No Sir You 're wrong

كلا يا سيادة اللواء......إن سيادتكم مخطىء

أمبارح فى قناة المحور كان فى حوار عن التعذيب مع أم بتقول ان فى قسم الشرطة تم تعذيب أبنها أحمد صاير سعد لحد الموت. وكان اللوا أحمد ضياء الدين بيتكلم وبيقول أنه مستحيل يضمن عدم وجود أخطاء ولكن الوزراة بتعاقب بمنتهى الحسم من يخطىء.

إسمح لى يا سيادة اللواء إن التعذيب من قِبَل أفراد الشرطة ليس خطأ بل هو جريمة ومن يقترفها يستحق العقاب المضاعف مرة عن إرتكابه الجريمة ومرة عن إرتكابها مستغلاً قوته وسلطته. الخطأ يا سيادة اللواء يكون مثل أن ينسى الضابط كتابة شىء فى أوراق القضية أو أن ينسى أن يستمع بتركيز لشاهد فى قضية ، هذا هو الخطا و إن كان هامش الخطأ الذى يقبل من أفراد الشرطة فى مصر من المفروض أن يكون صغيراً وشبه معدوم وذلك بسبب الصلاحيات الواسعة جداً لهم هذه الصلاحيات التى وصلت إلى أن تكون مذكورة فى الدستور (يعنى هوَّ سيادتك يعنى علشان التعديلات الدستورية الاخيرة أعطت لضباط الرشطة السلطة لفعل أى شىء فى المواطن العادى يكون ده هو رد الفعل....؟؟؟؟!!!!!!)

وبعدين سيادتك بتقول أن الوزارة بتعاقب بحسم المخطئين ....!!! طب أين عقاب من قاموا بالإعتداء على القاضى محمود حمزة......؟؟؟؟؟؟ أين عقاب من أنتهكوا عرض الصحفيات فى علناً أمام تليفزيونات العالم أجمع....!!!!!!!!!!

طب بلاش نتكلم عن العقاب .....؛نتكلم عن القبض على الجناة:

أين سفاح المعادى سيادتك...؟؟؟، أين مرتكب جريمة مذبحة بنى مزار ( أنا بطلب القبض على الجانى مش عقاب من قدموا برىء بنى مزار للمحاكمة بعدما هددوه )

طب فين سيادتك الصحفى رضا هلال.......؟؟؟!!!!!!!

Please don't beleive me Re

أرجوك ماتصدقنيش( تحديث)

أنت ياصديقى العزيز تسأل ما علاقة الحزب الوطنى بالبوست السابق

ماهو يا صديقى العزيز

مين الادارة الحاكمة فى هذا البلد .... أدارة الحزب الوطنى

مين اللى سايب ناس زى دول يعملوا كدة ( يعملو ا الشباب فئران تجارب) من غير لا ضابط ولا رابط (مع العلم بأن فيه كلام أن ميزانية الامن 200 مليار جنيه مصرى)...أدارة الوطنى

مين اللى سايب البلد تضرب تقلب ...أدارة الحزب الوطنى الحاكمة

مين اللى كل شوية بيعالج أى مشكلة معالجة امنية بحتة (وماينتج عن ذلك من مشاكل) ...أدارة الحزب الوطنى

مين اللى ساب الناس تغرق فى العبارة( 16 ساعة على الاقل ) مع أنه واجع دماغنا ليل نهار بأن مصر مستهدفة وبأن كل اللى بيعمله ده علشان يحميها من الاعداء الداخليين والخارجيين...أدارة الحزب الوطنى

مين اللى ساب البنية الاساسية 26 سنة تقع وتتردى إلى أسوء مايمكن ( مع ان قاعد بيتفاخربيها كأنه عمل اللى ماحدش عمله)

برضه أدارة الحزب البوطنى

صدقنى لما أقولك ان الناس اللى فى الوطنى دول خربوا مصر بما فيه الكفاية .......وزيادة

أقولك بص هنا كمان

Please don't believe me

أرجوك ماتصدقنيش

أرجوك ماتصدقنيش ؛ ماتصدقش أى كلام انا كتبته أو هأكتبه بعد كدة

صدق كلام الاخ ده

جزء اول

جزء ثانى

وخد بالك أن التجارب العلمية غير كدة لأنها بتتم بمنتهى الصراحة(يعنى المتطوع بيكون عارف كل حاجة من قبل مايمضى على أى ورق) و تحت إشراف الجهات العلمية المحترمة و أشراف الجهات المعنية والاعلان بيبقى أن فيه تجربة دواء؛ وخد بالك ان الشاب ده بيقول ان القصة منتشرة...!!!

أدى خيرات الوطنى على أبناء وطنى

بقينا فئران تجارب

هنروح فين بعد كدة

Hi how are younow....???

بقالك قد ايه مش إنسان

إزيك....؟عامل ايه....؟ بقالك قد أيه مش أنسان ...؟؟!!مستغرب ....!!! آه....أنت بقالك فترة طويلة مش إنسان ( ده على إفراض إنك كنت إنسان سابقاً). أمتى كانت آخر مرة حسيت فيها إن بلدك ماشية إلى الأمام ؟؟؟، طب إمتى سمعت خبر: أن فى البلد الفلانية عملوا كذا وكذا فى المصريين وقامت الحكومة المصرية ردت عليهم رد صارم حاسم وقفهم عند حدهم وخلاك تقول" أنا من مصر يا أخوانناااااااا والراجل فيكوا يكلمنيييي ..."؟؟؟؟!!!!!!!.طب فاكر أمتى كدة ربنا أبتلانا بكارثة قومية ولقينا الحكومة بتتحرك بمنتهى السرعة وقللت الخسائر قدر الإمكان وأتصرفت بشكل خلاك تقول :"يااااااه عمار يا مصر"...؟؟؟؟!!!!!. طب فاكر كدة أمتى مصر(اللى فيها الاهرامات) عملت أختراع غيّر الدنيا...؟؟؟!!!!طب فاكر أمتى رخصّوا الاسعار ( بَلا خيبة دول كل شوية يرخصّوا البنى آدم مننا)....؟؟؟؟!!!!! طب فاكر امتى رخصّوا الادوية( بَلا نيلة ده اللى بيمرض فى البلد دى بيتخرب بيته ...ودلوقتى بقى هو والورثة كمان)؟؟؟؟؟ طب فاكر لما كان الهوا نضيف ( ياااااااااه ده من أيام الجنيه الجبس ) ؟؟؟؟؟طب فاكر طعم المية أيام زمان( يادى النيلة علينا وعلى المية دلوقتى اللى طعمها يكرهك فى الدنيا)؟؟؟؟ طب فاكر أيام الرغيف أبو شلن ( ألّا بالمناسبة الرغيف أبو شلن ده قبل الرغيف الطباقى بكام موديل كده)؟؟؟؟طب فاكر زمان واسعار زمان( زمان ده اللى من 5 سنين مش من 20 سنة) الاسعار الرخيصة الحنيّنة؟؟؟؟؟؟ .أنا مش هكلمك على الكهربا ولا مصاريف البيت ولا مصاريف الدروس الخصوصية ولا ..... ولا.....ولا....... .

يااااااااااااااااااااااااااااااه كل ده شايله و ساكت ....... ياأخى مش بقولك إنك كنت أنسان......!!!!!!!!!

طب صحيح صحيح أديك شايل الهم وساكت ؛مش قادر تفتح بقك فى بلدك وكل من هب ودب بيذلّك( حتى لو هو مش مصرى) وساكت؛ و مش لاقى تاكل ولا تشرب و ساكت؛ ولو مرضت يبقى الموت احسن لك وبرضه أنت لسه ساكت ..؛ طب ما فكرتش هيعملوا فيك ايه بعد كدة.....؟؟؟؟؟ طب إذا كانوا بيعملوا كدة فيك هيعملوا ايه فى ولادك من بعدك...؟؟؟؟؟؟

طب ليه دايماَ هم اللى بيعملوا وبيسوّوا وأنت ساكت...؟؟؟؟

Decoy

عصا موسى ورأس الذئب الطائرة

فى قصة من قصص كليلة ودمنة ؛أن مرة فى الغابة الثعلب والذئب والاسد وقدأصطادوا جملاً .طلب الاسد من الذئب أن يقسم الغنيمة فرد الذئب قائلاً الرأسٍ لك والارجل للثعلب والبقية لى؛ فضربه الاسد ضربة أطارت رأسه ومات .طلب الاسد بعد ذلك من الثعلب تقسيم الغنيمة ؛ فرد الثعلب:"الرأس لأفطارك والارجل لعشائك والباقى لغدائك. أُعجب الاسد بماقاله الثعلب وسأله من علمك التقسيم؛ فرد الثعلب رأس الذئب الطائرة...!!!!.(على فكرة ده مش نَص القصة ،ده اللى فضل فى دماغى من ساعة ما قريتها من زمان)

وكان فى فى فيلم الهروب (بتاع احمد زكى)أثنين من المسؤلين الكبار كان عندهم مشكلة وعايزين يِشِغلوا الراى العام عنها فواحد منهم أقترح فكرة عصا موسى وهى فكرة انهم يرتبوا أن أحمد زكى يهرب من السجن وقصته تملى الجرايد والمجلات والناس كلها تنشغل بالقصة دى تنسى المصيبة الكبيرة...!!!(على فكرة الحكاية دى اللى قالها لى واحد صاحبى ؛أنا ما خدتش بالى منها).

طب ايه لزوم الكلام ده ....؟؟؟!!!!أقولك أنا ...، القصة وما فيها هى انك طبعاً تابعت المشكلة الاخيرة بتاعة حبس 4 من رؤساء تحرير صحف المعارضة وإزاى الدنيا كلها مشغولة بيهم (وده غير أن الموضوع كمان وصل وسائل الاعلام العالمية). القصة كلها على بعضها مش مهضومة وهى أساساً ما تتبلعش ؛ بمعنى انك لما تيجى تدور على أصل الاخبار الكاذبة متعرفش فين الخبر الكاذب ( أنا عن نفسى فشلت فى أنى ألاقى خبر كاذب يخص صحة الرئيس فى الدستور وصوت الامة...كل اللى لقيته مجرد أراء حادة وعنيفة). وبعدين لما تدقق شوية تلاقى أن كل اللى كان بيكتب قبل الواقعة دى فى الصفحات الاولى تقريباً شبه مختفى وتم ترحيله للصفحات الداخلية او بقى حجمه صغير أو أختفى من على صفحات الجرئد؛ كمثال لذلك كارثة بنك القاهرة اللى كانت تحتل العناوين الرئيسية و شهداء التعذيب(أخبارهم اختفت خالص بأستثناء الشهيد بتاع شها اخباره فى الصفحة الاخيرة فى جريدة الدستور) ومشاكل الشركات اللى أتباعت بأرخص الاسعار(مفيش ذكر لأحوال شركة عمر أغفندى إلا على فترات متقطعة وعلى أستحياء). يعنى من الاخر كدة الاخ اللى دبر قصة حبس الصحفيين(أنا بتكلم عن الراس الكبيرة مش الاخوة المنفذين ) نجح فى أنه يبعد الانظار عن جميع المصائب الكبيرة(بالنسبة له) وشغل الناس بمصيبة تانية خالص (بمصيبة كبيرة بالنسبة لنا).

وبالمناسبة هم زمان كانوا بيعملوا الحركة دى بس كانوا بيعملوها بشياكة يعنى كنت تلاقى فى كرة القدم كدة كل شوية س من الناس طلع كدة و عمل مصيبة غريبة مالهاش معنى ولا منطق( ومرة يجيب ناس ويقتحم معرفش ايه ومرة يقف بقول خطبة عصماء ويقولك انا قلبى قلب أسد وشوية كلام فارغ كدة مالوش معنى) ومحدش عارف يوقفه عند حده واخباره تملى البلد والناس تتظاهر علشانه (مع أن المظاهرات ممنوعة) وقصص وروايات ماسخة ومتكررة ، بس لما الراجل بقى كارت محروق وأبتدى يفشل فى جذب أنظار الناس....خلاص.... سابوه يقع ويدخل السجن.

الاهم من كدة كمان انه بيحقق فائدة مهمة جداً بالنسبة له ...ألا وهى انه بيحقق نظرية الردع (رأس الذئب الطائرة) لأى شخص يفكر مجرد التفكير فى أبداء رأيه فى شىء فى هذا البلد وبكده يبقى خلى الناس تمشى جوة الحيط مش جنب الحيط كمان؛ وده طبعاً هو عمله علشان بيمهد لحاجة كبيرة هيعملها فى المستقبل( القريب وليس البعيد) وعايز من دلوقتى كل الناس تطاطى رؤسها وتقول" آآآآمين أمون رع آآآآآمييين "،لأنه مش طالبة معاه وش من شوية بهايم... شوية رعاع فاكرين نفسهم بنى آدمين( ده فكره هو مش فكرى انا)؛ فمن دلوقتى كدة بيوريهم العين الحمرا علشان كله يكِش ملك وكل واحد يعرف مقامه ومايتطاولش على أسياده.

الإشاعات بتقول (ويارب الكلام ميضرش الاقتصاد القومى) أن الحاجة الكبيرة ممكن تكون مصيبة كبيرة بتدبر لنا فى الخفاء ،أنا كنت فاكر أنها قصة توريث السيد الزميل المواطن جمال محمد حسنى مبارك لحكم مصر ... بس من الواضح أن الموضوع أكبر من كدة شويتين تلاتة أربع شويات كمان لأن قصة توريث السيد الزميل المواطن واضحة للعيان ومش محتاجة عملية تمويه كبيرة،قد تحتاج لعملية ردع على مستوى عالى ولكن ليس التمويه..!!!!.

كطب ياترى بيدبروا لنا ايه فى الخفاء.....؟؟؟!!!!!!! هو ده السؤال اللى إذا عرفت أجابته أبقى أتصل ب 777709000777773333555 وأبقى قابلنى لوكسبت حاجة .

Questions

تساؤلات حول شهيد التعذيب فى شها

نبص مع بعض على الصورة رقم 1

هتلاقى حول العين الشمال جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه مفيش فيها لون أزرق يعنى مافيش كدمة يعنى ديه مش ضربة مباشرة ...!!!أمال ده ايه...... أتسحل على وشه...؟؟؟؟؟؟ لأنها لو خبطة يبقى لازم يبقى حوالها كدمة...؟؟؟؟

بص للصورة رقم 2

لما نبص فى الصورة بلاقى الانبوبة داخلة من أعلى فى الصر (جنب اللون الاخضر) لكنمنينوده بيستعمل لإفراغ الهواء ليه بقى لأنالهوا بيطلع فوق فتبقى الانبوبة راكبة فوق المية بتنزل تحت فتبقى الانبوبة راكبة تحت والنبوبة راكبة فوق يبقى بتصفى ايه...هوا ...اسم الله عليك

بص كدة للصورة رقم 3

بص كدة على لوح الكتف وقوللى هتلاقى ايه...؟؟؟ جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه مفيش فيها لون أزرق يعنى مافيش كدمة وخد بالك أن الجلد الفاتح هنا عامل زى مايكون خط مستقيم

علىالحافة الداخلية للوح الكتف وخد بالك أنها متوافق مع وضع الذراع وهو مضموم بجانب الجسم من الامام يعنى الولد ممكن وبقول ممكن أو غالباً انه اتسحل من رجليه وايديه كانوا مربوطين من الامام .طب ليه مانقولش أن انه أتسحل من أيديه لأنه لوح الكتف ساعتها بيقى مايل أكتر من كدة بكتير(كأنك لرافع أيديك لفوق) وكمان اللى بيبقى معرض للأرض ساعتها مساحة كبيرة من العضلات فى لوح الكتف مش حافة لوح الكتف الداخلية.....!!!!!.

نبص كدة على الصورة رقم 4:

هنلاقى حتة لونها غامق جداً عامل زى مايكون متفحم وبعدين الحتة دى محددة المعالم ده ايه...؟؟؟!!!!د ه حرق ولّا ايه بالضبط...؟؟؟!!!

طب بص كدة على الصورة رقم 5

هتلاقى قرحة صغيرة محددة عاملة زى ماتكون حاجة محددة و "حديثة"(لأن الجلد بتاعها ملحقش يتلون وياخد لون بقية الجلد)وبعدين الحاجة اللى عملتها مش سحل لاء دى حاجة صغيرة وحديثة..!!!

بص كدة على الصورة رقم 6

دى زى الصورة رقم 5 بالضبط بس دى موجودة تحت الخصية (أسمه الدقيق كيس الصفن) دى مستحيل تكون حاجة قديمة ومش ممكن تكون سحل برضه "دى حاجة محددة جداً جدا وحديثة أيضاًً"

بص كدة على الصورة 7

شوف ال 3 حتت اللى داخلين لجوة دول ايه ..؟؟؟ دى حاجات غير حادة ومكان دى حاجات مش صغيرة . ةهم الصراحة أكتر من 3 بس خالينا فى دول الاول.بص عليهم فى صورة 7 وصورة 7 A وبعد كدة بص عايهم فى الصور من 7 A إلى 7 F وقوللى ايه رأيك وليه الصور دى عاملة زى ماتكون رجل بنى آدم وكمان زى ماتكون رجله الشمال( بص كدة على الصورة 7 G وتخيل لأن ده أثر رجل فى الطين وهتفهم أنا قصدى أيه بالضبط).....؟؟؟؟!!!!!!!!!!!!!!!

طب بص كدة كمان بص على 7h وقوللى يا شيخ بأمانة ربنا مش ده كدة منظر أثر لجزمة وكمان من النوع اللى على الموضة( أبو بوز طويل) و لّا لاء

الصورة الى جاية دى هى 7h

بص كدة على صورة رقم 8

وقوللى ايه أسباب الكشطة دى ...؟؟؟ مش ده منظر جلد مكشوط وطلع مكانه جلد جديد ولّا لاء .....؟؟طب ايه سببه.......؟؟؟؟!!!!!! وأبقى أرجع تانى بص على الصورة رقم 7 وقوللى أيه سبب المساحات الكبيرة دى من الجلد المكشوط ده..؟؟؟؟؟

طب بيجى لجملة هبوط حاد فى الدورة الدموية والتنفسية(اللى هى بيقولوا أنها سبب الوفاة):

أساساً الهبوط الحد فى الدورة الدموية والتنفسية ده ممكن يكون لأى سبب بمعنى:

ممكن يكون الواد أنضرب وحصل له نزيف داخلى أدى إلى هبوط الدورة الدموية والتنفسية

وممكن يكون أتكسر له ضلع فلما يتكسر ضلع ممكن يحصل قطع فى الغشاء البلورى ويحصل حاجة زى وصلة بين الفراغ البلورى و الهواء داخل الرئة وبعدين الهواء اللى دخل الفراغ البلورى يتراكم ويزيد مع التنفس(ولابد من إخراجه عن طريق وضع قسطرة أو أنبوبة توضع فى أعلى مكان فى الصدر تقريباً زى اللى فى صورة 2 عند الدايرة الخضراء) وبعدين الهواء اللى دخل فى الفراغ البلورى يمنع الدم أنه يرجع من القلب للعروق (Impaired venous return) وده كمان بيعمل هبوط حاد فى الدورة الدموية والتنفسية

وممكن يكون جاله إلتهاب رئوى وده على أساس أن أخوه قال أن فمه وانفه كانوا بيجيبوا دم فممكن الدم ده من كِبَر حجمه يدخل إلى القصبة الهوائية ويعمل إلتهاب رئوى pneumonia)ِِِِِِِِِِِAspiration )

ودى كمان ممكن تعمل تسمم فى الدم و ده يعمل هبوط حاد فى الدورةالدموية والتنفسية

فالسؤال المهم إذا كانت الوفاة حصلت بسبب هبوط حاد فى الدورة الدموية والتنفسية ؛ أيه اللى عمل الهبوط ده....؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!

وهخل من الطبيعى أن الحاجة اللى عملت الهبوط فى الدورة الدموية والتنفسية تحصل لولد عنده 15 سنة..؟؟؟!!!!

والسؤال الاهم ايه سبب العلامات دى على الولد وبعدين فى سؤال مهم كمان هل الولد ده اتكسر له ضلوع ولّا لاءو لو فى ضلوع مكسورة ؛ايه تأثير الكسور دى على الحالة الصحية للولد الصغير ده..؟؟؟!!!!!!!!

Comedy

That is true

الصراحة معاه حق يقول أكتر من كده

شفت مقالة الاخ الكويتى اللى بيقولك أن المصرى مننا مايساويش أكتر من ثَمن غسالة كورى....!!!!! عموماً المقالة تحت عنوان لا تعايرني.. ولا أعايرك!!

و أسال نفسك لو سمحت : هو الاخ الكويتى والاخوة العرب( بغض النظر عن مصر الاخت الكبرى للعرب و..و..شوية الكلام اللى لا يودى ولايجيب إلا على دماغنا إحنا بالأذى ) هل يقدروا يعملوا ربع التصرفات دى مع السيد الامريكى(دى قيمة أى مواطن أمريكى فى الدول العربية...أنه سيد للجميع) هتقوللى لاء أصل أمريكا بلد قوية ...طب ياسيدى شوف كدة أى جنسية تانية ممكن يحصلها الكلام ده و أبقى قوللى(ده إذا لقيت)...وبعدين أساساً وانا مالى بالناس أنا مينفعش أن ولاد بلدى يتهزؤا ويتعذبوا والحكومة قاعدة تقول شوية كلام مامنوش فايدة(معلش أصلى لازم أحاسب على الكلام لأننا فى بلد الحرية والاخ إبراهيم عيسى حر فى الكلام اللى بيقوله ومحدش طلبه فى أمن الدولة.....يووه لامؤاخذة ياباشا قصدى أستدعاه للنيابة أمن الدولة العليا....معلش ياباشا أصل أنا عيل وبنى آدم طايش وباكل نص الكلا ....الكلام يعنى....شقاوة شعب يا باشا معلهش)

المهم أن انا أول ما قريتها الدم غلى فى عروقى وقلت كلام كتييير مالوش لازمة وبعدين لما فكرت شوية لقيت الراجال معاه حق يقول كده( مع غضبى الشديد منه ومن اللى خلّانا نوصل للحضيض ده). بس لما تيجى تبص لكلامه بهدوء ومن غير زعل تكتشف أن معاه حق....!!!!!!أيوة معاه حق....!!!!. أقولك ياسيدى:

1- فى بلد فى الدنيا يموت 1000 نفر من أهلها و والبلد دى متعملش حتة دقيقة حداد عليهم ، مش هقولك التليفيزيون يقفل(مع أن ده أقل واجب ) بس حقيقى مش ممكن اللى جرى ده الناس فضلت تروح ماتشات ولا كأن فى كارثة فى كل بيت فى البلد دى. طب يا ظلمة حتى دقيقة حداد فى أول الماتش...ولا هما هنا يا معلم ؛ كأن اللى ماتوا دول فى جزيرة واق الواق... طبعاً هتقول يا أخى حرام عليك دقيقة حداد بس دول كان المفروض يقلبوا الدنيا...هاأقولك ده أضعف الايمان ... وحتى أضعف الايمان ما عملناهوش...!!!صح...؟؟؟؟؟

2- طب بلاش.... فى بلد فى الدنيا السادة النواب فى مجلس الشعب يقلبوا الدنيا علشان كلمة منبطح التى قيلت بحسن نية ويسكتوا على سحل واحد زميلهم ( مع العلم ان فى كلام أن اللى سحل السيد العضو شتم مجلس الشعب والسيد رئيس مجلس الشعب....!!!)

ده خبر عن السيد النائبإحالة نائب إخواني إلي لجنة القيم بتهمة إهانة مجلس الشعب

وللمرة الالف أدى حكاية نائب مجلس الشعب اللى انضرب

3- طب بلاش دى...؛ ماسورة التعذيب اللى ضاربة فى البلد ما تستحقش أن الاخوة الاعضاء يقلبوا الدنيا ولّا ان السيد العضو اللى بيقولك "على الحكومة المصرية أن تثأر لشعبها" ،أن يثأر هو بشخصه لضحايا التعذيب ولّا تعذيب المصرى جوه بلده شىء واجب وبره بلده شىء حرام ولّا ايه بالضبط.......؟؟؟؟؟؟؟؟؟؟؟؟؟؟؟؟طب بلاش بتكلم عننا أحنا كشعب وبعدين بالمناسبة برضه ألا الخبر ده مش إهانة للمجلس الموقر برضه فضيحة التقرير المالى للحكومة

غالى يعيد إصدار نفس الارقام فى شهرين متتاليين

4- طب خلصنا كلام عن مجلس الشعب والحكومة نكمل بقى

يعنى إحنا دلوقتى قاعدين بنصرخ ونولول كل شوية ده فلان عذب فلان وفلان سرق فلان و... و... والناس جوة بلدنا مش بتحترمنا وبرة بلدنا مش بتحترمنا....صح....؟؟؟؟. معلهش الخطأ مننا إحنا لأننا سايبين كل من هب ودب يهزأنا ، إحنا لو كنا عند أول غلطة للحكومة حاسبناها حساب عسير ماكنتش الحكومة دى تعمل كدة(انا مش بتكلم عن حكومة الدكتور نظيف أنا بتكلم عن حكومات الوطنى كلها). لا كانت هتسيب التعذيب ده ولا البنية التحتية المهترئة ولا... ولا...ولا...ولا كانت هتسيبنا عرضة لكل من هب ودب.....!!!!!

آه صحيح خد بلّع الكلام ده بالخبر ده

وقائع جديدة: ضابط كويتي حطم عظام شاب مصري منذ ٣ أشهر.. واحتجاز آخر منذ ٩ أشهر

طب بلاش أقرا خبر المصرية اللى حبسوها ظلم فى الاردن وشوف كده حكاية أنهم أجبروها على الوقوف عارية أمام سجن النساء وقولى ايه رأيك...؟؟؟؟ وقوللى برضه ليه السادة الافاضل فى المجلس الموقر ماحدش منهم جاب سيرة أى حاجة ولا هاجم الاردن هجمة عنترية ولّا حتى غير عنترية...!!!!؟؟؟؟؟

بس هاأرجع و أقول العيب مننا إحنا اللى سكتنا للحكومة دى فبقت تعمل كدة وغيرها من الاخوة العرب والدول الاجنبية بقى يعمل كدة واكتر

It is just the beginning

أعتقد للأسف أن هذا ما نستحقه جميعاً

النهاردة فى جورنال الوفد الخبر ده : عمدة قرية شها يختطف شقيق قتيل شها ويقوم بتعذيبه لإجباره علي التنازل عن القضية واتهام ضابط الشرطة طب ماعلهش يعنى أنا عندى سؤال هوالاخ العمدة ده ماخافش من القانون ؛طب بلاش القانون ماخافش من الناس أحسن يعملوا فيه حاجة ؛طب بلاش الناس هو ماخافش من ربنا......!!!!!!!!!!!

والصراحة انا أحب أهدى هذا الكلام للأخوة اللى قلبوا الدنيا على الروسومات المسيئة للرسول والاخوة اللى قلبوا الدنيا بسبب تصريحات السيد الوزير فاروق حسنى عن الحجاب(وده مع غضبى الشديد من الواقعتين).وذلك على ضوء ماقاله الرسول (صلعم) فى خطوة الوداع على جبل عرفات:" ولدم إمرىء مسلم أعظم عند الله من حرمة يومكم هذا فى بلدكم هذا".

ويؤسفنى أن أقول أننا كمصريين نستحق هذا بل نستحق ما هو أكثر من هذا وذلك نظراً لسلبيتنا الشديدة تجاه انفسنا و أهلينا.....ولسه إن شاء الله ؛اللى جاى أسود وأنقح من اللى فات بأذن الله قولوا إن شاء الله

واللى ماش عارف القصة القصة أهة

ولو عندك دايل أب بص عليه هنا

Apology

السادة اعضاء مجلس الشعب ...لتانى مرة

النهاردة لقيت الخبر ده «الوطني» يطالب بالتحقيق مع الخضيري والمستشار يرد: «المنبطح» كلمة حق طب يعنى هو الناس سابوا كل قضايا التعذيب اللى فى البلد وجت الكلمة دى وزعلتهم اوى ؟؟،طب إزاى وفى أى بلد الناس تزعل من كلمة وماتتكلمش على "عيل مات من التعذيب" ومن فضلكوا ماحدش يتحجج ويقول أصل دول ماعرفوش ...ليه يعنى إن شاء الله هو اللى مات ده ،مات فى جزائر واق الواق ولّا مات فى بر مصر المحروسة(.....سابقاً) ،طب بلاش مشيها ماعرفوش طب أديهم عرفوا من الجرايد والمجلات والفضائيات طب عملوا ايه...؟؟؟؟طب بقية أعضاء المجلس الموقر هم كمان ما عرفوش .أمال مع إحترامى ليهم إزاى اسمهم نواب الشعب...؟؟؟!!! هم مش دول المفروض أنهم نواب عن الشعب المصرى ..؟؟!!! وجرايم التعذيب دى بتحصل لأبناء الشعب المصرى ولّا لأبناء شعب جمهورية فسيخونيا العظمى...؟؟؟!!! امال الأخوة الاعضاء ماأتكلموش ليه...؟؟؟؟؟؟؟؟؟؟؟؟؟!!!!!!!!!!!!!!!!!!!!!!

أنا لاأظن انهم على هذا القدر من القسوة والغلظة (والكلام ده بجد)؛ أنا أظن (ويؤسفنى ما سأقوله) أنهم يعلمون كل شىء يحصل على أرض مصر....... أيوة السادة الاعضاء فى المجلس الموقر عارفين كل حاجة بتحصل فى البلد (بس فى فرق بين عارف وساكت ؛وعارف وإتكلم ؛وعارف وعمل حاجة ترفع الظلم عن الناس) .طب نسأل السؤال المهم طب لم هم عارفين ليه مابيعملوش حاجة ...؟؟؟؟؟؟؟؟؟؟!!!!!!!!!!! أقولك بقى ياسيدى:

القصة ومافيها: أن ده سقف لايقدر الاخوة الاعضاء فى المجلس الموقرعلى الوصول إليه يعنى بالعربى كدة " الأخوة الاعضاء (وانا مش بتكلم عن شخص معين فى المجلس الموقر) لم ولن يقدروا على التطرق لموضوع التعذيب وحقوق الانسان " ولو حصل هيبقى زى اللى حصل فى أخر جلسة اتكلموا فيها عن العبارة( يعنى الموضوع مش هيحصل فيه حاجة مفيدة واللى هنشوفه هيكون مجرد محاولة ظاهرية لتحسين الامور) طب أديك أمارة زى ما بيقولوا بص كدة و أفتكر معايا حكاية نائب مجلس الشعب اللى انضرب ( ده جزء من خبر فى جريدة الدستور) وقوللى من فضلك لو سمحت هل السيد وزير الداخلية مَثَل أمام المجلس الموقر ولّا لاء..؟؟؟؟؟؟؟؟؟؟!!!!!

والصراحة الصراحة أنا أعتذر للسادة الافاضل (اللى ماقدروش يجيبوا حق زميلهم ولا حق رئيس مجلسهم ) "جميعاً" عن كل ما كتبته سابقاً لأنى أعتقدت انهم أناس يملكون القوة ومقادير الامور ولكن من الواضح انهم لا يملكون من امرهم شيئاً ولا من أمر أى شىء أى شىء لذا أعتذر إليهم ولعل وعسى ربنا يتولاهم برحمته

بس هو فى سؤال(والسؤال ده بجد) لازم أسأله برضه :"هو حضراتكم لما بتشوفوا الفيلم بتاع التعذيب ده وتشوفوا عيالكم واحفادكم ...؛أيه إحساسكم ساعتها...؟؟؟ طب...... طب لما بتبصوا فى المرايا (وأنتوا لوحدكم) أيه إحساسكم ساعتها....؟؟؟!!!! طب لما تيجوا تناموا على السرير ايه إحساسكم ساعتها وبتفكروا فى ايه بالضبط.......؟؟؟؟؟!!!!!!"

SOS

هذا الكلام المكتوب موجه للسيد زعيم الاغلبية

وبقية أعضاء المجلس الموقر

نُشر فى جريدة المصرى اليوم عدد الاربعاء 22 أغسطس 2007 خبر عنوانه سرور يضع تصريحات الخضيرى تحت تصرف ((الجهات القضائية)).. وعبد الاحد يؤكد أنه فى ((حالة تلبس))

وفى نص الخبر:"اتهم السيد عبد الاحد جمال الدين زعيم الاغلبية فى مجلس الشعب، المستشار محمد الخضيرى بأنه حنث اليمين التى أداها وخرج على وظيفته كقاض ،واصبح لايصلح للوظيفة القضائية، مشيراً إلى أن إصراره على تصريحاته جعله يضع نفسه فى حالة تلبس ، بما يمثل خروجاً سافراً على القواعد الدستورية والقانونية و تقاليد القضاء المصرى الشامخ وطالب مجلس القضاء الأعلى بعدم الصمت على هذه الجريمة التى إرتكبهاالخضيرى(المفروض كان الخبر يقول المستشار الخضيرى ...بس غالباً دى غلطة طباعة) بالإعتداء على المؤسسة التشريعية وتجريمها بهذا الاسلوب الهابط و المتردى-حسب وصفه"

والفيلم ده هدية للسيد عبد الاحد جمال الدين زعيم حزب الاغلبية وبقية أعضاء المجلس الموقر

جزء أول

جزء تانى

جزء ثالث

جزء رابع

(الفيلم ده من موقع طارق قطب وشكراً ل زنوبيا لأنها اول من دلنى عليه)

· هو الفيلم ده برضه مش حالة تلبس أمال ليه التقرير المبدئى مابينش الإصابات دى....؟؟؟

· طب هى جرئم التعذيب دى تمثل "خروجاً سافراً على القواعد الدستورية والقانونية و تقاليد القضاء المصرى الشامخ" وخروجاً على أى شىء آدمى ولّا لاء......؟؟؟؟؟

· طب هو التعذيب ده يمثل حنث اليمين لأى حد مسؤل حلف يمين أنه هيخدم البلد دى ولّا لاء....؟؟؟؟؟؟؟؟؟؟؟؟؟؟

· طب هذه الجرائم فى حق بنى وطنك ياسيادة زعيم الاغلبية ويا سيادات أعضاء مجلس الشعب المصرى ألا تُعد إعتداء على المؤسسة التشريعية.....؟؟؟؟؟؟؟؟؟؟؟؟

· طب مش المفروض الافعال دى مُجَرّمة( سواء بالقانون المصرى أو بأى قانون) برضه ولّا رأى حضراتكم أيه......؟؟؟؟؟؟؟؟؟؟؟؟؟؟؟؟؟؟؟؟

وأحب أقول لكم اننا فى إنتظار إجراءاتكم الرادعة ،لأننا شفناكم بتقلبوا الدنيا علشان كلمة قيلت عن غير قصد(فمابالكم بتعذيب أفضى إلى الموت(...مشيها تعذيب أفضى إلى الموت)

وأحب أفكّر حضراتكم بمذبحة بنى مزار التى ذُبح فيها مصريون على أرض مصرية وحتى اليوم لم يتم القبض على القاتل ، وأقول لسيادتكم أيضاً اننا فى إنتظار إجراءتكم الرادعة تجاه هذه المذبحة أيضاًَ...!!!!!!!!!!!!!!!

Iam donkey ..Iam donkey...."IAM DONKEY"

أنا حمار يعنى I am Donkey

أقر أنا كاتب هذا الكلام بأن هذه هى حقيقتى المطلقة ؛ حد يقوللى ليه ،قوم أقول له أنى الليلة دى لقيت برنامج 90 دقيقة كان بيتكلم عن أن أحد القضاة أثناء حوار ما وصف مجلس الشعب (عن غير عمد) بوصف فُهم خطأ على أنه أهانة للمجلس الموقر، وقد تقدم القاضى الفاضل بإعتذاره على الهواء معلناً أنه لم يكن يقصد المعنى الذى فُهم وأنه يكن كل تقدير للمجلس الموقر(وكلنا جميعاً كذلك) وبعدين أستضافوا بعدها السيد رئيس مجلس الشعب الذى ذكر أنه أوقف الإجراءات التى كان بعض من أعضاء المجلس الموقر سيقومون بها لتوقيع عقوبة على حضرة القاضى( وده على حسب فهمى الحميرى مع الإعتذار للأخوة الحمير )؛(على فكرة أنا لم أقرأ هذا الكلام فى الجرائد وأظن أن الواقعة دى حديثة جداً ولسه مالِحقِتش تتنشر فى الجرائد و أن السادة على الاعضاء قاموا بإتخاذ هذه الإجرءأت قبل مرور 24 ساعة على الحدث)وفجأة سرح بى الخيال بعيداًَ؛ وإذا بى أجد الاسئلة التالية فى رأسى :

طب ماهو رأى أعضاء المجلس الموقر فى هذه الكارثة ألا تستحق هى الأخرى إجراءات رادعة

ولّا شوية المصايب دى

ضباط شرطة سحلوا نائب فى مجلس الشعب

النيابة تحقق في قضية ضرب مواطن حتى الموت

16 قضية تعذيب بأقسام الشرطة في مصر خلال شهر واح

ضرب القاضى محمود حمزة

ده غير المصايب التانية التى لا تخفى على أحد

وبعدين هف عليّا سؤال (وساوس شيطان بقى ..... يللاااااا ،ماهو أصل المشرحة ناقصة قُتَلى)هو ايهما يحتاج لإجرات رادعة جذرية وسريعة جداً تعذيب مواطن حتى الموت ولّا كلمة عن غير قصد قالها قاضى يُكن كل الإحترام للمجلس الموقر (وكلنا جميعاً ) وحيث أن أنا حمار زى ماأقريت سابقاَ فلم أقدر أن أجواب على هذا السؤال

لعنة على الله على وساوس الشيطان اللى هتودينى ورا الشمس

They burried him

دول دفنوه

أمبارح كنت بشوف برنامج العاشرة مساء و جابوا التغطية دى عن الولد اللى مات (مشيها مات....) فى قسم الشرطة؛أقارب الضحية بيقولوا ان الولد أندفن ؛ طب هو فى حد بيندفن من غير تصريح وفاة؛ وبعدين هو أيه حكاية التهديد بتلفيق قضية لأخوه الاكبر ...؟؟؟؟!!!!!!!

أول جزء

تانى جزء

من الواضح أن فى تطور فى مصر ؛ سابقاً كان لازم علشان تبهدل فى الناس أن تكون واسطة كبيرة وضهرك مسنود زى اللى حصل كدة ل ضحايا العبارة أما دلوقتى فكل من هب ودب بيقدر يبهدل فى المواطن المصرى؛ ولو اللى فى فيلم ده صحيح يبقى أنت ممكن بعد ماتبدهل المواطن من دول تدفنه ومافيش مشاكل خالص يعنى أيه يعنى هو الحكاية بقت عرض جديد كدة زى عروض شركات المحمول "عذب مواطناً لحد الموت ...والدفن وإخفاء الحقيقة مجاناً"

حسبى الله ونعم الوكيل

Egypt.......

مصر بلد العجائب

مصر هى بلد العحائب فعلاً فهى البلد الوحيد اللى بيمر فيه أطول نهر فى العلم والناس على ضفافه مش لاقيين مية والقصة وصلت لصلاة الإستسقاء..!!!!

مصر هى البلد الوحيد اللى يُقتل أسراها والقاتل يعترف ( وخد بالك أن فيه شهود مصريين بيأكدوا الاعترافات دى) ومتعملش حاجة وشوية نقول عايزين أدلة(موجودة وموثقة) وشوية نقول مصر لسه ماقفلتش ملف اسراها المذبوحين

مصر هلى البلد الوحيد اللى يُقتل سفيرها والموضوع يبقى عادى جداً ولا كأن اللى مات ممثل لجمهورية مصر العربية؛ ولّا الوفد بتاعها يتم إطلاق النار عليه والموضوع برضه يمر عادى

بس قاعدين نقول مصر أكبر دولة

اكبر دولة فى أيه بالضبط فى تلقى الضربات والسكوت عنها

مصر هى الدولة اللى لما بنت صغيرة تموت من عملية ختان بتقلب الدنيا(انا ضد الختان تماماً)

لجنة قومية عليا و‏9‏ ملايين جنيه لمناهضة ختان الإناث

تشريع جديد بمجلس الشعب يُجرِّم ختان الإناث

بس عمرك ماتلاقى حد عمل حاجة علشان فيه مواطن مصرى مات من التعذيب؛ والموضوع مش مرة أو هى حاجة فردية

النيابة تحقق في قضية ضرب مواطن حتى الموت

16 قضية تعذيب بأقسام الشرطة في مصر خلال شهر واحد

وبالمناسبة أدى أخر حاجة؛تقرير العاشرة مساء

أول جزء

تانى جزء

وادى رد السيد المسؤل

أول جزء

تانى جزء

ثالث جزء

رابع جزء

طب الواد مات من التهاب رئوى ولّا صديد..؛ ماشى طب هو أتعذب ولّا لاء ويعنى بوضوح أكثر فى أثلر تعذيب على الولد ولّا لاء...؟؟؟؟؟؟؟0 ومع احترامى الشديد هل من الممكنأن يتم الضغط على الطبيب الشرعى من أجل إخراج تقرير لا يُظهر اثار التعذيب ولّا لاء..؟؟؟؛ والسؤال أيضاً لو الواد مات من صديد على أى حتة فى جسمه ؛ الاخوة فى القسم ماخدوش بالهم من تدهور حالته الصحية عندهم وليه سابوه لحد ماتدهور لحد كدة.....؟؟؟؟؟ وبعدين السيد المسؤل بيقول لاء لازم يكون فى أعلام متوازن...و...و...و...

على العين والراس كلام سيادتك طب ياريت سيادتك ترد على الكلام ده برضه:

اتصال تليفوني كشف جريمة حرق شاب حياً داخل قسم سيوة

النيابة تأمر بالقبض علي الضابط المتهم بقتل مواطن «تلبانة»

رئيس مباحث المنصورة يعذب «نجاراً» حتي الموت ليرغم شقيقه علي تسليم نفسه

النيابة تحقق في قضية ضرب مواطن حتى الموت

16 قضية تعذيب بأقسام الشرطة في مصر خلال شهر واحد

فورين بوليسي: مصر الـ 36 في تصنيف الدول الأكثر فشلاً بالعالم

دول برضه تحيز سيادتك ولّا رأى سيادتك أيه

The government again and again and again

حكومة مصر والقضاء ....والقدر

هل حكومتنا الموقرة اللى طول الليل و النهار إعلامها بيقول:" قضاء مصر الشامخ ...،لا تعليق على أحكام القضاء...، قضاء مصر بخير ...،أحكام القضاء مقدسة ...،بتحترم القضاة والقضاء...؟؟؟؟!!!!!

طب إذا كانت الحكومة بتحترم القضاء لماذ ضُرب القاضى محمد حمزة ولماذا حتى يومنا هذا لم تتم معاقبة المسؤلين عن ذلك....؟؟؟؟؟؟؟؟؟؟!!!!!!!!!!.

طب نقول أن دى واقعة فردية لا تعبر عن شىء ...، امل ليه السيد وزير العدل رفض سفر القاضى المنزلاوى ، وخد بالك المستشار الدكرورى عمل ايه علشان القاضى المنزلاوى وبعدين خد بالك بقى من رأى السيد وزير العدل فيما فعله المستشار الدكرورى . طب إزاى تكون الحكومة بتحترم القضاء و القضاة ووزير العدل فيها بيعمل كدة مع القضاة الذين يصابون بأمراض مميتة وكمان رأيه كده فى الناس اللى بتحاول تساعد القضاة الذين يصابون بأمراض مميتة .

وبعدين أيه حكاية ماسورة" التعذيب على أيدى الشرطة " اللى أتكسرت دى....؛ أيه الكم الرهيب ده من الفساد ...؟؟؟؟ إن هولاء الضباط وصمة عار على جبين مصر أين هم من الشهيد تامر عبد الفضيل والشهيد المتناوى وكثير من الشرفاءالمخلصين......؟؟؟؟؟!!!!!

أييييييييه مش مصدق أن فيه تعذيب فى مصر طب أفكرك بحكاية عماد الكبير ولاّ أفكرك بالفيديوهات اللى مالية النت... ولاّ أقولك بص أقرا كدة اللى جاى وقوللى:

اتصال تليفوني كشف جريمة حرق شاب حياً داخل قسم سيوة

رئيس مباحث المنصورة يعذب «نجاراً» حتي الموت ليرغم شقيقه علي تسليم نفسه

النيابة تحقق في قضية ضرب مواطن حتى الموت

16 قضية تعذيب بأقسام الشرطة في مصر خلال شهر واحد

والحمد لله سمعة مصر بقيت عالمية فورين بوليسي: مصر الـ 36 في تصنيف الدول الأكثر فشلاً بالعالم ( يسلام أخيراّ بقى لينا مرتبة على مستوى العالم)

لسة مش مصدق ….طب بص كدة على تغطية برنامج العاشرة مساء (خد بالك كل جزء يطلع له 1.5 ميجا)

جزء أول

جزء تانى

وأدى النتيجة

أهالي تلبانة يهددون بالاعتصام أمام مكتب المحامي العام

ده الكلام ده غير مشاكل سيوة ولاّ مشاكل رفح (بتاعة ميدان الماسورة) وغير مشاكل المية

طب السؤال هو أذا كان المسؤل هيطلع علينا ويقول أن دى حوادث فردية أمال الجماعية تبقى أيه...؟؟؟؟!!!!

وبعدين طب ماهو لو كل شىء تحت السيطرة أمال الكوارث دى بتقى أيه وبالتأكيد ماخفى كان أعظم وبالمناسة هو الكلام دة صح...؟؟؟؟

والسؤال الاهم أين هى مصلحة فى مصرفى أن تتكرر أحداث 1977 ولماذاتصر الحكومة على دفع الاحداث الى هذا الطريق......هل هذا هو قدرنا ...؟؟؟!!!!