Please read "carefully"

أرجوك ماتزلعش منى

أرجوك ماتزلعش منى ولا تقول علىّ خاين و...و... و.... و بكره الفلسطينيين وماعنديش عروبة ولا إنتماء ، من فضلك أقرا الكلام وأعقله وبعدها نتكلم

بص معايا وركز فى الكلام اللى جاى:

دلوقتى حصلت مشكلة غزة و...و.. و.... أنت عارف القصة ، طب ركز كدة على حكاية أن مصر فتحت الابواب أو سابت الفلسطينين يدخلوا ....!!!!

وركز معايا أن دلوقتى كمان إسرائيل بتقول أنها مالهاش دعوة بقطاع غزة وغير مسؤلة عنه......!!!!!( كان مكتوب معنى الكلام ده فى الشريط الإعلانى على قناة الجزيرة)

طب إرجع بذاكرتك كدة من حوالى 5-6 شهور لما هيكل طلع فى قناة الجزيرة وقال ما معناه :"أن جورج بوش فى نهاية ولايته لم يحقق شىء وأنه سيقوم بتصفية القضية الفلسطينية قبل نهاية ولايته ليحقق شيئاً من المجد أو الدعاية لإدارة حكمه وأن من ضمن التسويات أن تٌوضع غزة تحت الإدارة المصرية كما أنه سيُعطى للفلسطينيين جزء من سيناء حيث أن غزة غير قادرة على إستيعاب الكثافة السكانية للفلسطينيين.....!!!!! "

كالعادة أنا مش هكمل الكلام الى قاله بسبب إن مصر فيها حرية رأى

طب بذمتك كدة مش ده اللى عمله جورج بوش فى جولته الاخيرة وكمان كان فيه كلام عن قيام دولة يهودية وخد بالك أن الكلام كان عن قيام دولة يهودية ( أمال إزاى أوربا و أمريكا طالعين بفكرة فصل الدين عن الدولة ......؟؟؟؟؟؟!!!!!!)

وبعدين ركز معايا أن مصر ماعملتش حاجة نهائى لمساعدة الفلسطينيين ( مع أن فيهم أولمرت صديق .....) و خد بالك معايا من اللى منشور على موقع العربية:

مجلس حقوق الإنسان بالأمم المتحدة يعتبر الحصار "جريمة حرب"

نصف سكان غزة عبروا لمصر ومطالبة إسرائيلية بقطع الصلة بالقطاع

طب بص على الجزء ده من الحلقة التى سُجلت فى اوائل شهر 12 سنة 2007

(أنا قسمته 4 ملفات كل ملف 1 ميجا تقريباً)

1- الجزء الأول

2- الجزء الثانى

3- الجزء الثالث

4- الجزء الرابع

وفكر معايا :" هو مش غريب شوية أن كلام هيكل يبتدى يتحقق طب هل معنى كدة ان مخاوفه من أن يتم إعطاء سيناء أو جزء من سيناء ستتحقق؛وإذا تحققت هذه المخاوف وتم التنازل عن جزء من أرض (سواء بصورة واضحة أو بصورة خفية تحت إدعاء بأن مصر الأخت الكبرى للعرب وملاذ المستضعفين وشوية الكلام اللى لا بيوَدى ولا بيجيب ) ماهو المكسب الذى سيكسبه من تنازل عن جزء من أرض مصر وهل نحن كمصريين دافعنا عن أرضنا بدمائنا سنوافق على التنازل عن شبر من أرض مصر حتى يتحقق لأحدهم مراده.....!!!!!!!!!!!!!!!

فمع إحترامى لكل العرب و.. و.. وحبى للفلسطينيين والعروبة والذى منه؛

أرض مصر ليست للتنازل عنها تحت أى ظرف من الظروف

منهم لله بتوع البرلمان الاوربى

منهم لله بتوع البرلمان الأوربى

الوحشين الكِخَّة بتوع البرلمان الأوربى (منهم لله ...الله ينتقم منهم) قال طلعوا بيان بيقولوا كلام وحِش على مصر ...مصر العراقة ...مصر الأصالة....مصر مبارك..... مصر الأهرامات . ده من كتر الاثار والاهرامات الواحد ساعات بيتخيل أن كل واحد فى البلد تحتيه على هرم؟؟؟!!!!! الوحشين الكخة دول جايين ينتقدوا مصر ....!!!!!!!!!

طب بأمانة ربنا فيها حاجة لما تكون البلد مالهاش ضابط ولا رابط...؟؟؟!!!

طب فيها حاجة لما يكون واحد قاضى أنضرب من واحد ضابط وماحدش جاب له حقه... ؟؟؟!!!! ولّا فيه أيه لما كل شوية القضاة من كتر ما تعبوا من الحكومة يعملوا وقفة إحتاججية..؟؟!!.

طب فيها حاجة لما تلاقى كل يوم كدة إعتصامين تلاتة...؟؟؟!!!!

طب أيه يعنى لما كل شوية نكتشف قضية تعذيب ولّا تعذيب أفضى إلى الموت ..أنا مش فاهم أيه الناس اللى بتعترض على إرادة ربنا ...؟؟؟!!! يا أخواننا الناس أعمارها بيد الله يعنى نعترض على إرادة ربنا...؟؟؟!!!!! عمره

طب فيها أيه لما نلاقى واحد ضابط ضرب واحد من أعضاء المجلس الموقر وكمان نلاقى صحيفة الدستور كاتبه أن الضابط قال كلام وحِش( ومهين) على السيد رئيس مجلس الشعب( أنا مش هكتبه لأن بلدنا فيها حرية رأى) وكمان ما نلاقيش أى حد بيعترض على الكلام المكتوب (مع أن رئيس التحرير بتاع الدستور محكوم عليه بعدها فى قضية إشاعات ضد صحة الرئيس) ولا نلاقى حد طلع يقول أنه تمت معاقبة الضابط...!!!!

طب أيه يعنى أن فيه سجناء رأى..ماهو ياأخوننا السجن تأديب وتهذيب وإصلاح يعنى لو عندك تليفزيون بايظ تحطه فى السجن يتصلح ولو أنت معندكش أداب المائدة هتتعلمها فى السجن لأن كل واحد معارض فى مصر بيتعلم جميع الاداب الممكنة وممكن القصة تزيد معاه للأخوة بتوع الاداب كمان.......عادى !!!!!!

طب فيها أيه لما الحكومة تكون بتمارس سياسة القمع للجميع ( أنا أقصد قَمع مش قُمع)..أهى حكومنتا وعِشرة عمر وبقينا زيتنا (غِلى موووووت) فى دقيقنا (برضه غِلى موووووووت)

أنا مش هاأكتب أكتر من كدة علشان بلدنا فيها حرية الرأى وعملاً بالمثل القائل :"أفتكر لك أيه يابصلة وكل قطمة بدِمِعة"

بس الحمد لله الحكومة والمجلس الموقر ردوا رد عنيف وحازم ولازم وقالوا أنهم مش هيحضروا جلسات مع الناس الوحشين دول وكمان الحكومة كشفت الناس الوحشين دول إن اللوبى الصهيونى (صهيونى :يعنى يتبع إسرائيل اللى إحنا بنديها غاز طبيعى بأرخص وأثبت سعر مع إن إحنا مديونين لطوب الأرض ) .

قوم أيه بقى من قوة وعنف رد الحكومة والمجلس الموقر الراجل بتاع الأوربى قام أتصل بالاخ اللى عندنا فى المجلس الموقر و أعتذره و"أبدى أسفه"...!!!!لاء وأيه كمان بقى وخد بالك من اللى جاى؛ طلع الراجل بتاع الأوربى ده راجل مش تمام لأنه طلع تانى يوم فى صحيفة الدستور بينفى أنه أعتذر وأبدى الندم و أن حياته أصبحت عدم.....!!!! شوف ياأخى الناس دى بوشين إزاى...!!!!

تعيش حكومتنا الموقرة اللى كشفت لنا الناس اللى بوشين (الوِحشين بتوع الأوربى)

Where is our government...???

فين الحكومة القوية وفين هيبتها

كنت من كام يوم كدة ببص على مدونة الأخ وائل عباس ولقيته ناشر وصلة لموقع عليه برنامج تليفزيونى لواحد مذيع إسرائيلى بيقلد الرئيس مبارك فى لقاء مع مذيعة إسرائيلية( هى ما كانش مذيعة ده كان راجل عامل واحدة ست) والمذيع ده وهو بيقلد الرئيس قام بالتلفظ بالفاظ خارجة وقام المذيع أيضاً بإتيان بعد الحركات كسخرية على الرئيس وفى الاخر المذيع قام رقص مع المذيعة بعد ما راحت لبست بدلة رقص بلدى.

طب هو على الرغم مكن إختلافى وإختلاف ناس كتيييييير مع الرئيس مبارك وإدارته الحاكمة(إختلافاً حاداً و شديداً) ولكنى ككل المصريين لا أرضى واعترض بشدة على أن يُهان رئيس جمهورية مصر العربية بأى طريقة ممكنة. فين رد رئاسة الجمهورية...؟؟؟؟؟؟

طب وبعدين السيد الوزير أحمد أبو الغيط ...؟؟؟!!! الوزيرأحمد أبو الغيط أنا شفته فى لقاء تليفزيونى بيقول أنه لما بيدخل مبنى الامم المتحدة بيكون فى منتهى القوة والعزة ولأنه بيمثل تاريخ وعظمة مصر.طب يعنى أن تتم إهانة الرئيس المصرى ده مش بيمسش مصر ياسيادة الوزير...؟؟؟!!!

ولّا الوزير بطرس غالى اللى بيقول أنا ماحدش يقدر يلوى دراعه( حوالى عشرة الاف موظف ماقدروش )...فين ياسيدى أى تصرف ليك ولّا حتى تصريح....؟؟؟!!!!

طب السيد رئيس الوراء اللى كان بيقول على الناس فى مرة أنهم مايفهموش ....إحنا ياسيدى لانفقه فى الإدارة وكننا نعلم متى تتم إهانتنا ...؛ أنت سيادتك رأيك أيه فى الإهانة دى برضه... هل هتقول أن إحنا مش فاهمين برضه ولّا أيه...؟؟؟؟

طب ياترى حد هيطلع من المسؤلين ويفقع مرارتنا ويقول دى حرية الرأى والديموقراطية.....طب بأمارة أيه ورؤساء التحرير لسه بيتحاكموا .....!!!!؟؟؟؟

طب واحد عايز يعمل أن بيفهم ويقول أصل دى الدول الديموقراطية ....طب بأمارة أيه دى فرنسا(بتاعة الديموقراطية كلها) أنت تستطيع أن تسب الذات الإلهية ولاتستطيع أن تشكك فى مذابح الهولوكوست ولو عملت كدة فى أمريكا هتشو ف أسود أيام حياتك؛ هل يستطيع أى مصرى فى مصر أن يسب رئيس الوزراء الإسرائيلى فى التليفزيون بأى طريقة ممكنة

Why are they raising prices...????

المازوت وسنينه

هو أنا ذنبى أيه أن الحكومة عاملة إتفاقية لتصدير الغاز بواحد ولّا أتنين دولار للوحدة مع ان سعره زاد حوالى خمس مرات

طب دلوقتى الحكومة طلعت قرار أن أسعار المازوت تزيد 100% ...وش كدة من غير ماتاخد رأى الناس ولا المجلس الموقر ولا تعرض خطة إزاى هتعوض الناس الغلابة " اللى الريس بيهتم بيهم جداً " ( وده حسب الكلام اللى بيقوله فخامة الرئيس). طب يعنى هم يروحوا يبيعو الغاز لإسرائيل بأرخص الاسعار والتمن ثابت لمدة 15- 20 سنة وده مع العلم أن سعر الغاز زاد حوالى 15 مرة يعنى 1500% و بعدين يجيواعايزن يرفعو الدعم عن المازوت ...طب معلش بقى فين الإكتشفات البترولية اللى كل شوية الأخ وزير البترول بيقولها لينا "وللرئيس" فى التليفزيون ؟؟!!! يعنى الاخ المحترم ده بيتعمد يقول كلام غلط لرئيس الجمهورية علناً على حس الناس ولّا أيه بالضبط...؟؟؟؟؟؟!!!!!! ويعد كدة الريس يصدقه كمان...!!!!

طب إزاى رئيس الجمهورية يخطب فى الناس ويقول أنه بيهتم بالفقراء و...و... و.. وبعدها الحكومة تعمل كدة ؟؟؟؟ طب هنا السؤال ( والسؤال ده فى دماغى بعد قراءة إحدى المقالات فىصحيفة الدستور)يجى يطرح نفسه وبشدة

هل السيد محمد حسنى مبارك رئيس الجمهورية( متعه الله بالصحة وطول العمر) مازال ممسكاً بمقاليد أمور هذا البلد فى يده ولّا خلاص المقاليد خرجت عن أيده وكل واحد فى الحكومة بيعمل اللى هو عايزه لأنهم عارفين أن كلها شوية والبلد تقع فكله بيعمل اللى هو عايزه وبعدها لما البلد تقع يبقوا يسيبوها بطياراتهم الخاصة ويروحوا أى بلد أوربى ويسيبوا الشعب يولع بجاز........؛ يووه دول غَلّوه صحيح ...ساعتها هيسيبوا الشعب يولع بقش الرز ( اللى بقاله 7 سنين بيعمل سحابة سودة وماحدش عارف يعمله حاجة)