The everlasting egyptian problem

شورى شورى شورى....؛كلنا كدة عايزين شورى

امبارح لقيت الخبر العظيم ده فى جورنال المصرى اليوم تقرير أمني: «رزق الله» عضو الشوري المعين بقرار «مبارك» لم يؤد الخدمة العسكري الصراحة بعد ما قريت الخير لقيت شيطانى (لعنة الله عليه هو و وسوسته) بيقوللى :"هو ممدوح إسماعيل بتاع العبارة كان منتخب ولّا معين,,,؟؟؟!!! " . الصراحة سِكِت وما قدردتش اتكلم . وشوية والاقى الشيطان ده (لعنة الله عليه برضه) بيوسوس ويقول :" هو ليه الاجهزة اللى بترفع الاسامى لرئيس الجمهورية مش بتقول للرئيس على هذه النقاط السوداء فى حياة الناس...؟؟؟!!! وليه الاجهزة بتتعمد أختيار ناس كدة ...؟؟؟!!!هُم عايزين يحطوا الريس فى الموقف ده ليه...؟؟؟!!! وبعين هو ليه... وعند الحتة دى لقيت العملية وِسعِت أوى.. اوى.. أوى... قمت قعدت أقرأ المعوذتين وأستعيذ بالله من الشيطان الرجيم (الله يحرقه هيودينى ورا الشمس بالوسوسة السودا دى)

Crimes against humanity 2

من شاكيد.........إلى عتليت

ياقلبى أبكى بدل الدموع دم

عرفت ألاقى نسخة من برنامج سرى للغاية (يذاع على قناة الجزيرة) الحلقتين بتوع الطريق إلى عتليت...؛ والصراحة انا نفسى أبكى بدل الدموع دم وعندى سؤال لأى حد بيقول يعنى هنجيب الناس الكباراللى فى إسرائيل ؛ما هم جابوا سلوبودان ميلوسيفتش و كورت فالدهايم إشمعنى الناس الكبار اللى فى إسرائيل ....؟؟؟؟!!!!ليه يعنى على راسهم ريشة ولا على رجليهم نقش الحنا. ...؟؟؟؟ .

فى أخ اسمه TraxPilot أحب أشكره "مع عدم معرفتى به" على هذه المادة الوثائقية

أنا قسمت البرنامج مقاطع ودى أجزاء منها:

الجزء رقم 1

الجزء رقم2

الجزء رقم 3

الجزء رقم 4

الجزء رقم 5

الجزء رقم 6 وشهد شاهد

الجزء رقم 7بص عملوا ايه كمان فى 56

الجزء رقم 8 اسمع لما قتلوا الاسرى الضباط الاول 67

الجزء رقم 9 أسمع حكاية سحق الاسرى من شاهد شاف كل حاجة

الجزء رقم 10

الجزء رقم11

الجزء رقم 12

الجزء رقم 13

الجزء رقم 14

الجزء رقم 15

الجزء رقم 16

الجزء رقم 17

الجزء رقم 18

الجزء رقم 19

الجزء رقم 20 هل صحيح أن الاسرى المصريين كانوا قطع غيار للإسرائيليين...؟؟؟؟

الجزء رقم 21

الجزء رقم 22

الجزء رقم 23

الجزء رقم 24 طب ماهو كل حاجة جاهزة اهيه

الجزء رقم 25

الجزء رقم 26

شوية الاسامى السابقة للأجزاء من عندى أنا ؛....... معلش

السؤال موجه الآن لأعلى سلطة فى جمهورية مصر العربية "السيد الرئيس" : ما هو رأى سيادتكم فى هذا....؟؟؟ ؛ هل صحيحة هذه الإدعاءات أنكم ستتركون حقوق رجالكم من أبناء الجيش المصرى.... ؟؟؟؟ ومع العلم أن إسرائيل مازالت تطالب بحقوق ضحايا الهولوكوست وتبحث عن رفات رجالها فى كل الحروب ولا تتخلى عنهم أبداَ حتى لو اصبحوا حفنة من تراب...!!!!. فخامة الرئيس شعبك فى أنتظار حقوقهم(على يديك بأذن الله) وليس فى أنتظار نتائج كلام و افكار أدارة الوطنى الحاكمة

Crimes against humanity

أين حقوق هولاء الابطال

ابطال مصر فى حرب 67 حقوقهم فين ...؛ليه ماحدش بيدور عليها ولا حد أحتفل بيهم ولا كرمهم. دى أجزاء من حلقة العاشرة مساء يوم الاربعاء 13/6/2007(البرنامج يذاع على دريم 2)

أنا قطعت أجزاء منه وسامحونى لأنى أديتها اسامى من عندى

1- البداية

2- عملتوا ايه فى الرجالة دول ياظلمة

3- نقص المياه

4- الانهيار (1)

5- الانهيار (2)

6- عاش الابطال

7- ياظلمة ايه اللى عملتوه ده فى رجالتنا(الدرع الواقى لمصر)

8- عاش الرجال

9- ليه ده حصل لخيرة رجالة مصر.....لييييييييييييييييييييييييييييييييه

10- يا سيادة رئيس الجمهورية هل كلام هذه الام الثكلى صحيح

11- هو معقولة القناة المارقة اللى بتكره مصر دى ياريس يطلع كلامهم صح

12- طب والكلام ده كمان ...معقولة تطلع هى دى افعال مصر لأولادها ياريس(معقولة الكلام ده فى عهدك يا سيادة الرئيس

13- فى شهود أهم ياريس

وحيث أن الاخوة فى حكومة الوطنى كالعادة مابيعملوش حاجة للشعغب المصرى يبقى لازم ننادى لكبير البلد فخامة السيد رئيس الجمهورية

ياريس هو الكلام اللى بيقولوه فى القناة المارقة(الجزيرة)ده صح؛هو فعلاَ إسرائيل بتتحدى مصر ياريس ومصرمش قادرة تعمل حاجة(معقولة الكلام ده يحصل وأنت موجود ياريس)

سيادة رئيس الجمهورية

فخامة السيد رئيس جمهورية مصر العربية

تحية طيبة وبعد

بعد مشاهدة برنامج العاشرة مساء(يذاع على قناة دريم 2) ورؤية حلقة يوم الاربعاء 13-6-2007 أود أن أتوجه إليكم بسؤال واحد بوصفكم قائد الطلعة الجوية وبما عُرف عنكم من حماية رجالكم وعدم التخلى عنهم أبداً .ماذا ستفعل سيادتكم تجاه ما الوقائع التى نشرها هذا البرنامج إن دولة إسرائيل تتحدى جمهورية مصر العربية تحدى واضح وصريح ...!!!!.فماذا ستفعلون سيادتكم تجاه ذلك....؟؟؟؟!!!!!.لاأقصد ان أطلب إعلان الحرب على دولة إسرايل ولكن أطالب سيادتكم بإتخاذ جميع الإجراءات القانونية لعقاب هذه الدولة على هذه الجرائم (وهى لاتسقط بالتقادم كما تعلمون سيادتكم). أوليس أى من جنود مصر البواسل يساوى أى فرد ممن تعرضوا لمذابح الهولوكوست على يد النازيين ألا يستحق أى من هولاء الضحايا المصريين أن تعامله مصر كما عاملت إسرائيل أقل فرد من ضحايا الهولوكوست...ألا نتسحق هذا ....؛ألا نستحق حتى أن تتظاهر مصر بذلك... ألا نستحق هذا أيضاً؟؟؟؟؟؟!!!!

طب ألا نستحق حتى ان تنشر وثائق هذه الكارثة تفصيلاً ...؟؟؟

تحية لهذا البطل

No comment

يا عينى عليكى يا مصر .......2

النهاردة كمان جبت جورنال الدستور وكان منشور فيه التفاصيل ؛ الصراحة لوالكلام اللى مكتوب ده حصل و الاخ الضابط قال الكلام ده على الرجل الثاتى فى الدولة يبقى حضرة الضابط ده عايز له واحد من اسكندرية يرد عليه رد اسكندرانى ......!!!!

بقى رئيس مجلس الشعب....؛ رئيس مجلس الشعب يتقال عليه كده؛ يا أخى .... ( يلا مالوش لزوم انزل لمستوى الضابط ده و أقبح له)

إنا لله وإنا إليه راجعون هذه هى بداية النهاية

Yes ..... it is probably time of the apocalypse

يا عينى على مصر............

واللى بيجرى فى مصر

أمبارح السبت اشتريت جورنال الدستور اليومى والاقى كارثة ضباط شرطة سحلوا نائب فى مجلس الشعب ( وجدعنة منى مش هاقول قالوا له ايه لما قالهم "أنه عضو فى المجلس الموقر"

هم ضربوه ليه هم كانوا فاكرينوه سفاح المعادى ولّا سفاح بنى مزار للى لسه محدش قبض عليهم.

طب هو معنى الكلام ده أن ممكن اى عسكرى فى البوليس يضرب أى حد فى مجلس الشعب ؛ يعنى بوضوح أكتر هل من الممكن أن أى حد وِحِشِ و مش كويس يقتدى بأسيادنا فى الشرطة ويقوم يضرب أى حد فى المجلس الموقر (على سبيل المثال السيد زعيم حزب الاغلبية ولّا السيد احمد عز) "وهو ما لا نقبله بالطبع"

وبعدين إذا كان القضاة بينضربوا ومالهومش صاحب وأعضاء مجلس الشعب بينضربوا ومالهومش صاحب والاخوان أمال مين هم أصحاب ستى حكومة بالضبط (الفيل الابيض ولّا الجن الازرق ولّا ايه بالضبط)

طب إذا كانت الحكومة تطالبنى بإحترام القانون ولاتحترمه وتطالبنى بإحترام القضاة ولا تحترمهم (ضرب القاضى محمود حمزة) وتطالب بإحترام أعضاء المجلس الموقر ولا تحترمه....طب يعنى انا كرجل الشارع يعنى اعمل ايه بالضبط....؟؟؟؟؟

ملحوظة الناس أقتدت بالحكومة وأصبحوا يعتدوا على الناس داخل المحكمة (أحداث محاكمة عماد الجلدة) طب دلوقتى هقتدوا بالحكومة برضوا ويروحوا يوقفوا اى حد من المجلس مِغَلى عليهم العيشة ويضربوه ولّا ايه...؟؟؟ "وهو ما لا نقبله بالطبع ايضاَ"

وبالمناسبة يعنى....؛ اخبار سفاح بنى مزار ايه...؟؟؟ ولّا أخبار سفاح المعادى ايه...؟؟؟ محدش شافهم ياولاد ...؟؟؟ طب ايه اخبار التحقيق فى واقعة ضرب القاضى محمود حمزة..؟؟؟؟؟