كلمتين واجعنِّى بخصوص حريق البرلمان
طبعاً كلنا تابعنا حكاية حريق البرلمان إمبارح ، فى ناس زعلت وناس فرحت وناس مفرقش الموضوع معاها و.. و.. بس هو بصفة عامة ردود الفعل تقريباً كانت:
1-أحسن يستاهلوا ( سمعتها بنفسى فى التاكسى النهاردة) والراجل كان قصده على الحكومة
2- هم بيحرقوا الاواراق بتاعة القضايا المهمة علشان يطرمخوا عليها ( واللى قالوا كدة كان يقصدوا قضايا العبارة والمبيدات المسرطنة وبقية المصايب )
3- ايه الخيبة دى البرلمان يقعد يتحرق 7 ساعات ومش عارفين يطَفٌّوه . طب يعنى ده البرلمان ده تانى أهم مكان فى مصر بعد رياسة الجمهورية .أمال لو ناس عادية يبقى حالهم ايه.هو الواحد علشان يعيش عدل فى البلد دى لازم يكون بيشتغل فى الرياسة ولّا ايه.
وفى وسط الكلام ده كله
فى كلمة حق أعتقد إنها لازم تتقال:
1- ده علشان مبنى ( طوب وحديد) وأوراق، البلد كلها وقفت على رِجل وكل شوية السادة المسؤلين بيصرحوا وبيتكلموا،وكل ده وما كانش فى حد مات. أمال وقت حادثة العبّارة ماحصلش الكلام ده ليه....؟ . الف مصرى سيبناهم يموتوا فى عرض البحر. ولا كان فى حد من الاخوة الممسؤلين بيتابع الموقف عن كَثَب ولا كان فى حد من المجلس الموقر موجود بيتابع الموقف أو من مجلس الشورى الموقر برضه. ولا تانى يوم شفنا السادة وزراء المجموعة السيادية فى الوزارة بيزوروا الموقع ، اللهم إلا لجنة تقصى الحقائق اللى راحت سفاجا.
كانوا فين السادة المهمين دول وقت مقتل الف مصرى وزيادة...؟؟؟
2- تانى حاجة هو ليه شهود العيان أجمعوا على سوء إدارة الازمة.و بعدين إحنا ليه نصرف ملايين وملايين على المبنى وفى الاخر ما نعملش نظام إطفاء داخلى. ده ايه الخيبة القوية دى أمال فلوسنا بتروح فين..؟؟؟.ده عادة لما بتحصل حريقة صغيرة فى مبنى؛ نظام الإطفاء الداخلى بيغرق الدنيا مية وبيطفى الحريق فى نفس اللحظة وده بالإضافة إلى أنه مبنى مهم زى البرلمان كان المفروض يكون فيه إجهزة إنذار على أعلى مستوى ( أول ما تحصل مشكلة يتبلغ أعلى الجهات المسؤلة فى البلد) .يعنى هو إحنا دايما كدة ماننجحش غير فى إننا نبقى مهملين وغير متقنين لشغلنا.
طبعاً السادة المسؤلين هيطلعوا يقولوا شوية كلام فارغ من عينة إن كله تمام ومافيش إهمال وكله كان تحت السيطرة وماعلهش أصل ده أضخم حريق فى الكون... بس الحقيقة واضحة وصريحة ومش محتاجة تعليق.
