Please GOD have mercy upon us and uopn those stupid people

اللهم أرحمنا من كلام الموالد …..

وتب علينا إنك أنت التواب

وأنا بتفرج على موقع جريد اليوم السابع لقيت العنوان ده

مؤسس حزب جديد يستعين بجهة أمريكية لهيكلة حزبه

من الأخر كدة الأخوة الأفاضل قصدهم على حزب الإصلاح والتنمية ووكيل المؤسسين محمد أنور عصمت السادات

وعلشان برضه نجيب من الأخر بلاش كلام الناس ال... فى الموالد بتاع :”موسى نبى ،عيسى نبى، محمد نبى وكل من له نبى يصلى عليه.....” ( ده عادة بيكون بداية الكلام).

وبرضه علشان نجيب من الأخر؛ هو البقين دول أو الكلمتين دول ليه طلعوا بعد حكم العبارة ....؟؟؟؟ أنا مش قصدى حاجة لا سمح الله ..،أنا بس بسأل سؤال برىء لوجه الله علشان أهدى النفوس.....!!!!.

وكمان مرة علشان الحبابيب ( بما أن مستوى الحوار بقى مستوى الموالد) برضه نجيب من الأخر ؛ هو لامؤاخذة كدة " بيستعين بالمعهد الأمريكى علشان المعهد هو اللى يختار الكوادر" ...؟؟؟!!! طب يا أخواننا أتقوا الله ولما تيجوا تشنعوا على الراجل شنعوا عليه بحاجة ...مش تبقوا عاملين زى "متأمر و....” (راجع مسرحية محمد صبحى )

لاء والأنقح الجريدة الفاضلة بتدعى أن فيه حد بيعرف يضغط على الحكومة المصرية علشان إنشاء حزب... ها ها ها، هو فى حد فى الدنيا دى يعرف يلوى دراع الحكومة....؟؟؟ هو االناس دى عايشة فى جزائر الواق الواق ولا أيه (طب على الأقل كان عرف يضغط على الحكومة علشان يسترجع عضويته فى المجلس).

الادعاء الأظرف أن الحزب سيكون أداة للأمريكان لينفذ مخططاتهم ضد النظام السياسى فى مصر.

ها ها ها ... هو مين قال أن الأمريكان معادين للنظام السياسى فى مصر، دول هم من بقهم بيقولوا أن النظام السياسى فى مصر من أكبر حلفاء أمريكا فى الشرق الأوسط.

وعموما أنا كمان هاأد^ωعى أن هذه الصحيفة هى اللى حرضت نيرون على حرق روما من 500 سنة قبل الميلاد "مع الوعد بالإعلان خلال الأيام القليلة القادمة وبعد الحصول على الأوراق الكاملة بالأسماء حال توافرها بين أيدينا”.

ما علينا …. ربنا يبارك فى معدل ذكائهم المرتفع وإدعائتهم الروشة طحن ولو عايزين دورة فى كيفية الفبركة ممكن نبقى نرتب لهم ورشة عمل مع "سرحان ونفيسة" ونخلى المفتش كرومبو يمتحنهم.... .

ثوانى ..ثوانى دول كانوا بيتكلموا على فلوس و أن أمريكا هتدعم الحزب …. والحكومة المصرية هتلاقى الكلام بيحصل وتسكت...؟؟؟!!!

يا حلاووووة ، عليا النعمة الناس اللى كتبت الكلام دماغهم عالية قوى ..قوى ...قوى

الفيديو ده أرجو أن كاتب المقال يشوفه قبل ما يفكر ياخد بثأر.......

THE HOLOCAUST IN PALASTINE

أسرائيل تقوم بإعدام الاسرى

طب وإحنا...؟؟ماذا بعد المظاهرات؟؟

دلوقتى الامم المتحدة بتقول أن الإسرائيليين بيعدموا الاسرى الفلسطينيين فى غزة

الامم المتحدة: قوات اسرائيلة جمعت مدنيين في منزل ثم قصفته

وإحنا كل اللى بنعمله أن إحنا نتظاهر شوية والأمن يشد شوية ناس وخلاص ، وحبة وتلاقى التليفيزيون طالع لك ويردد جملة رئيس الجمهورية :”إن الدم الفلسطينيى ليس رخيص( أمال لو كان رخيص كان جرى له أيه..؟؟؟) وفى النهاية برضه بيتم إعدام الأمهات أمام أبناءهم وكمان الإسرائيليين بيمنعوا إنقاذ الجرحى وبيسبوهم يموتوا من إصاباتهم، وبرضه مفيش حد بينقذ .كل اللى قدرنا نعمله شوية صراخ على شوية ولولة على رفع الأشلاء " ومحاولة أنقاذ الجرحى".

يا ناس ...يا عالم بقى صورة الطفلة دى نسكت عليها ...؟؟؟.

الحكومة يا سادة يا أفاضل عاملة ودن من طين و ودن من عجين ولا كأنها هنا ،كل اللى عليها شوية مسكنات مع إعلام موجه على جميع القنوان سواء الحكومية أو الخاصة ( ولو مش مصدق شوف مقال فهمى هويدى: تعليمات الجهات العليا )

نرجع للنقطة المهمة ؛ إن حكومتنا الموقرة مات لها 1038 مواطن مصرى فى ليلة واحدة وما أتهزش لها شعرة ، يعنى متوقعين 800 فلسطينى يحركوها...؟؟؟؟طب بإمارة أيه والنبى...؟؟؟؟

الرأى عندى أننا نحتاج إلى قوانا الشعبية من أجل ممارسة الضغط المدنى على هذه الحكومة التى لاينفع معها إلا الضغط "الشديد"

Our losses are over a Trillion pounds

خسائر صفقة الغاز مع إسرائيل بعد التصحيح....الأول

كنا قد تكلمنا عن فى السابق عن الخسائر المبدئية فى أحدى صفقات الغاز الا وهى صفقة الغاز مع إسرائيل. كان الكلام أن خساير الصفقة 200 مليار

http://o2a.blogspot.com/2008/06/keep-our-gas-3.html

بس الخساير دى هى الخساير المبدئية قبل التصحيح، بمعنى أن إحنا إذا أعتبرنا أن إدعاءات الحكومة بخصوص أحتياطى الغاز صحيحة وأن كلام الخبراء فى الحملة الشعبية خطأ وأن الغاز مش هيخلص كمان كام سنة فيبقى أن إحنا محرومين من الإنتفاع بجزء من حصتنا من الغاز لمدة 20 سنة ، يعنى بالعربى كدة فى حصة من الغاز بتاعنا مش هنقدر "نستثمر" العائد من بيعها بالاسعار العالمية المرتفعة لمدة 20 سنة ( وخد بالك أن الغاز أسعاره بتزيد مع الوقت). طب تعالوا نفترض أن الحكومة ما كانتش عملت الصفقة دى مع إسرائيل( يبقى ما كانش هيضيع 200 مليار وممكن أن إحنا نستثمرهم طوال ال20 سنة دول) أو أنها عملتها بس ماضيعتش ال 200 مليار دول على الشعب و أخدت ال200 مليار دول و أستثمرتهم ….طب بلاش أستثمرتهم ،راحت حطيتهم فى البوسطة لمدة 20 سنة ( فى مقابل حصة الغاز اللى أتباعت و مش هنعرف نستثمر عائدتها لمدة 20 سنة )

يعنى هنقول السؤال بس بطريقة تانية :ماذا لو أن الحكومة لم تهدر ال 200 مليار دول و أستثمرتهم لمدة 20 سنة ….فى البوسطة؟؟؟؟؟؟

يا ترى يا هل ترى ال 200 مليار دول هيبقو ا كام بعد 20 سنة بفائدة 10 %

200مليار بعد أول سنة هيجيبوا 20 مليار يبقى المبلغ أصبح 220 مليار ، يعنى المبلغ فى أخر كل سنة بيقبى حاصل ضرب الأصل فى 1.1

يعنى أول سنة: 200مليار *1.1=220مليار

وتانى سنة 200مليار* 1.1*1.1= 200 مليار * ²(1.1) =242مليار

وتالت سنة 200 مليار *³(1.1)= 200 مليار *1.331=266.2 مليار

طب بعد عشرين سنة:

200 مليار * ²⁰(1.1)= 200 مليار * 6.7275 =1345.5 مليار جنيه

يعنى هل لو ماكنتش الحكومة أهدرت أموالنا فى صفقة الغاز مع إسرائيل ما كانش هيضيع على مصر 1345.5 مليار جنيه …؟؟؟

الكلام ده بعد أول عملية تصحيح للقيمة التقديرة للخسائر المبدئية ( يعنى فى خطوات تصحيحية تانية والخساير ممكن تكون أكتر من كدة)

It's GOOD BYE....

البقاء لله...لقد توفيت(وفاة سياسية) حكومات الوطنى

وكُتِبَت شهادة الوفاة

خلونا نتكلم بطريقة موضوعية شوية ومن غير ضرب ولا شتايم فى الحكومة (لأن الضرب فى الميت حرام).تعالوا نبص كدة على حصيلة اليومين دول فى مصر بصور إجمالية

صور لكارثة الدويقة ( تصوير أحمد الغفارى)

استغاثات عبر الهواتف النقالة من تحت أنقاض جبل المقطم بمصر

مفاجأة: رسالة ماجستير حذرت من انهيار في مساكن الدويقة بالمقطم.. ونسخة منها فى المحافظة منذ 2004

أنباء بارتفاع قتلى الانهيار الصخري بمصر إلى أكثر من 500

مساع في القاهرة لإنقاذ ضحايا الدويقة وسمعة الحكومة

توزيع قمح فاسد ومجهول المصدر علي المخابز لإنتاج خبز مدعم

أسرة "سجين أسيوط" تتهم ضابطًا ومخبرًا بقتله وتتوعد بالثأر

المئات من بدو سيناء يتظاهرون بالشاحنات احتجاجًا على الاعتقالات ويتجهون للاعتصام على الحدود مع إسرائيل

مواصلين احتجاجهم لليوم الثالث.. استمرار إضراب 1500 محام بأسوان احتجاجًا على ضرب أحد زملائهم داخل مركز شرطة أدفو

دى يا أخواننا هى أحوال جمهورية مصر العربية ..انا أسف ..ده اللى ظاهر لينا من كوارث فى جمهورية مصر العربية ، المهم أنه فى وسط كل الهم ده تلاقىى الحكومة مهتمة بأيه...؟؟؟

الأمن المركزي يحاصر ٧ نشطاء نظموا حداداً علي أرواح ضحايا الدويقة

إجراءات أمنية مشددة لمنع قافلة كسر الحصار عن غزة من الوصول إلي رفح اليوم

هذه يا سادة يا أفاضل هى الحقيقة المُرَّة لبلدنا الحبيبة مصر ...نحن أمام بلد تقطعت أوصاله ويتحول أمام أعيننا إلى أشلاء والحكومة مشغولة ب 7 أنفار ولعوا كام شمعة على شوية ناس رايحين يوصلوا دواء للمرضى المحاصرين فى فلسطين.

وعلى فكرة الكلام اللى فوق فى الكام يوم اللى فاتوا و العينة التالية من الكام أسبوع اللى قبلهم

100% زيادة في أسعار أنابيب البوتاجاز في 4 محافظات وأنباء عن اتجاه لزيادة أسعار بنزين 80

وزارة الصحة تؤكد عدم صلاحية مياه الشرب في المحلة الكبرى

ارتفاع أسعار السكر والزيت والأرز والخشب والذهب وتوقعات بزيادة في أسعار اللحوم والدواجن والخضراوت

بعد تضارب التقارير الأمنية حول حريق الشورى .. العادلي يقرر تأمين مبني الرئاسة والداخلية بأجهزة إنذار مبكر واستشعار للحرائق عن بعد

غرفة عمليات بالأمانة العامة لمتابعة الحادث.. حريق بمقر الحزب "الوطني" بأسيوط يلتهم مكاتب قياداته دون خسائر

مشاجرة بالأسلحة النارية والبيضاء والزجاجات بسبب توزيع «البلح» في الدقي

ياسادة يا أفاضل أن بلدنا تغرق أمام أعيننا ولم يعد يجدى الصراخ أن إدارة الحزب الوطنى سيئة ولديها أخطاء ويجب الإصلاح.إن هذه الإدارة قد ماتت(سياسياً) و إنتهت أيامها وللأسف على أشلاء الالاف من ضحايا العبارة و الدويقة وقطر الصعيد و... و... ولقد أصبح السؤال حالياً :

وماذا بعد إدارة الوطنى ، كيف ننقذ البلاد من الهلاك الطارق على الابواب ، كيف ننجو ببلدنا مصر...؟؟؟

إن هذا هو ما يجب أن نبحث عنه الآن

أما بالنسبة للأخوة فى الوطنى ...فشكراً على تدميركم لحاضرنا ومستقبلنا طوال سنوات طويلات مثمرات ( لكم فقط) ونرجو ألّا نلتقى مرة أخرى... لا فى هذه الحياة ولا فى الحياة الآخرة.

على فكرة شكلهم هيشَيِّلوا موضوع الدويقة للوزير السابق إبراهيم سليمان أو على الاقل هينوبه من الحب جانب وشكله الجانب الاكبر (والكلام انا بقوله بعد ما "الأخ تامر فى بيتهم" ما كان بيتكلم وبَيِّن كلام بالمعنى ده )

Once again....FIRE

هو أيه فِرِّة الحرايق اللى جت فى البلد دى

طبعاً كلنا شفنا حريق مجلس الشورى وشفنا "رد فعل الناس " على حريق مجلس الشورى وكمان شفنا أسلوب مكافحة الحريق وحقيقة الأمن الصناعى فى ثانى أهم مبنى فى جمهورية مصر العربية. ذلك المبنى الذى أصدر التشريعات الخاصة بالأمن الصناعى و كل أنواع التشريعات فى البلد.

المهم انه قبل ما الموضوع يبرد نلاقى حريق فى مقر الحزب الوطنى فى أسيوط

غرفة عمليات بالأمانة العامة لمتابعة الحادث.. حريق بمقر الحزب "الوطني" بأسيوط يلتهم مكاتب قياداته دون خسائر

طب يعنى أنا مش فاهم ده موضوع حريق مجلس الشورى لسه مابردش ، المفروض الناس المهملين دول يتلمُّوا شوية مش يسيبوا الدنيا برضه بهذا القدر من السوء وبعدين ماهو أصل مش معقولة برضه بعد كارثة مجلس الشورى يفضل الناس نايمين فى العسل " الأسود " برضه.

الحاجة الوحيدة اللى جات بفايدة فى موضوع مجلس الشورى أنهم هيأمنوا رياسة الجمهورية.........؟؟؟؟؟

بعد تضارب التقارير الأمنية حول حريق الشورى .. العادلي يقرر تأمين مبني الرئاسة والداخلية بأجهزة إنذار مبكر واستشعار للحرائق عن بعد

رحمة الله على أيام كنّا بتشتكى فيها من إن " الدولة" يدها باطشة ، دلوقتى ......... لا تعليق