أنا كنت بنى آدم مصرى فى يوم من الايام وبعدها مصرى بس لما ضاعت الآدمية فى مصر وحالياً ضاعت مصر كمان فبقيت حالياً كنت بنى آدم مصرى
(بس ده كان قبل الثورة)
بعد الثورة أنا فخور إنى مصرى وفرحان جدا ببلدى
لوحظ أنه فى الفترة الماضية بدأ أتباع وأزلام من أهدروا ثروات مصر فى محاولاتهم للنيل من رموز الحملة الشعبية لمنع تصدير الغاز كما لوحظ لجوئهم إلى أساليب رخيصة ، وإننا على ذلك نحذرهم من نفاذ صبرنا عليهم و غضبنا منهم و"عِلمنا بأحوالهم"....نعمنحن نعلم عنكم الكثير ؛ بدء من من الراجل"السفنجة"( هو بيقول نفسه كدة فى وسط معارفه) الذى يبلغكم بأحوالنا أول بأول لايف و بالذات فى المحكمة، و شريكته التى كوفئت بالعمل فى إحدى الشركات ( اللى فيها مرتبات عالية أوى) ونعلم ما الذى دار فى الإجتماع " الموقر" مع اللجنة المهمة والناس اللى قامت تهاجم سيادة ال..... (بالإتفاق مع سيادته طبعاً) وتضيع فى وقت اللجنة وتانى يوم لما أتفتحت لهم الأبواب المغلقة على البحرى لتوفير فرص وخدمات ليهم فى "دائرة" أتباعهم و ونعلم عن مصوريكم :موظفون بـ «البترول» يزعمون أنهم إعلاميون لتغطية «تصدير الغاز» بتكليف من الوزارة
(و دى كانت قرصة ودن بسيطة بس علشان ماحدش فيكم يعيش الدور ويصدق نفسه) ونعلم الكثير والكثير عنكم ولكننا صمتنا عن ذلك ترفُعاَ عن السجال خارج قاعة المحاكم ولكننا نحذركم إذا ما إستمريتم فى تصرفاتكم هذه فإن لدينا من الإجراءات الرادعة لأمثالكم وإن لم تتراجعوا فلدينا مزيد .
يا سادة إحنا مش بنهزر.... دى مصلحة مصر ومش هنسيب حد يضيع حقها هدر
خير اللهم أجعله خير ربنا الهمنى وشفت موقع جريدة اليوم السابع ولقيت شوية التهجيص اللى هم كاتبينه على حزب الإصلاح والتنمية فأستغربت من الكلام الغريب ده ورديت عليه
وبعدين لقيت السيد محمد أنور عصمتوالسيد مصطفى بكرى فى برنامج ال10 مساء ولقيت السيد مصطفى بكرى بيردد نفس المعنى الغريب موحياً للمشاهدين أن محاولة حزب الإصلاح والتنمية إرسال بعثات للولايات المتحدة (للتدريب على العمل السياسى) إنما سينتج عنها عمالةلأمريكا "والصهيونية و...و...." ( شوية كلام كبير مجعلص كدة من بتوع الإتحاد الإشتراكى). وبعدين لقيت جريدة وش الشلن( المأسوف على ريادتها التى ضاعت فى العالم العربى) برضه كاتبة مقال يوم 21\3\2009 من عينة "أن ده تجسس ضد مصر تحت ستار الديموقراطية".
بصراحة أنا مستغرب شوية ، هو ليه السيد مصطفى بكرى مع أنه بيقول أنه ضد الصهيونية و....و...، لم يساند الحملة الشعبية لمنع تصدير الغاز لإسرائيل
دى عينة من الصور مفيهاش أى حد من السادة الافاضل المذكورين أعلاه
ملحوظة هامة: أنا لاأشكك فى وطنية أحد، كلهم ناس أفاضل وعلى العين والراس ...
بس ليه مشاركتهم أقتصرت فقط على الكلام...؟؟؟؟؟؟؟؟
وليه الناس بتتهم السادات أنه ضد مصر ومع الصهيونيةو... و...مع أنه كان المتحدث الرسمى بأسم الحملةوأحد أهم أركانها....؟؟؟؟ ومشاركته كانت بالأفعال وليست بالأقوال!!!!
طب همليه بيهاجموا الحزب مع أن بذرة الحزب خرجت من رحم الحملة الشعبية لمنع تصدير الغاز إلى أسرائيل
الغريب أن السيد مصطفى بكرى كان بيتكلم على أساس أن ده هيفتح باب العمالة و...و... .
طب ليه السيد مصطفى بكرى بيوحى أن البلد سايبة ومافيهاش أجهزة رقابية ولا ضابط ولا رابط....؟؟؟؟؟؟؟؟
مع إحترامى لكلام السيد مصطفى بكرى بس البلد فيها أجهزة تفدى مصر بأرواحها ومصحصحة لدبة النملة....!!!
وبعدين هو مصر لما تبعث مبعوثين للخارجعلى طول هيتحولوا عملاء .... خبط لزق كدة...طب ما إحنا كنا بطلنا نبعث بعثات علميةوخلينا قاعدين فى بلدنا وبالمرة نغلق الجامعة الامريكية والالمانية والإنجليزية كمان (ماهى حماية لمصر من العمالة بقى).
طب ما تيجة نحسبها بالعقل شوية ونسيبنا من الكلام ال..... :
1-طول عمرنا بنشتكى أن مصر مافيهاش كوادر وأن أيام زمانمصر كان فيها الكوادر الفلانية والعلانية و...و... . طب فين الخطأ فى أن إحنا نعمل كوادر جديدة.....؟؟؟؟
2-يجى سؤال طب ليه ندربهم بره مصر ،ما إحنا كنا ندربهم هنا؟؟؟ ماهو لو كان فى مصر فرصة تعليم كويسة كنا أخدنها(ما إحنا كلنا عارفين أحوال السياسة فى مصر).
3-طب يعنى حبكت بره و أشمعنى يعنى أمريكا؟؟؟؟؟أيوة حبكت بره لأن التجربة الحقيقية خير وسيلة للتعلم(وأهو أحسن من الجو الخربان اللى فى مصر...وخلينا ساكتين أحسن).أما عن أشمعنى أمريكا ، فتعالوا نحسبها شوية:
أ-أمريكا بلد قوى وفيها أقوى لوبى أسرائيلى ، وطل عمرنا نشكتى أن اللوبى الإسرائيلى عمل كذا وسوى كذا وخلى أمريكا تطلع فيتوو .. و.... طب أنا ليه ما عملش بذرة لعلاقات مع سياسين أمريكان تكون بذرة للوبى مصرى يخدم مصالح مصر والعرب....؟؟؟؟؟
ب-طب يعنى ما نسيب الحزب الوطنى هو يعمل كدة إشمعنى يعنى بتوع المعارضة، وكمان تحت التأسيس..؟؟؟؟ ماهو الحزب الوطنى لو كان هيعمل حاجة ، ماهو كان عملها من زمان ، دى فيه ناس فى مصر أتولدت وماتت والحزب الوطنى ماسك فى مقاليد الحكم..(ما تخلونا ساكتين وبلاش نقلب المواجع ) ، وأيوة تحت التأسيس وبنشتغل ...هو غلط ولّا غير قانونى ، أيوة بنحب بلدنا وهنشتغل لمصلحتها واللى غيران يشتغل لبلده( بدل ما البلد فى 22 حزب أغلبيتهم ما بيعملوش حاجة)
ج- ما تشوفوا الوضع الداخلى الأول وتصلحوه وبعدين تشوفوا الخارجى. لا ياسيدى الفاضل، إحنا هنتحرك فى الأتجاهين سوياً، ده فكرنا كحزب.
فى النهاية أنا برضه عندى سؤال تانى هو الأخوة الافاضل مصرين أنهم يمنعوا أبناء هذا البلد من التدريب على العمل السياسى الصحيح ؟؟؟؟؟
ما هو يمكنولعل وعسى فى يوم من الأيام نقدر نطلع أوباما المصرى اللى يقود البلد لبر الأمان
لأء لاء لأء....أنا أسف ، ده جريدة وش الشلن أدعت أن الحزب هياخد فلوس من برة....، دى برضه حاجة كوميدية جداً لأن الاجهزة الرقابية فى مصر لا تسمح حتى بالتفكير فى الفكرة دى، وده بالإضافة إلى أن دى مش سياستنا كحزب وياريت اللى عنده وثائق "حقيقية" يطلعهاويواجهنا بيها...!!!!!!
من الأخر كدة الأخوة الأفاضل قصدهم على حزب الإصلاح والتنمية ووكيل المؤسسين محمد أنور عصمت السادات
وعلشان برضه نجيب من الأخر بلاش كلام الناس ال... فى الموالد بتاع :”موسى نبى ،عيسى نبى، محمد نبى وكل من له نبى يصلى عليه.....” ( ده عادة بيكون بداية الكلام).
وبرضه علشان نجيب من الأخر؛ هو البقين دول أو الكلمتين دول ليه طلعوا بعد حكم العبارة ....؟؟؟؟ أنا مش قصدى حاجة لا سمح الله ..،أنا بس بسأل سؤال برىء لوجه الله علشان أهدى النفوس.....!!!!.
وكمان مرة علشان الحبابيب ( بما أن مستوى الحوار بقى مستوى الموالد) برضه نجيب من الأخر ؛ هو لامؤاخذة كدة " بيستعين بالمعهد الأمريكى علشان المعهد هو اللى يختار الكوادر" ...؟؟؟!!! طب يا أخواننا أتقوا الله ولما تيجوا تشنعوا على الراجل شنعوا عليه بحاجة ...مش تبقوا عاملين زى "متأمر و....” (راجع مسرحية محمد صبحى )
لاء والأنقح الجريدة الفاضلة بتدعى أن فيه حد بيعرف يضغط على الحكومة المصرية علشان إنشاء حزب... ها ها ها، هو فى حد فى الدنيا دى يعرف يلوى دراع الحكومة....؟؟؟ هو االناس دى عايشة فى جزائر الواق الواق ولا أيه (طب على الأقل كان عرف يضغط على الحكومة علشان يسترجع عضويته فى المجلس).
الادعاء الأظرف أن الحزب سيكون أداة للأمريكان لينفذ مخططاتهم ضد النظام السياسى فى مصر.
ها ها ها ... هو مين قال أن الأمريكان معادين للنظام السياسى فى مصر، دول هم من بقهم بيقولوا أن النظام السياسى فى مصر من أكبر حلفاء أمريكا فى الشرق الأوسط.
وعموما أنا كمان هاأدωعى أن هذه الصحيفة هى اللى حرضت نيرون على حرق روما من 500 سنة قبل الميلاد "مع الوعد بالإعلان خلال الأيام القليلة القادمة وبعد الحصول على الأوراق الكاملة بالأسماء حال توافرها بين أيدينا”.
ما علينا …. ربنا يبارك فى معدل ذكائهم المرتفع وإدعائتهم الروشة طحن ولو عايزين دورة فى كيفية الفبركة ممكن نبقى نرتب لهم ورشة عمل مع "سرحان ونفيسة" ونخلى المفتش كرومبو يمتحنهم.... .
ثوانى ..ثوانى دول كانوا بيتكلموا على فلوس و أن أمريكا هتدعم الحزب …. والحكومة المصرية هتلاقى الكلام بيحصل وتسكت...؟؟؟!!!
يا حلاووووة ، عليا النعمة الناس اللى كتبت الكلام دماغهم عالية قوى ..قوى ...قوى
وإحنا كل اللى بنعمله أن إحنا نتظاهر شوية والأمن يشد شوية ناس وخلاص ، وحبة وتلاقى التليفيزيون طالع لك ويردد جملة رئيس الجمهورية :”إن الدم الفلسطينيى ليس رخيص( أمال لو كان رخيص كان جرى له أيه..؟؟؟) وفى النهاية برضه بيتم إعدام الأمهات أمام أبناءهم وكمان الإسرائيليين بيمنعوا إنقاذ الجرحى وبيسبوهم يموتوا من إصاباتهم، وبرضه مفيش حد بينقذ .كل اللى قدرنا نعمله شوية صراخ على شوية ولولة على رفع الأشلاء " ومحاولة أنقاذ الجرحى".
يا ناس ...يا عالم بقى صورة الطفلة دى نسكت عليها ...؟؟؟.
الحكومة يا سادة يا أفاضل عاملة ودن من طين و ودن من عجين ولا كأنها هنا ،كل اللى عليها شوية مسكنات مع إعلام موجه على جميع القنوان سواء الحكومية أو الخاصة ( ولو مش مصدق شوف مقال فهمى هويدى: تعليمات الجهات العليا)
نرجع للنقطة المهمة ؛ إن حكومتنا الموقرة مات لها 1038 مواطن مصرى فى ليلة واحدة وما أتهزش لها شعرة ، يعنى متوقعين 800 فلسطينى يحركوها...؟؟؟؟طب بإمارة أيه والنبى...؟؟؟؟
الرأى عندى أننا نحتاج إلى قوانا الشعبية من أجل ممارسة الضغط المدنى على هذه الحكومة التى لاينفع معها إلا الضغط "الشديد"
