه حربا أخري مع وزارة العدل، وقال: أصبح لدينا يقين أن محنة زميلنا لا نصيب لها من إنسانية الدولة أو عدالة القانون، وأننا سنواجه سلسلة جهنمية من الإجراءات التي تفرغ الحكم القضائي الصادر للمنزلاوي من مضمونه " ..!!!!!!! الدموع ....الدموع...!!! يانهار اسود ومنيل دول القضاة ... القضاة يابلد ....؛حتى قضاتك يامصر بيتعمل فيهم كدة.

وكمان كان مكتوب:"وأشار دكروري في البيان إلي أن أسرة القاضي تصورت خطأ أنه لا يوجد في هذا المجتمع من هو أعلي شأنا وأسمي مكانا من القاضي، لكي تهب كل أجهزة الدولة لنجدته وإغاثته وتوفير كل اللازم لعلاجه".

الصراحة أنا مش عارف اقول ايه ولا ايه ولا ايه...... يامصر ولادك غرقوا فى العبارة وماتوا فى القطر واتحرقوا فى المسرح وجنودوك(الى أندبحوا واندهسوا علشانك فى67) حقهم راح و مش راجع وقضاتك (قضاء مصر الشامخ) متروكين لل........ وال..... فى مرضهم (أقول ايه بس مش قادر اكتبها ) بس حرام اللى بيجرى ده يامصر طب نطفش ونسيب البلد دى اللى مش باقية على ولادها ؛ وفى النهاية تفضى مصر من خيرة وطنيّها و محبيها بلا رجعة ولا ايه يعنى

دى حاجة تفلق (مع الاعتذار للمسلسل)

Israeil thinks egyptians are fools

ربنا ما يحرمنى من العبط

النهاردة وانا ببص على صفح العربية لقيت الخبر ده صحيفة: مخرج وثائقي إعدام الأسرى المصريين يقر بارتكابه خطأ الصراحة لما قريت الخبر حسيت بأن عرق العبط نقح عليا وأن العصافير اللى انا داققهم رجعوا تانى بعد ما كانوا مهاجرين كندا(بيشتوا فى الصيف لأن الحياة بمبى هناك).

يعنى مش كفاية وقاحة الإسرائيليين فى الافتخار بهولوكوست جنودنا المصريين..!!! لاء كمان بيعاملونا على أننا عبط وبريالة بس أقول ايه ..!!!مفيش أنسان بيتهزأ...فيه أنسان بيسيب الناس تهزأه وأنسان بيوقف الناس عند حدودها ومايخليهاش تدوس له على طرف(والاخير ده هو المحتل الإسرائيلى)

بس خلاص .... خلص منى الكلام وكل اللى يجرى لنا فى مصر نستحقه علشان سايبين الناس دى تهزأنا بعد ماقتلوا أسرانا العزل

طب نبص كدة على جزء من الحقيقة

The Israeili ambassador and th egyptian holokost

هذا هو أقل ما نستحقه وهذه هى المقدمة والبقية تأتى


كنت نويت أنى اخد أجازة شوية بس من الواضح أن كالعادة الدنيا سودة واللى جاى أسود من قرن الخروب؛كنت بسيرف النت؛وألأقى الخبر ده على موقع جريدة الوفد السفير الإسرائيلي: لن نحقق في قتل الأسري المصريين والصراحة أتفقعت مرارتى تانى (الحمد لله فى مصر علشان الواحد يعيش لازم يكون متعدد المراريات؛"جمع مرارة")
ايه الوقاحة دى وأزاى مصر تسيب بنى آدم زى كدة يقول الكلام دة أمال فين الراجل الطيب أولمرت(زى ما سيادة الرئيس مبارك قال وصفه ) مطلعش ليه قال معلش يامصريين متزعلوش .أنا فاكر أن علشان جلعاد شاليط الجيش الإسرائيلى كان بيدك فلسطين المحتلة وكان المسؤلين الإسرائيليين بيقولوا :"جندى من جنودنا بوزرائكم" أمال إحنا ليه تركنا حقوق أبطال الجيش الذين سيقوا إلى معركة بدون إعداد أو تنظيم أو تدريب وأُسروا وذبحوا فى الاسر ومنهم من حفر قبره بيديه ثم قتل فيه ومنهم من دهسته الدبابات و... و... و... أقول ايه ولا أيه ولا أيه . يعنى حراس أمن مصر إحنا القينا بيهم فى الحرب بدون أى شىء وتركناهم ليُذبحوا أو تدهسهم الدبابات وكمان تركنا حقوقهم و عندما تفاخر النازيين الإسرائيلين بهولوكوست المصريين لم نقدر ايضا على أن نصنع شىء لهذا العدو وكمان السفير الإسرائيلى فى مصر(مصر أقوى دولة فى العالم العربى) يقول كدة بمنتهى الجرأة.

أين رد حكومة جمهورية مصر العربية الموقرة ....؟؟؟ لاشىء... !!!
أين رد الحزب الحاكم ...؟؟؟...لاشىء!!!
أين رد رئيس الجمهورية بطل الطلعة الجوية التى ألحقت الهزيمة بهذا العدو...؟؟؟ لاشىء......!!!!!!!
أين رد المجتمع المصرى...؟؟؟؟ لاشىء...!!!
ردى أنا كبنى آدم( سابقاً )هو .... لاشىء
إذا نحن كمخلوقات (لاأقدر أن أقول بنى آدمين مصريين لأننا تركنا كل شىء له علاقة بالآدمية وتصرفنا ومازالنا نتصرف على اساس أن البلد دى مش بتاعتنا دى بتاعنهم هم) لانستحق أن يدافع عنا هذا الجيش الذى هو من خير أجناد الارض.
ياسيادة الرئيس أنت لم تقدر حتى على واحد من شعبك تسبب فى موت 1500 مصرى لأن فى حد فى البلد بيحميه...!!!فكيف ستقدرعلى هذه الدولة وجنودها ووزيرها(ولا أقصد الحرب و لكنى أقصد جميع الإجرأت التى أتخذتها إسرائيل تجاه من قاموا بالهولوكوست نتخذها نحن أيضاً تجاه إسرائيل مع العلم بأن هذه الإجراءات طالت الرئيس النمساوى كورت فالدهايم)....إذاً فمن الممكن أن تطول هذا الوزير اليعازر ؟؟؟!!!
ياسيادة الرئيس لقد كنت بطل الطلعة الجوية التى فتحت باب الحرية ....!!!ولقد حان الوقت لتكون بطل الديموقراطية أيضاً وتتخذ قرار التنحى وتكون بهذا بطلاً لمصر فى الحرب و السلم أيضاً



لقد حان وقت تنحى سيادتكم عن مسؤلية رئاسة جمهورية مصر العربية

آن أوان الرحيل ياريس

بعشق ترابك يابلدى بس اندفنت فيه بعد ماأتقتلت غدرعلشانه و كمان دمى اهه راح هدر

(هذا العنوان مأخوذ بتصرف من مدونة Utopian و آسف مش عارف اوصل للموقع تانى( الليلةدى فى برنامج العشرة مساء لقيت حلقة عن حكاية الاسرى المصريين واللى حصل الحلقة انا لحقتها من الاخر بس كويس علشان ماتتفقعش مرارتى لأن كالعادة الاخوة المسؤلين قالوا شوية كلام و فى الاخر النتيجة لاشىء. والاسوء ان جورنال الاهرام كاتب :الحكومة المصرية " تطالب" الحكومة الاسرائيلية بفتح التحقيق فىقضية الاسرى المصريين......!!!!.أنا مش هرد على العنوان ده علشان ماأخرجش عن حدود الادب .

يعنى الجنود دُفعوا دفعاً لهذه الحرب (وزمن الضربة كان معروف )وكمان تُركوا فى الصحراء فى العراء لكى يُأسروا ويغذبوا ثم يُقتلوا، وكمان ماناخدش حقوقهم ولا حتى بعد 30 سنة لاء وايه كمان مصر تُطالب .... تُطالب يا ظَلَمة يا ولاد.....(الكلام خفت اكتبه لأنه خارج عن الاداب العامة) مصر ....مصر .... بقيت دلوقتى تُطالب مش بالقبض على القتلة ومحاكمتهم؛ لاء بفتح باب التحقيق...!!!!!! طب ياريت يبقوا يواربوا الباب علشان يبقى يجيب شوية هواء؛ بس طراوة ياريت؛ وممكن نسند باب التحقيق بزلطة بدل مايتقفل جامد ويصحى الباشاوات اللى نايمين.

أعتقد أن هذا المنشور لايستحق التعليق بل يستحق الافعال الرادعة الحاسمة.

آن أوان التغيير

الرجاء من سيادة رئيس الجمهورية التنحى إذا لم يكن لديه القدرة على حماية شعب مصر وحقوقه و عدم تركها ملطشة للى يسوى واللى مايسواش

وذلك أسوة بالرئيس عبد الناصر الذى تنحى عندما فشل فى الحفاظ على ارض مصر وسيادتكم لن تقدروا على إرجاع حقوق المصريين من ألإسرائيلين(ولنا فى حادثة العبارة أسوة أخرى؛ بص على الفيلم اللى تحت كدة)