It is really our fault

العيب علينا إحنا

من فترة وانا عايز اكتب عن حكاوى العمال مع الحكومة.القصة أن فى الفترة الاخيرة حصلت كمية أضرابات ضخمة (فاضل شوية ويبقى كل يوم فى اضراب شكل) والحكومة تتدخل والوزيرة تتدخل ويقولك فى الاخر واضطر الامن إلى التدخل. وبعدين من كام يوم كدة السيد وزير الاستثمار محمد محى الدين اتنشر عن لسانه كلام فى الدستور أنه قال ما معناه انا دلوقتى معاكم بس ماتزودهاش وتخلونى افقد تعاطفى معاكم ولن اسح بزياد المشاكل عن هذا الحد.....!!!! . طب معلش بقى نحسبها كويس: السبد الوزير فى عهده تمت زيادة البنزين 30 % فى حركة واحدة ،ونتج عن ذلك أن القوى الشرائية للجنيه أخفضت إلى 70% أو اكثر؛ يعنى الجنيه قيمته النهاردة زى نص جنيه السنة اللى فاتت فى اليوم دة بالضبط . المهم أن التجار والوسطاء رفعوا الاسعار بدون إعادة تفكير "يعنى بالعربى كدة ماحدش منهم اتأثر بزيادة الاسعار ؛ بس اللى اتأثر واطحن فعلاً هو أى واحد دخله الشهرى ثابت "زى العمال والموظفين مثلاً والطريف أن الحكومة بدلاً من تعويض هولاء الضحايا قامت بإهدار 13 مليار جنيه وذلك وفقاًُ لتقرير الجهاز المركزى للمحاسبات ( الجهاز ده جهاز حكومى ومش هيزر ولا يقول اشاعات) ...!!!! طب ماهو ربنا عرفوه بالعقل :إزاى يتاخد منهم 30% من مرتبهم وتحويشة عمرهم كدة ويسكتوا وبعدين ده فى عهد الوزير ده مش عهد وزير سابق علشان يقول دى مش غلطتى ده نا جاى اصلح اخطاء من سبقونى....!!!،وبعدين هو كل ما الدنيا تعك منهم يدخلوا الامن فى الموضوع :ثأر يدخلوا فيه الامن، مشاكل فى قلعة الكبش بعد ما اتهدت يدخلوا فيها الامن ، اهالى العبارة الغاضبين يدخلوا معاهم الامن...!!!، طب هو الاجهزة المعنية فى الاساس ( بتوع المحليات على سبيل المثال ) اللى فى الحكومة بتاخد مرتب على اى اساس الجدعنة يعنى مثلاً ولّا الاُخوّة ولّا ايه بالضبط....؟؟؟؟؟؟

نيجى للنقطة التانية وهى حكاية أن فيه وزير مفوض مصرى أنضرب فى الكويت من حوالى 40 يوم ولاحد عمل اى حاجة عِدلة توحد الله علشان يرجع حقه.القصة أن فى أحد حراس حد كويتى قام بضربه مع علم الحارس الكامل بشخصية الدبلوماسى المصرى. المهم أن ماحدش اتحرك لحد ما الموضوع اثير فى مجلس او لما اثير فى قناة المحور(انا مش فاكر بالضبط سبب إثارة الموضوع) المهم أن امبارح السيد مصطى الفقى أتكلم فى برنامج 90 دقيقة وبصراحة هذا الرجل فقد رصيده فى الشارع المصرى بسبب قصة الانتخابات وحديثه فى البرنامج كمل على بقية رصيده ده إذا كان فيه بقية" واللى قاله معروف مسبقاً كلام من عينة" مصر الاخت الكبرى للدول العربية العلاقات ووقفنا معاهم ووقفوا معنا " والصراحة انا مش فاهم ايه معنى الاخوة وهل علشان نبقى اخوات لازم دبلوماسيينا يهانوا فى بلد ويُقتلوا فى الاخرى..!!!!!!!!!.

نيجى بقى للنقطة التالتة ؛ اليومين دول لقيت فيه كلام كثير عن مدونة فى اسكنرية تم غلق مدونتها وبغض النظر عن اللى هى قالته فى حق الرئيس الليبى وهل يصح أم لا؛ المهم هو أنه تم استدعائها فى مقر أمن الدولة(ووبرضه بغض النظر عن ما إذا كانوا متعاونين ومساندين لها أم لا)وتم فى النهاية غلق هذه المدونة.لقد كان الكلام سابقاً كثيراًعن حرية الرأى وحرية الصحافة التى وصلت فى حدود كثيرة خارج النطاق المقبول ولكن هذه الواقعة تنفى كل مايقال عن حرية الصحافة وتكشف أن الواقع هو مجرد ديكور خارجى فقط حتى يكون هناك شكلاً خادعاً عن حرية إبداء الرأى. المهم أن الحكومةالمصرية قامت بغلق هذه المدونة من اجل مجرد كلام كتب عن الانترنت ولكن عندما يُضرب احد الدبلوماسيين او يُقتل فالحكومة "بتعمل ودن من طين و ودن من عجين " كما يقول المثل الشعبى و للعلم هذا الكلام جارى على الكل "يعنى اى حد بيشتغل فى الحكومة لو مالوش ضهر حقه بيروح هَدَر"

بالنسبة للرد على السؤال السابق بتاع إزدراء الاديان الاجابة هنا (انا اقصد قصة رفع الحصانة عن نائبى البرلمان وخد بالك أن فيه كلام ما معناه أن قبلها بكام يوم السيد رئيس مجلس الشعب قال ان مفيش تلبس ولاحاجة و الكلام ده فشنك).

كل الناس دلوقتى بتقول الفساد.. الفساد...،اخطاء الحكومة.. أخطاء الحكومة...، اسمحوا لى اختلف معاكم كلكم العيب علينا إحنا أن إحنا سيبنا الحكومة تتصرف وكأنها ستنا وتاج راسنا وكتر خير الدنيا أنها مرة فكرت فينا. لاء .... ،موظفى الحكومة دول فى منصب الخدمة العامة يعنى يخدمونا احنا افراد الشعب المصرى ولازم نحاسبهم على اى خطأ يرتكبوه ولازم نخلى الحكومةتعمل الف حساب لأى واحد مصرى

ماتسبش حقك .....

حاسب حكومتك....

انت سيد هذا البلد

كل من فى مناصب الخدمة العامة يعملون لخدمتك