Our losses are over a Trillion pounds

خسائر صفقة الغاز مع إسرائيل بعد التصحيح....الأول

كنا قد تكلمنا عن فى السابق عن الخسائر المبدئية فى أحدى صفقات الغاز الا وهى صفقة الغاز مع إسرائيل. كان الكلام أن خساير الصفقة 200 مليار

http://o2a.blogspot.com/2008/06/keep-our-gas-3.html

بس الخساير دى هى الخساير المبدئية قبل التصحيح، بمعنى أن إحنا إذا أعتبرنا أن إدعاءات الحكومة بخصوص أحتياطى الغاز صحيحة وأن كلام الخبراء فى الحملة الشعبية خطأ وأن الغاز مش هيخلص كمان كام سنة فيبقى أن إحنا محرومين من الإنتفاع بجزء من حصتنا من الغاز لمدة 20 سنة ، يعنى بالعربى كدة فى حصة من الغاز بتاعنا مش هنقدر "نستثمر" العائد من بيعها بالاسعار العالمية المرتفعة لمدة 20 سنة ( وخد بالك أن الغاز أسعاره بتزيد مع الوقت). طب تعالوا نفترض أن الحكومة ما كانتش عملت الصفقة دى مع إسرائيل( يبقى ما كانش هيضيع 200 مليار وممكن أن إحنا نستثمرهم طوال ال20 سنة دول) أو أنها عملتها بس ماضيعتش ال 200 مليار دول على الشعب و أخدت ال200 مليار دول و أستثمرتهم ….طب بلاش أستثمرتهم ،راحت حطيتهم فى البوسطة لمدة 20 سنة ( فى مقابل حصة الغاز اللى أتباعت و مش هنعرف نستثمر عائدتها لمدة 20 سنة )

يعنى هنقول السؤال بس بطريقة تانية :ماذا لو أن الحكومة لم تهدر ال 200 مليار دول و أستثمرتهم لمدة 20 سنة ….فى البوسطة؟؟؟؟؟؟

يا ترى يا هل ترى ال 200 مليار دول هيبقو ا كام بعد 20 سنة بفائدة 10 %

200مليار بعد أول سنة هيجيبوا 20 مليار يبقى المبلغ أصبح 220 مليار ، يعنى المبلغ فى أخر كل سنة بيقبى حاصل ضرب الأصل فى 1.1

يعنى أول سنة: 200مليار *1.1=220مليار

وتانى سنة 200مليار* 1.1*1.1= 200 مليار * ²(1.1) =242مليار

وتالت سنة 200 مليار *³(1.1)= 200 مليار *1.331=266.2 مليار

طب بعد عشرين سنة:

200 مليار * ²⁰(1.1)= 200 مليار * 6.7275 =1345.5 مليار جنيه

يعنى هل لو ماكنتش الحكومة أهدرت أموالنا فى صفقة الغاز مع إسرائيل ما كانش هيضيع على مصر 1345.5 مليار جنيه …؟؟؟

الكلام ده بعد أول عملية تصحيح للقيمة التقديرة للخسائر المبدئية ( يعنى فى خطوات تصحيحية تانية والخساير ممكن تكون أكتر من كدة)

It's GOOD BYE....

البقاء لله...لقد توفيت(وفاة سياسية) حكومات الوطنى

وكُتِبَت شهادة الوفاة

خلونا نتكلم بطريقة موضوعية شوية ومن غير ضرب ولا شتايم فى الحكومة (لأن الضرب فى الميت حرام).تعالوا نبص كدة على حصيلة اليومين دول فى مصر بصور إجمالية

صور لكارثة الدويقة ( تصوير أحمد الغفارى)

استغاثات عبر الهواتف النقالة من تحت أنقاض جبل المقطم بمصر

مفاجأة: رسالة ماجستير حذرت من انهيار في مساكن الدويقة بالمقطم.. ونسخة منها فى المحافظة منذ 2004

أنباء بارتفاع قتلى الانهيار الصخري بمصر إلى أكثر من 500

مساع في القاهرة لإنقاذ ضحايا الدويقة وسمعة الحكومة

توزيع قمح فاسد ومجهول المصدر علي المخابز لإنتاج خبز مدعم

أسرة "سجين أسيوط" تتهم ضابطًا ومخبرًا بقتله وتتوعد بالثأر

المئات من بدو سيناء يتظاهرون بالشاحنات احتجاجًا على الاعتقالات ويتجهون للاعتصام على الحدود مع إسرائيل

مواصلين احتجاجهم لليوم الثالث.. استمرار إضراب 1500 محام بأسوان احتجاجًا على ضرب أحد زملائهم داخل مركز شرطة أدفو

دى يا أخواننا هى أحوال جمهورية مصر العربية ..انا أسف ..ده اللى ظاهر لينا من كوارث فى جمهورية مصر العربية ، المهم أنه فى وسط كل الهم ده تلاقىى الحكومة مهتمة بأيه...؟؟؟

الأمن المركزي يحاصر ٧ نشطاء نظموا حداداً علي أرواح ضحايا الدويقة

إجراءات أمنية مشددة لمنع قافلة كسر الحصار عن غزة من الوصول إلي رفح اليوم

هذه يا سادة يا أفاضل هى الحقيقة المُرَّة لبلدنا الحبيبة مصر ...نحن أمام بلد تقطعت أوصاله ويتحول أمام أعيننا إلى أشلاء والحكومة مشغولة ب 7 أنفار ولعوا كام شمعة على شوية ناس رايحين يوصلوا دواء للمرضى المحاصرين فى فلسطين.

وعلى فكرة الكلام اللى فوق فى الكام يوم اللى فاتوا و العينة التالية من الكام أسبوع اللى قبلهم

100% زيادة في أسعار أنابيب البوتاجاز في 4 محافظات وأنباء عن اتجاه لزيادة أسعار بنزين 80

وزارة الصحة تؤكد عدم صلاحية مياه الشرب في المحلة الكبرى

ارتفاع أسعار السكر والزيت والأرز والخشب والذهب وتوقعات بزيادة في أسعار اللحوم والدواجن والخضراوت

بعد تضارب التقارير الأمنية حول حريق الشورى .. العادلي يقرر تأمين مبني الرئاسة والداخلية بأجهزة إنذار مبكر واستشعار للحرائق عن بعد

غرفة عمليات بالأمانة العامة لمتابعة الحادث.. حريق بمقر الحزب "الوطني" بأسيوط يلتهم مكاتب قياداته دون خسائر

مشاجرة بالأسلحة النارية والبيضاء والزجاجات بسبب توزيع «البلح» في الدقي

ياسادة يا أفاضل أن بلدنا تغرق أمام أعيننا ولم يعد يجدى الصراخ أن إدارة الحزب الوطنى سيئة ولديها أخطاء ويجب الإصلاح.إن هذه الإدارة قد ماتت(سياسياً) و إنتهت أيامها وللأسف على أشلاء الالاف من ضحايا العبارة و الدويقة وقطر الصعيد و... و... ولقد أصبح السؤال حالياً :

وماذا بعد إدارة الوطنى ، كيف ننقذ البلاد من الهلاك الطارق على الابواب ، كيف ننجو ببلدنا مصر...؟؟؟

إن هذا هو ما يجب أن نبحث عنه الآن

أما بالنسبة للأخوة فى الوطنى ...فشكراً على تدميركم لحاضرنا ومستقبلنا طوال سنوات طويلات مثمرات ( لكم فقط) ونرجو ألّا نلتقى مرة أخرى... لا فى هذه الحياة ولا فى الحياة الآخرة.

على فكرة شكلهم هيشَيِّلوا موضوع الدويقة للوزير السابق إبراهيم سليمان أو على الاقل هينوبه من الحب جانب وشكله الجانب الاكبر (والكلام انا بقوله بعد ما "الأخ تامر فى بيتهم" ما كان بيتكلم وبَيِّن كلام بالمعنى ده )

Once again....FIRE

هو أيه فِرِّة الحرايق اللى جت فى البلد دى

طبعاً كلنا شفنا حريق مجلس الشورى وشفنا "رد فعل الناس " على حريق مجلس الشورى وكمان شفنا أسلوب مكافحة الحريق وحقيقة الأمن الصناعى فى ثانى أهم مبنى فى جمهورية مصر العربية. ذلك المبنى الذى أصدر التشريعات الخاصة بالأمن الصناعى و كل أنواع التشريعات فى البلد.

المهم انه قبل ما الموضوع يبرد نلاقى حريق فى مقر الحزب الوطنى فى أسيوط

غرفة عمليات بالأمانة العامة لمتابعة الحادث.. حريق بمقر الحزب "الوطني" بأسيوط يلتهم مكاتب قياداته دون خسائر

طب يعنى أنا مش فاهم ده موضوع حريق مجلس الشورى لسه مابردش ، المفروض الناس المهملين دول يتلمُّوا شوية مش يسيبوا الدنيا برضه بهذا القدر من السوء وبعدين ماهو أصل مش معقولة برضه بعد كارثة مجلس الشورى يفضل الناس نايمين فى العسل " الأسود " برضه.

الحاجة الوحيدة اللى جات بفايدة فى موضوع مجلس الشورى أنهم هيأمنوا رياسة الجمهورية.........؟؟؟؟؟

بعد تضارب التقارير الأمنية حول حريق الشورى .. العادلي يقرر تأمين مبني الرئاسة والداخلية بأجهزة إنذار مبكر واستشعار للحرائق عن بعد

رحمة الله على أيام كنّا بتشتكى فيها من إن " الدولة" يدها باطشة ، دلوقتى ......... لا تعليق

THIS IS OUR FIRST WARNING

أيها المهدرون لثروات مصر ...نحن قادمون

سيُستأنف فى يوم الاثنين 1 سبتمبر 2008 جلسة المحاكمة لمن أهدروا ثروات مصر ورقم الدعوى هو : الدعوى رقم 33418 س 62 وتُعقد فى محكمة القضاء الإدارى فى مجلس الدولة. ونحن إذ نحذر من اهدروا ثروات مصر من التمادى فى غِيهم حيث أننا لن نتركهم أبداً ونُعلمهم أنهم إذا لم يعملوا ما فى صالح البلاد فإننا سنتخذ كافة الخطوات اللازمة لإرجاع حقوقنا ومحاسبتهم أشد الحساب على ما اهدروا من ثروة مصر ونحيطهم علماً أننا نراقب كافة خطواتهم ولدينا من الانباء المتواترة ما يجعلنا نحذرهم من عقد أى صفقة ضارة بالمجتمع والأمن القومى.

هذا هو الإنذار الأول أيها المخربون

Our Parlimant is on fire...update

حريق البرلمان ....كلاكيت تانى مرة

فى البداية أحب أعبر عن إحترامى لكل أعضاء البرلمان (سواء أعضاء مجلس الشعب أو الشورى).

بعد قليل من التفكير فى حريق البرلمان فى حاجة غريبة لقيتها.الناس اللى هَرونا وطلعوا عنيننا بقوانينهم، فشلوا فى تطبيق أبسط ما فرضوه علينامن إشتراطات وقوانين و منهاعلى سبيل المثال الأمن صناعى( طبعاً فى واحد إبن حلال هيقول إن البرلمان مش جهة تنفيذ، وأنا برد عليه من أولها و أقول البرلمان اللى مش عارف يتأكد من تنفيذ قوانينه حتى على مبناه يبقى مالوش لازمة ) ، ده غير فشل الحكومة اللى ( اللى المفروض إنهم يحاسبوها ) فى إ`طفاء حريق إستمر 16 ساعة تقريباً كان من الممكن تداركه فى اللحظات الأولى بقليل من التدريب والتخطيط، ...أنا أسف ...مش قليل من التدريب والتخطيط بل بتنفيذ ما إفترضه البرلمان علينا من إشتراطات وقوانين.من الواضح أن الحكومة الموقرة والبرلمان ا( المنوط به محاسبتها) قد فشلا حتى فى حماية ثانى أهم مبنى فى جمهورية مصر العربية . هل ننتظر إلى أن أن يشب حريق يأتى على البد كلها أو هل ننتظر أن يشب حريق فى مبنى رئاسة الجمهورية حتى نأخذ موقف حاسم من هولاء الذين فشلوا فى كل شىء حتى تنفيذ بعض من الإشتراطات البسيطة التى فرضوها هم بأنفسهم....؟؟؟؟

الرأى عندى أن يتم حل البرلمان وعمل إنتخابانت جديدة نزيهة تأتى بأشخاص على مستوى المسؤلية (البرلمان حالياً به العديد من الاشخاص الذين هم على أعلى مستوى من المسؤلية ولكنهم للأسف أقلية) ، وبعدها نأتى بحكومة جديدة تكون على مستوى المسؤلية فى حماية البلد بدلاً من الحكومة الحالية التى أثبتت فشلها حتى فى تأمين نفسها ببعض الإشتراطات "البسيطة".

Our Parlimant is on fire

كلمتين واجعنِّى بخصوص حريق البرلمان

طبعاً كلنا تابعنا حكاية حريق البرلمان إمبارح ، فى ناس زعلت وناس فرحت وناس مفرقش الموضوع معاها و.. و.. بس هو بصفة عامة ردود الفعل تقريباً كانت:

1-أحسن يستاهلوا ( سمعتها بنفسى فى التاكسى النهاردة) والراجل كان قصده على الحكومة

2- هم بيحرقوا الاواراق بتاعة القضايا المهمة علشان يطرمخوا عليها ( واللى قالوا كدة كان يقصدوا قضايا العبارة والمبيدات المسرطنة وبقية المصايب )

3- ايه الخيبة دى البرلمان يقعد يتحرق 7 ساعات ومش عارفين يطَفٌّوه . طب يعنى ده البرلمان ده تانى أهم مكان فى مصر بعد رياسة الجمهورية .أمال لو ناس عادية يبقى حالهم ايه.هو الواحد علشان يعيش عدل فى البلد دى لازم يكون بيشتغل فى الرياسة ولّا ايه.

وفى وسط الكلام ده كله

فى كلمة حق أعتقد إنها لازم تتقال:

1- ده علشان مبنى ( طوب وحديد) وأوراق، البلد كلها وقفت على رِجل وكل شوية السادة المسؤلين بيصرحوا وبيتكلموا،وكل ده وما كانش فى حد مات. أمال وقت حادثة العبّارة ماحصلش الكلام ده ليه....؟ . الف مصرى سيبناهم يموتوا فى عرض البحر. ولا كان فى حد من الاخوة الممسؤلين بيتابع الموقف عن كَثَب ولا كان فى حد من المجلس الموقر موجود بيتابع الموقف أو من مجلس الشورى الموقر برضه. ولا تانى يوم شفنا السادة وزراء المجموعة السيادية فى الوزارة بيزوروا الموقع ، اللهم إلا لجنة تقصى الحقائق اللى راحت سفاجا.

كانوا فين السادة المهمين دول وقت مقتل الف مصرى وزيادة...؟؟؟

2- تانى حاجة هو ليه شهود العيان أجمعوا على سوء إدارة الازمة.و بعدين إحنا ليه نصرف ملايين وملايين على المبنى وفى الاخر ما نعملش نظام إطفاء داخلى. ده ايه الخيبة القوية دى أمال فلوسنا بتروح فين..؟؟؟.ده عادة لما بتحصل حريقة صغيرة فى مبنى؛ نظام الإطفاء الداخلى بيغرق الدنيا مية وبيطفى الحريق فى نفس اللحظة وده بالإضافة إلى أنه مبنى مهم زى البرلمان كان المفروض يكون فيه إجهزة إنذار على أعلى مستوى ( أول ما تحصل مشكلة يتبلغ أعلى الجهات المسؤلة فى البلد) .يعنى هو إحنا دايما كدة ماننجحش غير فى إننا نبقى مهملين وغير متقنين لشغلنا.

طبعاً السادة المسؤلين هيطلعوا يقولوا شوية كلام فارغ من عينة إن كله تمام ومافيش إهمال وكله كان تحت السيطرة وماعلهش أصل ده أضخم حريق فى الكون... بس الحقيقة واضحة وصريحة ومش محتاجة تعليق.

We are to blame also

كارثة العبّارة...

إنما هى من أعمالنا وسلطت علينا

أيوة دى حقيقة لازم نعترف بيها كلنا إن إحنا كلنا ممدوح إسماعيل أو ساعدناه بطريقة أو بأخرى هو أو أمثاله. كل واحد فينا شايف مقدمات تودى إلى نفس كارثة العبارة واللى ساكت والللى مكبَّر دماغه واللى مشغول واللى ..واللى.. إلى أخره. بس فى النهاية لازم نكون صرحاء مع نفسنا ، كل واحد بطريقة أو بأخرى شارك فى صدور حكم البراءة بسلبيته الشديدة، وسلبيتنا الشديدة لسه برضه موجودة بعد ما الحكم صدر كمان . زى ما واحد صاحبى قالى: كل ٌ يغنى على ليلاه وماحدش واخد باله إن كلنا بتغرق بمعنى إن كل واحد ماشى بنظام ”أنا ومن بعدى الطوفان " ، "أياكش البلد تولع ....هى كانت بتاعتنا"، والنتيجة النهائية للكلام ده هى إهدار دماء أكتر من الف مصرى فطيس.. (ده غير المخطوفين اللى لسه ماحدش عارف جرى لهم ايه) وعلى فكرة دول أكتر من تعداد ضحايا حرب 56 ، اللى مصر كانت بتواجه فيها 3 دول .

أنا أتذكر إن فى حديث عن الرسول (صلعم) ما معناه: “إنما أهلك الذين من قبلكم ،أنه إذا سرق فيهم القوى تركوه وإذا سرق فيهم الضعيف أخذوا على يده"، إحنا دلوقتى إتطورنا ؛بقى اللى يقتل أكتر من الف مصرى بيتحاكم جُنَح و بيطلع براءة واللى بيدبح جملين جربانين (بتوع جنينة الحيوانات ) بيتحاكم جنايات و بيأخد سبع سنين سجن يعنى كل مصرى مننا ميحصلش حتى فخذة جمل.

بأذن الله تعالى وعن قريب طبعاً هيعم علينا جميعاً الهلاك العظيم بسبب دماء هولاء الضحايا اللى راحت هدر وحتى مع وجود الطيبين الكويسين (وده لأنهم ماصلحوش بلدهم وتكاسلوا).

Where is our beloved GOV

واحد ..أتنين ....الحكومة راحت فين

(مع الإعتذار للشاعر)

هى الحكومة راحت فين بالضبط...؟؟؟ كل شوية نلاقى مصيبة شكل ،نقوم ندور على الحكومة القوية ذات اليد الباطشة مانلاقيهاش، أشى الكلافين فى الفيوم على حوادث حلمية الزيتون و أخيراً ( وللأسف ليس أخراً) مسلحون يطلقون الرصاص على حافلة بسيناء واصابة اثنين أحدهما رضيع .طب يعنى هى الحكومة الساحقة الماحقة سايبة الناس قاعدة بتموت فى كل حتة فى البلد وراحتت تتشطر على شوية شباب وطنيين بيحبوا مصر طب يعنى أنا مش فاهم الحكومة ذات القبضة الحديدة المرعبة اللى بتقول :”اللى خايف من التعديلات الدستورية(بتاعة التنصت) مايعملش حاجة غلط" ما أخدتش بالها أن فى كارثة زى دى بتحصل تحت عينيها. خد بالك إن الحكومة اللى بتتنصت عليك فى بيتكوا ما أخدتش بالها إن الاخ المجرم بيجيب ناس"بالتليفون " ومعاهم سلاح ..معاهم أيه يا معلم ...سلاااح علشان يضرب نار على الاوتوبيس ،ولّا هى عينين الدولة مفتحة بس على الناس اللى بيحبوا مصر أما اللى بيرتكبوا المصايب فما حدش عارف يجيبهم ؛ وعلشان يبقى الكلام واضح ؛ فين مرتكب مذبحة بنى مزار الحقيقى...؟؟؟؟؟فين مرتكب مذبحة حلمية الزيتون...؟؟؟؟ فين مرتكب المذبحة الاخيرة فين مرتكبىّ الجرائم دى ..كلتهم القطة يعنى ولّا اللهو الخفى هو سبب المصايب دى ولّا يعنى لازم علشان يتقبض على المجرم يكون مسجل الاول وله ملف ،أما لومالوش ملف فده مش من إختصاص الحكومة ويبقى الضحايا ليهم رب اسمه الكريم.

عندى كلمة أخيرة :

المفروض إن الحكومة مع كل السلطات المرعبة اللى بتخليها ترقب الناس فى بيوتهم تكون قادرة على منع الجرائم وقت التخطيط لإرتكابها مش إن الجريمة تحصل والناس تموت وكمان الحكومة ما تعرفش الجانى (أهو ضحايا بنى مزار والحلمية يشهدوا) وبعدين ماهى الحكومة لما مسكت شباب 6 أبريل إتهمتهم بأن التحريات بتقول كيت وكيت وكيت يبقى المفروض زى ما الحكومة بتتحرى عن الوطنيين ليل نهار المفروض إنها تتحرى عن مرتكبى المذابح ليل نهار .

Reply to Dar Eleftaa regrading Gas exportation to Israel

الرد على فضيلة المفتى ودار الإفتاء

فيما يخص تصدير الغاز لإسرائيل

النهارده (21يوليو 2008)فى صحيفة الدستور فى خبر بيقول: أصدرت دار الإفتاء بياناً قالت فيه:”دار الإفتاء في بيان لها: العاملون فى تصدير الغاز لإسرائيل ليسوا عصاة.. ولا نمتلك الخبرة الفنية لاستجلاء الحكم الشرعي فى تصديره "

طب نقول الكلام بطريقة تانية ونوجه السؤال بطريقة تانية:

ما رأى الدين فى أمة لا يجد فيها مواطنوها رغيف العيش وولاة الامر تَحَججوا بأن الاسعار العالمية مرتفعة للغاية وليس لديهم المال اللازم وأصبح الناس يقتل بعضهم البعض (والكلام ده حرفياً بيحصل) من أجل الأسبقية فى طابور العيش( يعنى مين يقف فى أول الطابور) وأعقب ولاة الامر ذلك بأن قاموا برفع أسعار المحروقات ( يعنى بنزين وسولار وكله) وذلك بدعوى أنهم يحتاجون إلى 40 مليار جنيه لدفع رواتب للناس ( قصدى العلاوة) وذلك فى حين أن ولاة الامر أهدروا 200 مليار جنيه من أموال الموطنين دعماً لدولة ظالمة تقتل الابرياء لدواعى التسلية ، هل هذا حلال يا سيادة المفتى ...؟؟؟هل هذا حلال يا أيها السادة يا أهل الإفتاء ...؟؟؟.

ملحوظة هامة:

يوجد من الاساتذة فى قسم هندسة البترول من يعلم عن الموضوع حق اليقين ولا يخشى فى الله لومة لائم ولو دار الإفتاء بتقتنع بس بالإخوة الأزهريين فبرضه فى عندها ناس أفاضل كتير فى قسم هندسة البترول فى جامعة الازهر يعلموا عن الموضوع حق اليقين ولو مش عارفين مين، ممكن نجيب لهم أساميهم...!!!!

Our dear Ministry of Education

هى دى وزارة التعليم.....يا عبلة

الليلة دى فى برنامج 90 دقيقة لقيت أنهم جايبين البنت اللى كشفت واقعة الغش وبيقولوا إن وزارة التعليم لغيت امتحانها و ضيعت السنة عليها.

فالصراحة الموضوع واضح وصريح ؛ هل وزارة التربية والتعليم بتربى النشء على انهم يسكتوا عن الفساد وما حدش يفتح بقُه وبتعلمهم أنه:” غِش تنجح ولو فتحت بقك تروح ورا الشمس”.. ؟؟؟ يعنى انا مش قادر أفهم تعليم أيه وهباب ايه اللى إحنا بنقول عليه يعنى مش كفاية أنهم بيسربوا الإمتحان والإمتحان كان بيتباع فى الشارع وبيتعمل قراطيس لب وسودانى والسيد الوزير طلع فى منتهى البشاشة مع الاخ اللى فى بيتهم ولا كأن كارثة قومية حصلت ولا حاجة، لاء وكمان بيضيعوا مستقبل طالبة بتتحدى ظلم وإفتراء الفساد فى الحكومة...طالبة واحدة فى مواجهة فساد الحكومة .

البنت بسبب الموقف ده بقيت بتقول إنها لو شافت فساد بعد كدة لا هتعمل حاجة وهتغمض عينيها حرصاً على مستقبلها

إتقوا الله ...فى نشء ومستقبل مصر

والاخ المستشار الصحفى طلع بيقول إنها عملت عمايل جامدة( وماحددش ايه هى العمايل الجامدة) وأن اللجنة ما كانش فيها غش مع ان البنت التانية باين معاها الموبايل فى أيدها الشمال و بتتكلم فيه.. يعنى هو الاخ المستشار الصحفى كان عايز تسجيل صوت وصورة..؟؟؟

أنا مش هتكلم وأعلق على المستشار الصحفى وكلامه علشان ما أقولش كلام يعاقب عليه القانون

الاخ المستشار الصحفى كمان قال:” أن مفيش تسيب ومافيش غش ...( ألله ينتقم منك يا شيخ) وأن مفيش تَسَيب وأصر والح ،والح و أصر، ....لدرجة إن الأخ معتز الدمرداش كان فاضل شوية ويطلع من هدومه وشوية والأخ المستشار الصحفى إتهم المعتز المرداش أنه راجل مش تمام وانه هيفتعل مكالمات غاضبة تيجى للبرنامج

أنا برضه مش هتكلم وأعلق على المستشار الصحفى وكلامه علشان ما أقولش كلام يعاقب عليه القانون

الرد على نبيل شرف الدين فى دفاعه عن مهدرى الغاز

وماله ياسيدى... إحنا الهتيفة

خير اللهم أجعله خير كدة سمعت عن صحفى أسمه نبيل شرف الدين كتب مقالة يدافع عن الاخوة اللى أهدرو الغاز و تحديداً عن السيد حسين سالم (الدستور:محنة حسين سالم.. حين تستنسر الغربان علي الصقور) ومهاجماً من يعملون فى الحملة الشعبية لتصدير الغاز و واصفاً إياهم "بالهتيفة"، وماله ياسيد نبيل شرف الدين.... إحنا الهتيفة ..إحنا الحنجوريين وأنتوا الناس الكويسين، إحنا يا سيدى الفاضل أسوء ناس و أنت ومن تدافع عنهم أحسن وأجدع ناس، و لكننا ياسيد نبيل لم نضيع على بلدنا مصر 200 مليار ولم نكن همزة وصل فى ضياعهم أيضاً ( ودى أقل قيمة للخسائر) وإذا كان من تدافع عنهم سيادتك خدموا مصر فكل واحد فى مصر بيخدم مصر وكلنا فى خدمة الوطن لأن كلنا بتشتغل كتروس الساعة ولو فى ترس واحد عطل قد يؤدى ذلك إلى عواقب وخيمةعلى الساعة كلها؛ ومش معنى أن فى حد خدم مصر أنه بعد كدة يكون له علاقة بصفقة تضيع مستقبل مصر والاجيال القادمة فى مصر.

أما عن وصفك بالرويبضة فنحن شاكرين أفضالك وكرم سيادتك فى إستخدام المفردات الحوارية والإهانات، ونسأل سيادتك إذا كان لدينا من الخبراء من يقول إنه تم إهدار ثروة مصر ولدينا من العلم والتكنولوجيا ما مكننا ان نعرف كأفراد عاديين ما حدث من إهدار لثروتنا(وذلك على الرغم من التعتيم الرسمى وعدم عرض الموضوع على مجلس الشعب إلا بعد الضغط الشعبى) فعن أى رويبضة تتحدث...؟؟؟.

أما كلامك عن أننا مبتلون بأمراض التنظيمات السرية و.... و.... فربنا يعافيك مما إبتلانا يا سيدى الفاضل ولو لا قدر الله جالك العدوى من واحد مننا ممكن تاخد قرص أنتشى بيوتشيك ( أنتى بيوتك = مضاد حيوى ) .

أما عن عن إحتياج جهاز الامن القومى للرقابة عليه وهل جهاز فى مثل وطنيته يحتاج للرقابة فأنا أحب أسأل حضرتك امال مجلس الشعب وظيفته أيه ومن ينوب عن الشعب فى مراقبة مصالحه ..اللهم إلا إذا كنت أنت تؤمن أن مجلس الشعب لا يؤدى دوراً رقابياً ولا فائدة منه...؟؟

أما عن المتربحين و .. و.. وشوية الكلام بتاع الانظمة الشمولية فنشكرك على كرمك ومفراداتك وياريت تكتر من إهانتك ونذكرك بالحديث النبوى الذى سأل فيه رسول الله (صلعم) :” أتدرون من المفلس...” إلى أخر الحديث.

أما عن دفاع الرجل عن نفسه وقصة شمشون و... و... فحضرتك ممكن الراجل يروح مجلس الشعب ويجتمع مع أعضائه ويقول كل اللى فى نفسه وده على إفتراض إن الموضوع فيه سر أساساً وذلك اللهم إلا إذا كنت انت سيادتك ترى ان أعضاء المجلس الموقر غير أمناء على أسرار الوطن.....؟؟؟!!! وإذا كنا بنتكلم على تصدير فجل وخيار فتبقى مصيبة إن إحنا نصدر لأعدائنا بسعر رخيص أما والكلام عن تصدير سلعة إستراتيجية تمس الامن القومى للبلد والاجيال القادمة فالمصيبة أفدح...!!!

أما عن كلامك عن اللى باعوا القضية من الفلسطنيين والاردنيين و الملكيين أكتر من الملك و.. و.. فالقصة مش كدة حضرتك ؛ القصة قصة مستقبل الاجيال القادمة وحصتهم من الطاقة والاموال التى أهدرتها حكومات الوطنى... وأسمح لى أقول لسيادتك حاجة كمان ...، فى مصطلح فى اللغة العربية أسمه الامن القومى ..، أسمه أيه... الامن القومى ؛ أنا هاكلمك عن الحدود الشرقية للامن القومى المصرى بس( أنا مش هطوِّل عليك لأن الموضوع طويل) و دى حضرتك تمتد لحد العراق و تركيا شرقاً ؛ يعنى بالعربى كدة حتى لو فى حد باع القضية ( وده مع نفيى الشديد عن أبناء فلسطين والأردنيين من الوطنيين الشرفاء أنهم باعوا قضيتهم) فماينفعش إننا نبيع أمننا القومى ونعطيه لإسرائيل كهدية فوق البيعة.

أما عن إسرائيل فهى دولة " معادية" بيننا وبينها معاهدة سلام ولم ولن تكون دولة صديقة ولو مش مصدق أنت حر بس ده لن ينفى الحقيقة الواضحة وضوح الشمس وبالنسبة للواقع فأحب أقولك على واقع إخوانك من المصريين اللى بيموتوا كل يوم فى طابور العيش والحكومة بتقول أنا ماعنديش فلوس أجيب عيش (مع إنها مضيعة 200 مليار ) أحب أكلمك عن أخوانك من المصريين اللى مش لاقيين العلاج على نفقة الدولة والدولة بدل ما تزود ميزانية وزارة الصحة ؛لاء راحت ضيعت الفلوس ؛ أحب أكلمك عن البنزين اللى غِلى علشان الحكومة تلاقى تدفع العلاوة بتاعة مايو لأن الحكومة ماكنش معاها 40 مليار علشان تدفع للناس..يكفيك الواقع ده ولّا أقولك كمان.

أما عن الصدمات فياريت تدخل على المواقع دى وتشوف إسرائيل عملت أيه فى أخواتك يمكن حضرتك تتصدم وتعترف بالواقع الحقيقى

http://egyptianpows.net

http://www.youtube.com/watch?v=vj30PHW1Jts

http://www.youtube.com/watch?v=0krBwybvP8w

أما عن الواقع السياسى وإستحلاب الكرايهة و...و..... فممكن حضرتك ماتاخدتش مُستحلب الكراهية أبقى خد أى مستحلب يعجبك بس أبقى فكر وقولنا كدة أنت هتقدر تجيب ال 200 مليار المهدرين دول إزاى وياريت ماتنساش تجيب كمان تعويضات لأسرى الحرب الذين قتلتهم إسرائيل ماهو ده برضه واقع ومصلحة برضه يا أستاذ نبيل شرف الدين.

أما عن الكلام من قِبَل رجال الدين عن الصفقة وإعتبارها خطأ فادح فسيادتك يعنى عايزهم يشوفوا الناس مش لاقية العيش الحاف والمرضى الفقراء مش لاقيين العلاج والحكومة راحت أهدرت 200 مليار ويشكروا الحكومة ولّا أنت عايز أيه بالضبط ....؟؟؟؟ وحضرتك أساسا لما تكون حاجة تمس كل مصرى يبقى لازم الحكومة قبل ما تاخد القرار يكون المصريين موافقين عليه ؛ الحكومة المصرية الموقرة ما إشترتش الشعب المصرى من سوق العبيد ؛ الحكومة تنوب عن الشعب فى إدارة مصالحه و أملاكه ومسؤلة أمام الشعب ونوابه مسؤلية كاملة.

أما عن التعايش السلمى اسمح لنا أن نقول لك إن التعايش السلمى لايساوى أهدار أموالنا علشان الدول الاخرى تدلع مواطنيها على قفانا

الدستور:تخفيض أسعار الكهرباء في إسرائيل بسبب الغاز المصري

وفى النهاية ياريت تشرح لنا سيادتك إزاى يكون الإندماج فى الإقتصاد العالمى عن طريق إهدار 200 مليار جنيه مصرى فى وقت مصر أحوج فى لكل جنيه وياريت تفسر كمان إزاى يكون الحرص ثروة مصر تخلف و...و....( شوية الكلام المكلكع اللى مالوش معنى اللى أنت كتبته فى الاخر)

والله المستعان ......فى الحفاظ على ثروة مصر من مهدريها و المدافعين عنهم

أيوة... أستنى ...أستنى ...أنت لَقَّحت بالكلام عن معاهدة كامب دافيد فى أول مقالتك ..والنبى يا عم الشباب أبقى هات كلام موثق بوثائق وقوله بصراحة وبلاش تلقيح كلام وعلى فكرة الدكتور يحى الجمل علق وقال فى الندوة بتاعة نقابة الصحفيين إن مفيش حاجة فى إتفاقية كامب دافيد تجبر مصر على تصدير الغاز لإسرائيل فمابالك بتصيدره رخيص.