De Jas Vu

حاسس بأيييييه.......؟؟؟؟؟

لما شفت المشهد ده فى مسرحية طبيخ الملايكة حسيت كأنى فى مكان الراجل ده . وحسيت كأن الشعب المصرى كله مكان الراجل ده اما مين هم اللى فى مكان ثلاثى اضواء المسرح فانا سايبهالك انت ونيتك (السودة)

Really bad people

الصحف المارقة ذات العلامة الفارقة

يوم السبت(21 ابريل 2007) كتبت الصحيفة المارقة"الدستور" الخبردة :سرقة 25 موبيل تخص اعضاء الشعب والشورى اثناء لقائهم مع جمال مبارك فى المنصورة. إن هذه الصحيفة المارقة الحقودة عليك يا سيدنا وتاج راسنا يا جمال بك. الناس دى انا مش عرف حقودة ليه ياجمال بيه؛ ايه يعنى كام موبيل ضاعوا ماهو يا ما مليارات ضاعت على مصر (ملحوظة ياشباب كل واحد فينا مديون بحاجة بتاعة 7000 جنيه بسبب قصة الديون دى).وبعدين الصحيفة التانية اللى اسمها صوت الامة اللى بيكرهوا سيادتك باشا.دول قلة مندسة ياباشا(يعنى كدة من اصل 70 مليون يطلعوا حاجة بتاعة 69.999.000 بنى ادم بس..... مش قلت لك قلة مندسة ياباشا) الصحيفتين دول ياباشا الاتنين مع بعض دول محور الشر ياباشا....، ايوة ياباشا هو ده اللى بعد محور 26 يوليو على طريق القطامية.... ، هو ياباشا ...ايوة المحور اللى عاليمين بعد خط المترو ..هو ياباشا .بص سيادتك ده انا حتى شلت صورة سيادتك اللى الناس الوحشين دول كانوا حاطينها مع الخبر،طبعا ياباشا ده احنا رجالة سعادتك ،ده احلام سيادتك اوامر ياباشا.طب بس سيادتك الخبر ده نزل يوم السبت اللى فات وبقاله 3 ايام دلوقتى ومحدش من رجالتنا فى الصحف الكومية كتب نفى ...!!! آآآآه دول لسه بياخدوا الموافقة علييييه...!!!. ومالوا ياباشا ياخدوا حلاوة، ياخدوا جاتوه.......... ياخدوا كل اللى يحبوه ياباشا المهم انهم ينزلوا التكذيب ومبروك مقدماً ياباشا،الف مبروك ياباشا

Trying to find 13 billion pounds

محدش لقى 13 مليار ياولاد الحلال

ياخواننا....... ياولاد الحلال ..........ماحدش لقى 13 مريار جنيه تايهين من الحكومة فى رجلهم الشمال وحمة الخصخصة.وفى الرجل التانية خلخال.

ياولاد الحلال يا .........ياولاد الحلال يا ..............فى فلوس تايهة.

الحكاية إن فى برنامج 90 دقيقة سمعت الكلام اللى يفرح ده : فى 13 مليار جنيه من فلوس الخصخصة تاهوا من السنة اللى فاتت ولحد دلوقتى ماحدش من الحكومة علق على الكلام ده يمكن راحوا مارينا يصيفوا فى الشتاء علشان فى الشتاء الدنيا بتبقى مسقعة .

بالمناسبة انا فاكر ان احد المسؤلين قال من كام سنة كدة ان خلق فرصة عمل واحدة بيتكلف على الدولة 20 الف جنيه. طب ياترى ال13 مليار يعموا كام فرصة عمل(13 مليار على 20 الف تساوى: 600 الف فرصة عمل جديدة) 600 الف اسرة ممكن يعيشوا من ال 13 مليار دول ؛600 الف بيت هيتفتحوا ؛ 600 الف بيت منعنا خروج ارهابيين ومجرمين منهم ( انا مش قصدى ان العاطلين وحشين انا قصدى نحميهم ونوفر لهم حياة كريمة).

أفرح يا عم بالكلام ده كمان

Nice Article

قلمين

اقرا كده مقالة بلال فضل فى الدستور وقوللى رأيك ايه

About the espionage thing

بخصوص قضية الجاسوس

شفت امبارح(الثلاثاء 17 ابريل 2007) برنامج كانوا بيتكلموا فيه (بصراحة انا اقصد برنامج البيت بيتهم) وكانوا بيتكلموا اد ايه عظمة ويقظة اجهزة الامن المصرية والمخابرات و الذى منه. كالعادة مرارتى اتفقعت (يارب مرارتى تنبت تانى المرة دى كمان).يعنى يا اخوننا يافشلة انتوا، انتوا بقيتوا فاشلين حتى فى النفاق. ايه الكلام اللى انتوا بتقولوا ده . لازم تعرفوا ان جهاز المخابرات فيه حاجات وعمليات اد اللى انتوا بتتكلموا عنه مليون مرة (ولكن لم يتم الاعلان عنها لدواعى امنية) والقصة كلها جاسوس واتقددم للمحاكمة.ياخواننا ياما ناس فى الاجهزة دى ضحوا بحياتهم فداء لمصر وشافوا ويلات كتيرة ومحدش اعلن عنهم باى شىء. ياخواننا ده فى ناس عايشة ليل نهار وارواحها على كفها ومحدش حاسس بيهم. وبعدين ماتعيشوش الدور اوى كدة لأنكوا تركتم ارملة الهجان تقاصى الامرين وتركتم جمعة الشوان بمعاش 70 جنيه. فياريت محدش يعمل جدع على الفاضى خلونا ساكتين وخلى الطابق مستور . المهم الاخ اللى فى بيتهم اتكلم على مواطن تم النصب عليه من نصابين ادعوا انهم بوليس ودخلوا فتشوا بيته (طبقاً للتعديلات الدستورية الاخيرة) وسرقوا كل الفلوس،والراجل لما راح يبلغ البوليس طلع ان دى 8 عملية تحصل فى المنطقة ؛ قام الاخ تامر طيب الله ثراه علق ان السبب فى الكارثة دى ؛هم الناس الوحشة الى فسرت التعديلات الدستورية غلطت وطلعت عنها اشاعات وحشة.(وعند الجملة دى مرارتى نطقت وقالتلى اتقى الله ياظالم وبطل فرجة على الحاجات دى، انا مش كل شوية اتفقع وانبت). اول هام ياأخ فى بيتهم؛ الناس مالحقتش تفهم تعديل واحد علشان تفهم 34 تعديل كل واحد محتاج مناقشات شهر بالميت. تانى هام هو حضرتك اساساً كنت فاهمهم لما صوت عليهم ، او حضرتك كنت عارفهم حتى؟؟؟. تالت هام يعنى سيادتك تركت حكاية ان دى ثامن جريمة بنفس السيناريو وتركت الاخوة الضباط اللى ماقبضوش على العصابة ومعلقتش عليهم وبتتكلم على حاجة برة الموضوع وبتتكلم بمنطق مغلوط امال اشمعنى فى الحكاية بتاعة مكرم عبيد اتكلمت وكنت زعلان و....و.....!!!!!!!

Iam genius,Iam strong,Iam the stongest man ever lived

انا عبقرى ...... انا جدع ،

انا زى الحدييييد

أمبارح قريت المقالة بتاعة فهمى هويدى فى جريدة الدستور اللى كان بيتكلم فيها عن نفقات تأمين الناس المهمة فى مصر وبرة مصر وكان بينتقد زيادة الانفاق. وفجأة نزل عليا الالهام (حتى الهام قام معورنى فى راسى وهو نازل) وقاللى" ايه رايك ياد يا O2A لو بدل التكاليف الكتيرة ممكن نعمل حظر تجول وقت نزول الناس المهمة وتنقلهم من حتة لحتة.يعنى بدل الناس والكلام الكتير ده نعمل حظر تجول فى البلد كلها من الساعة كذا للساعة كذا لما يكون المسؤل رايح اى حتة(حتى لو رايح يجيب الجرايد مثلاً او نازل يشترى فول من على عربية الفول او رايح يجيب طبق كشرى من العربية اللى جنبهم) وبالطريق دى نبقى امّنا البلد كلها والمسؤلين وقللنا النفقات من غير ماحد يزعل ولاحاجة. وممكن مع التقدم التكنولوجى والبلدة الذكية نعمل ايه؟؟ نعمل زى فيلم العنصر الخامس (بتاع بروس ويليس ياد يا O2A ) يعنى نعمل فى كل بيت وكل شارع دواير حمرا (بدل الدواير الصفرا بتاعة الفيلم علسان مبنقاش بنقلدهم) وأول ما المسؤل يفكر يتحرك، تدق سارينة يقوم كل افراد الشعب يروح على الحيط ويحط ايديه على الدواير الحمرا لحد ما المسؤل يعدىواللى مايروحش نعتبره ارهابى بيفكر فى عمل ارهابى زيه(طبقا للتعديلات اللى فى الدستور) ونسجنه. هاااا ايه رأيك يا O2A....!!!". الصراحة رديت على الهامى وقلت له" غور الله يجحمك فى النار بحق التعويرة والكلام الاسود اللى انت بتقوله ،ده التراب اللى بيمشى عليه المسؤلين على دماغ كل واحد فينا يا إرهابى يا ابن الارهابى انا لازم ابلغ عنك (الصراحة انا كنت بتكلم بصوت عالى وعينى على الموبايل أحسن يكون متراقب والواد الهامى ده لبط بس انا اهلى عايزينى علشان كده لازم احمى نفسى)".

ملحوظة هامة للوِحشين اللى ظنهم وحش :مصر بلد ديموقراطية وكله تمام وكله كويس وانتوا بس اللى مش واخدين بالكوا.انتو كل اللى محتاجينه انكوا تقفوا قدام المرايا وكل واحد ياخد نفس عميق ويزعق ويقول بأعلى حسه : "الديموقراطية فى مصر تمام و بخير و زى الفلللللل" تلات مرات قبل الاكل وبعده.هما اسبوعين وهاتعرفوا أديه انتوا مخطئين فى حق مصر وان مصر فعلاً بخير وتمام.

(اقدم اعتذارى للفيلم ).

The boat again and again and again

العبارةللمرة الالف

للمرةالالف أكتب عن العبارة(مجازاً)وقصةالعبارة واهالى العبارة الذين يجأرون بالشكوى

الوف الناس يمضون الليل يفكرون فى اقاربهم الذين قتلوا فى العبارة وينتظرون وقت القصاص من القاتل.

سيادة الرئيس محمد حسنى مبارك لقد استجبتم سيادتكم لغضب الشعب المصرى بعد فيلم روح شاكيد وامرتم بتشكيل لجنة من أجل هذا الموضوع . ولكن سيادتكم فيما يخص قصة العبارة ،اللجنة مشكلة والتقرير يقترب من اصداره بشكل نهائى ،ولكن يوجد شىء ما اوقف صدوره...!!! .اسمح لى ان أن اسال سيادتكم بصورة مباشرة:

هل ستتدخل سيادتكم بصورة حاسمة من أجل نصرة الوف من أقارب الضحايا المظلومين ام لا؟؟؟؟ياسيادة الرئيس ما هو المطلوب لكى تتدخل سيادتكم تدخلاً مباشرا يرجع الحق لاصحابه..؟؟ ؟. و إذإ لم تكن سيادتكم تصدق ما هو مكتوب إرجو من سيادتكم مشاهدة اقارب هولاء الضحايا يشتغيثون بسيادتكم

For the record

موضوع هام ولازم له وقفة

الصراحة الموضوع اللى عايز اتكلم عليه المرة دى موضوع مهم (على الاقل بالنسبة لى) وفيه كلام كتير بيقال ومش عاجبنى.الموضوع هو بخصوص الاقباط المسلمين والاقباط المسيحيين. ايوة الاثنين بيطلق عليهم لفظ اقباط لأن كلمة اقباط المراد الاصلى منها هو المصريون وليس المصريين المسيحيين.الحقيقة الناس قاعدين كل شوية يقولوا التاخى والمحبة والفتنة نائمة ولعن الله من ايقظها وفى النص تلاقى كلام من عينة ما هو موقف الاخوان من الاقباط وجلسة ولا مؤتمر بين ممثلين للأخوان مع بعض من رجال الدين المسيحى ويعملوا جلسة ويتبادلوا الاراء .

ياسادة ياأفاضل ايه اللى انتوا بتعملوه ده ..؟؟؟ايه العك ده...؟؟؟.اواسمحوا لى اعارض اغلبية إن لم يكن كل الاراء التى قيلت. :

1-اساساً الاقباط المسيحيين والاقباط المسلمين هم نسيج واحد بصبغتين .حتة مصبوغة أسلامى وحتة مصبوغة مسيحى.الكلام اللى بيتقال عن قبول الاخر ده اسمحوا لى كلام فارغ ...ايوة كلام فارغ مين قال المصرى المسيحى يشكل الاخر بالنسبة للمصرى المسلم أو أن المصرى المسلم هو الخر بالنسبة للمصرى المسيحى ..؟؟!! الأتنين اخوات ياناس وبلاش تنساقوا ورا المحاولات الفارغة اللى جاية من امريكا ..أيوة امريكا؛ هم عندهم اخر لأنهم مش شعب واحد... دول شوية ناس جايين من دول مختلفة و أتفقوا على على اهل البلد الاصليين ( الهنود الحمر) فهم عندهم أخر إنما إحنا لاء .إحنا قصتنا إن الفتح العربى حررنا من إستعمار الرومان وظلمهم.واسمحوا لى أهاجم كل الاجيال التى سبقت جيلى بمعنى إنكم(والكلام موجه لهذه الاجيال) لم تحاوا أن ترسخوا مبدأ الاخوة وتركتم الأجيال التى بعدكم بدون تعليم أو حماية من الحاولات التفرقة القادمة من الخارج. والاسوء أنكم لما المحاولات الخارجية نجحت ماعملتوش حاجة بل على العكس كل محاولاتكم كانت ترقيع للمشكلة بدون حلها والنتيجة هى ماحدث ومايحدث الآن وما سيحدث فى المستقبل(تسلم ايدكوا ورجليكوا كمان)وعلشان الطين يزيد بلة والحكاية تخرب جت قصة اللقأات بين الممثلى الاخوان مع بعض من رجال الدين المسيحى(اخر حاجة تقريباص كان اللقاء اللى اتنشر فى صحيفة الدستور) يا سادة ...ياااااسادة انتوا بتعملوا ايه ...؟؟؟ يوجد فى مصر مكان واحدممكن أى حد يروح ويسأل عن الاسلام ويستفتى بخصوص اى فتوى هو عايزها، المكان ده اسمه دار الافتاء ليه فى لقأات مع كل بنى آدم مسلم وأسئلةتطرح بخصوص الاسلام ،أسئلة من عينة ما رأى الدين الاسلامى فى كذا وما رأى الدين السلامى فى كذا...؟؟؟طب يا أخواننا دار الافتاء موجودة ومكانها معروف وممكن أى حد عنده حاجة محيراه أو مزعلاه( سواء من المسلمين أو المسيحيين) يروح ويسأل وياخد فتوى ويبقى أسمها فتوى من دار الافتاء واللى مزعله يتعرف أوله من أخره ويتحل مرة واحدة وخلاص..!!! أيه لزوم اللقأات مع كل الناس وسؤالهم ماعدا سؤال و أستفتاء دار الإفتاء؟؟؟؟!!!!!! وبعدين مين قال إن الاخوان المسلمين هم المتحدث الرسمى بأسم الاسلام فى مصر...؟؟؟؟!!! يا أخواننا الاخوان المسلمين هم ناس بيقولوا أنهم متبعين للإسلام ويسعون إلى تطبيق مبادئه وأنه الحل لكل مشاكل الدنيا. ويبقى ده هو حقيقتهم وده مبدأ التعامل بمعنى إذا عملوا حاجة صح نشكرهم وإذا عملوا حاجة غلط نحاسبهم لكن مش لما يطلع حد من الإخوان يقول كلام مش على هوا الناس تلاقى الدنيا كلها بتتكلم :شوف إزاى الاسلام وحش".لاء علينا أن نفصل بين الاخوان كاشخاص والاسلام كدين. ما هو أصل محدش طلع وقال أن الدين المسيحى ... و...علشان المذابح اللى حصلت للمسلمين فى البوسنة على أيدى الصرب ، الكلام الللى إتقال وقتها هو أن فى مذابح حصلت فى البوسنة وأن دى حروب بين دول جوار .

وبعدين ايه حكاية دعوا الفتنة نائمة لعن الله من ايقظها. وهوليه يبقى فى فتنة من الأصل....الصراحة أعتقد ان الاجيال السابقة استعملت المسكنات لحل مشكلة محترمة وسابت المشكلة متفاقمة علشان تقع على دماغنا ..... الله يسامحهم.

انا عارف أن مفيش مناسبة للكلام ده بس دى كلمة كان لازم تتقال للتوثيق .

Hallucination

هلوسة اخر الليل

المكان :بيتنا العامر. الساعة: اخر الليل كالعادة. القصة:اتفرجت على اخر حلقة من مسلسل 24 على قناة MBC Action (تقريباً الموسم الثالث)وبعدين بسمع حد كدة فى برنامج" فى الممنوع" (المذيع مجدى مهنا ربنا يكون فى عونه الراجل كأنه هيتنقط من الاخ الضيف).السيد الضيف المحترم قعد يبرر بخصوص التعديلات الدستورية والماد التى انتهكت حرية المواطن(اصل حرية المواطن اصلها كانت ناقصة). الضيف قعد يقول لو فى جريمة إرهابية تقتضى سرعة التحرك معقولة هاروح اجب أذن القاضى علشان اوقفها...؟؟!!!. المهم فجأة جه فى خاطرى فكرة عظيمة "أيه موقع الاخوة من مسلسل 24 هم بيشوفوا المسلسل ده كتير ولا ايه...؟؟؟! طب مين فيهم عايش فى دور جاك باور ومين عايش فى دور تونى الميدا .طب فى حد عايش فى دورشابل...؟؟ طب يا أخوننا مش تقولوا كدة برضه وانا عمال اقول ياربى الناس دى بتعمل كدة ليه... بتعمل كدة ليه... بتعمل كدة ليه؟؟؟؟. عموما عندى ليكوا بشرى هايلة فى شوية مسلسلات على نفس القناة أنما عجب Prison break مثلاً (عايشُه ناس كتير فى مصر ولسه فى ناس كتير هيهيصوا فيه فى الفترة اللى جاية ).وخد عندكوا فى مسلسل على Dubai One اسمه ALIAS هتيهصوا فيه ياشباب وفيه شوية افلام أنما ايه على مزاجكوا .بس قولوا لى بقى يا عفاريت هتغيروا ايه فى الدستور لما تتفرجوا على ALIAS...؟عموما عندى ليكوا فكرة جبارة :ممكن مع كل مسلسل تشفوه تغيروا الشعب .ايه رأيكوا فى الفكرة دى ...؟؟؟ لاء وايه؛ الصين اليومين دول بتعمل شعوب بنص التمن يعنى حاجة ببلاش كدة ياباشوات.وممكن نعمل ابونيه مع الصين بحيث انها مع كل مسلسل تصدرلينا شعب جديد حسب الطلب وتعمل تخفيض كمان ....الكلام ده انا بطالب بيه مش علشانى ده علشان مصلحة مصر ..... والصين كمان

المهم بقية الحوار انا كنت بأسمعه وانا حاسس خير اللهم أجعله خير كدة كأن فيه بردعة نازلة على كتافى وذلك بسسب كلام الاخ الضيف .

That is me also

دى نتيجتى فى اختبار تانى...... يلا خلّى الشعب يعرف شخصية رئيسه القادم

Global Personality Test Results

Stability (73%) high which suggests you are very relaxed, calm, secure, and optimistic.. Orderliness (66%) moderately high which suggests you are, at times, overly organized, reliable, neat, and hard working at the expense of flexibility, efficiency, spontaneity, and fun. Extraversion (50%) medium which suggests you average somewhere in between being assertive and social and being withdrawn and solitary.

Take Free Global Personality Test
personality tests by similarminds.com

Try this one for a change

برة الخط تانى مرة

What Famous Leader Are You?
personality tests by similarminds.com

لتانى مرة أخرج عن الخط اللى رسمته. ويمكن ده بسبب الغم والهم من كل اللى بيجرى فى البلد. المهم انى لقيت ماااعلينا كاتبة البوست ده .الله يمسيها بالخير ماااعيلنا كتبت عن الاختبارده ، المهم أن انا قمت بيه و الحمد لله طلعت هبقى غاندى إن شاء الله .بغض النظر عن إن شكلى شبه غاندى بس النتيجة ظريفة نوعاَ ما...!!!!.

Shame on you

فى الممنوع و...البيت بيتهم

الليلة دى شفت برنامج فى الممنوع بتاع مجدى مهنا(يذاع الاحد 8 مساء ويعاد الاثنين 4 عصراً) والصراحة عجبنى أوى لما استضاف السيد الدكتور فتحى سرور رئيس مجلس الشعب. عجبنى مستوى الحوار جرأة الاسئلة وأنصحكوا تتابعوه بكرا فى الاعادة.المهم لما خلص البرنامج لقيت برنامج البيت بيتهم جايب حلقة عن الاخوة بتوع الميكروباص وأد ايه هما وحشين وكخة وماعرفش ايه ...!!،و هيعملوه 50 دقيقة تقريباً من البرنامج عن القصة دى...!طب نتكلم بقى ؛ دلوقتى قضية عماد الكبير (سائق الميكروباص الذى تم تعذيبه) له جلسة فى قضيته بكرا...!!! طب لما الاخوة يعملوا تقرير أو جزء من الحلقة فى التوقيت ده يبقى ايه؟؟؟؟؟الحقيقة الوسواس بيقوللى أن دى محاولة للتاثير فى الحكم..!!!!! والصراحة اذا كانت مخاوفى صح يبقى الكلام ده عيب عيب على القائمين والمذيعين فى هذا البرنامج أىً كانت إنتماءتهم السياسية وميولهم الشخصية أن يفكروا مثل هذا التفكير وإذا حد رد وقال اصل الكلام ده تم بحسن نية فأرُد عليه وأقول له برضه عيب أن يكون فيه برنامج بيذاع على التليفزيون الوطنى وتحصل فيه غلطة قاتلة زى كده. ياأخواننا حرام عليكوا هاتقفوا أمام ربنا تقولوا ايه ...اصل كنا شايفين أن سواقين الميكروباص كخة(على الرغم من كل ما عليهم من مشاكل بس ماينفعش فى التوقيت ده يتعمل البرنامج ده؛ كان ممكن بعد حادثة الشهيد المتناوى بس مش قبل جلسة الضحية عماد) ولا هتقولوا اصل ماخدناش بالنا من أن فى ناس بيتعذبوا والقضية بتاعة الضحية صباحية إذاعة الحلقة.....؟؟!!!.عار عليكم جميعاً ماتفعلونه.

النهاردة شفت أنجيلا ميركل وكانت بتقدم التعازى بخصوص ضحايا الهولوكوست وكانت بتعمل كدة فى إسرائيل. هل يجى اليوم ويجى رئيس وزراء إسرائيل ويقدم فروض التعازى للشهداء المصريين وايه هى اخبار اللجنة اللى رئيس الجمهورية اتكلم عنها فى الجورنال علشان هولوكوست اسرانا المصريين فى حرب 67. وأذكر بما تفعله الآن بريطانيا فيما يخص جنودها المحتجزين فى إيران

Long live the Democracy

عودة إلى تهدئة النفوس

تحيا مصر وتحيا الديموقراطية

نعود إلى تهدئة النفوس(هوايتى المفضلة حالياً) و خلاص بلاش ثكافة(زى ما الاخوة المُزيعات بينطأوها). المهم النهاردة بفتح النت والاقى ايه ..؟ خد عندك ايه مكتوب فى:

المصرى اليوم: ظهور «السل» في القاهرة الكبري و٧ محافظات والجهات المختصة تواجه مشكلة في اكتشافه

و فى :

الوفد: 1000 حالة أصابة بالحصبة الالمانى فى الاسكندرية

السيد المسؤل طلع فى برنامج العاشرة مساء و قال انهم 120 واحد مشتبه فيهم بس...!!.

للأسف الشديد المرة دى مش هأعرف أهدى النفوس كويس كالعادة وده بيرجع إلى أن وزير الصحة أول ما مسك الوزارة قال ياأخواننا انا عابز كام مليار (تقريباً 16) علشان أقدر أقدم خدمة صحية كويسة.بس كالعادة أدارة الوطنى الطيبة الحريصة على مصلحة الشعب ولا عملت اى حاجة وطبعاً هى دى نتيجة طيبة الوطنى اللى بتيجى بس على دماغ الغلابة اللى ماعندهومش تأمين صحى ولا ميزانية يعالجوا بيها نفسهم ولا الحكومة عندها فلوس تعالجهم ( والحكومة كمان مش ناوية يبقى عندها). الظريف أن فى حد من وزارة الصحة طلع وقال كلام ظريف عن الحصبة الالمانى بس هى القصة فى حد ذاتها أن أنتشار المرض كده أمال أيش حال لو ماكانش فى تطعيم أجبارى ؟؟؟؟؟؟؟ وبعدين الحصبة الالمانى بسيطة فى الصغار بس فى البالغين مش كويسة و بالذات للسيدات الحوامل ونتائجها ممكن تكون مضرة للرجال البالغين. الاهم ايه حكاية السل ياسيادة المسؤل..؟؟؟؟

أيه ده... ايه ده... ايه ده... استنوا استنوا ؛لاء لاء لاء ...اصل انا بنى آدم محظوظ وربنا مش بيخلى فى نفسى حاجة...!!!!!!

أتفرج على تقرير العاشرة مساءً عن المواطن اللى رفع قضية على رؤساء تحرير كام جريدة علشان اتكلموا عن رئيس الجمهورية محمد حسنى مبارك والسيد أمين لجنة السياسات السيد جمال محمد حسنى مبارك. .......!!!!!! (وخد بالك من الحتة بتاعةالاعدام يامعلم ..وافرج ياقلبى لك نصيب تتظبط فى البلد دى ويااا الحبيب...بيب...بيب)أوعى وشك يامعلم ده العملية كدة كبرت أوى.... أوى... أوى.... ده التعديلات لسه مافاتش عليها كام يوم ..!!!من اولها كدة..؟؟؟(إلا إذا كان الاخوة بتوع الوطنى بيلعبوا كارت تخويف علشان اللى جاى ....؟؟؟؟ بس أيه هو اللى هو اللى جاى.....؟؟؟؟؟؟!!!!!!).طبعاً العبد لله أول أما سمع الخبر جاب جاز (ده العيال أصصحابى الوحشين طلع كلامهم صح يارجالة هانتشيع كلنا إن شاء الله بدون مقاطعة).أوعى وشك يا معلم........... السيكو سيكو جاى... جاى.... وكدة وحِش يادرويش وهتروح ورا الشمس يا درويش وأبقى قابلنى لو فلحت يا درويش !!!!!.بس عموماً مصر بلد الامن والأمان ...بشرط أن يكون ليك ضهر(وانا ماليش والحمد لله )علشان ماتنضربش على بطنك.مصر بلد الديموقراطية وحرية الرأى (بس تقول اللى أدارة الوطنى عايزاه بدون زيادة ولانقصان وإلا ........). كل شىء تمام وانا بنى حمار أستاهل ضرب ال....لانى أن انا ممكن أبقى بنى آدم فى البلد دى.وبصراحة فى الفترة القادمة إن شاء الله إذا ربنا أراد هسيبهالكوا مشجرة أو هاقعد فى مصر وإن شاء الله مصيرى ورا الشمس مع درويش صاحبى اللى ماعرفوش بس هو بقاله فترة ورا الشمس وإذا الدبّان الاخضر عرف له طريق جٌرة يبقى يقابلنى..!!!!!