Europe (updated)

ستى أوربا والدول المتقدمة

(تحديث)

المهم أن السيد سكرتير البابا بنيدكت كلامه أتنشر على موقع الجزيرة كمان السكرتير الخاص للبابا بنديكت الـ:"16 إن على أوروبا ألا تتجاهل "محاولات إدخال القيم الإسلامية إلى الغرب", ووصفها بأنها تهدد الهوية الأوروبية".

طب أدى أوربا طلعت مش جنة الله فى الارض طب نشوف ماما أمريكا. أما ماما أمريكا دى بالذات حكايتها حكاية ؛ليه بقى ...؛لأن طلع أن ماما أمريكا اللى عاملة راعية الحريات فى الدنيا( وقاعدين خارمين ماغنا على حقوق الخلق جميعاً حتى حقوق الشواذ) هى نفسها ماما أمريكا اللى كان فيها 0والله غالباً مازال ) جمعية كو كلوكس كلان ؛ الحكاية أن الجمعية دى كانت جمعية عنصرية موجهة أساساً ضد الامريكان من أصل أفريقى وكانت بتقوم بقتل وسرقة الاخوة الامريكان من أصل أفريقى.

وهذا الكلام طبعاً غير افعالهم(أى الادارة المريكية الحالية) فى معتقل جوانتنامو وسجن أبوغريب ؛ ومع العلم أن ولا حتى واحد على الف من الافعال دى يقدروا يعملوها على الاراضى الامريكية(لانهم بيطبقوا هناك حاجة اسمها قانون .....!!!!بس من الواضح أنهم بيطبقوه على شعوبهم فقط أما بقية الناس فبيدّوهم بالجز......)

طب معنى الكلام ده أيه...؟؟؟؟

انا لا أقصد ان أن أمريكا أو أوربا هما محور الشر الاكبر (على عكس ما هم بيوصفوا الاسلام بأنه الخطر الاخضر) أنا أقصد أن الناس دول مش المفروض نعاملهم على أنهم ربنا وكلامهم مقدس وكل اللى يقولوه نقول عليه آآآآآآمين ولا انا أقصد أنهم الشيطان الاكبر .أنا أقصد أنهم ناس عاديين عندهم خير وشر . بمعنى أن الكويس اللى فيهم أنا أخده و أستفيد بيه والوِحش أبقى عارف أنه وِحش وأبعد عنه ؛ وكمان لما أخد الكويس اخده وانا رافع راسى لفوق ؛لأنه نمش معنى أن أوروبا وأمريكا علمونى حاجة صح أنهم أستعبدونى لاء والف لاء كمان ....الله يرحم أيام ما كانت أوروبا بتبعت صفوة أبنائها يتعلموا فى جامعات العرب (الكلام ده زمااااااااااااااااااااااااان ويمكن قبل الزمان بزمان)

Europe

فى أوربا والدول المتقدمة

النهاردة خير اللهم اجعله خير كدة كنت بافتح النت (يلا أفتحها براحتى بكرا هتبقى بفلوس للركب) وإذا بى ألاقى الخبرين دول

سكرتير البابا يحذر من "أسلمة اوروبا"

سكرتير البابا المذكور هنا يُقصد به سكرتير البابا بنديكتوس السادس عشر. زخد بالك من كلمة مفاهيم خاطئة اللى قالها فى الحوار

تجنبا للتعامل مع الرجال الأجانب

جدل واسع في هولندا لرفض المسلمات تلقى العلاج بيد الأطباء الذكور

والصراحة أنا أستغربت أوى لأنى طول عمرى متعود أن أوربا والدول المتقدمة هما أسيادى وتاج راسى وبعدين أنا فاكر أن أى واحد يتصرف بطريقة مصرية خالصة الناس كانت تتريق عليه لأنه "فلاح مش عارف اصول الاتيكيت ". وبعدين كانوا دايماً أسيادى (فى أوربا والدول المتقدمة) يعايرونا بإننا ضد الحريات وبالذات حرية الراى وحرية العقيدة وأننا همجيين ووحشين وكخة كمان. طب إزاى هما بيطلبوا مننا حرية العقيدة وييجى سكرتير باباب روما "يحذر أوربا من الاسلمة " يعنى هو السكرتير ده ضد حرية العقيدة..................؟؟؟؟؟؟؟؟؟؟؟؟!!!!!!!!!!!!

وبعدين قاعدين خارمين دماغنا بالحريات ومش الحريات والحريات لكل الناس فى المجتمع وحقوق المثليين (المثليين دول هم الشواذ) وزواج المثبليين وبعدين تيجى فرنسا تقولك ل"لاء أنا معنديش حد يتحجب فى المدارس ...أصل الحجاب ده كخة"....؟؟؟؟!!! وقولنا ماشى خلينا خرفان كالعادة ومشيها كدة....بلاها سوسو وناخد نادية(أعتذر لمسرحية سك على بناتك) ؛ مع أن فرنسا دى نفسها مطلعة قانون بيمنع التشكيك فى أعداد الهولوكوست( وقد تمت محاكمة الكاتب روجيه جارودى لذلك) و أتفرج يا عم فرنسا سكتت على مذبحة قانا الاولى والثانية "وإن شاء الله هتسكت على كل مذبحة الليلة وكل لية بنجاح تام" والكلام ده غير أنهم ساكتين على البلاوى التانية كمان وبعدين جت أحداث إهانة الرسول وقالولك دى حرية رأى " مع إن حرية الرأى دى بس بتُستعمل ضد المسلمين فقط لاغير لكن مافيش راجل ماجبتوش ولّادة يقدر يقول أى شىء على الهولوكوست ". وبعدين جم دلوقتى يقولوا أن المرأة المسلمة اللى بتتكسف من الطبيب الذكر مش من حقها تطلب طبيبة توقع الطبى عليها قال يعنى أن طلب المرأة المسلمة ده نوع من العنصرية. يسلااااااام يحلاوةةةةةة .....؛معقولة حلاوتهم دى...؟؟؟!!! هم الاخوة دول عبط ولا شكلهم كدة ؛ أساساً أساساً من حق المريض أن يرفض توقيع الكشف الطبى عليه ومن حقه أن يرفض طبيب ما ويطلب طبيب أخر؛" وأساساً أساساً مش من حق الطبيب الكشف على المريض غيربأذنه ولا من حق الطبيب أن يفرض طبيب ما على المريض والكلام ده من أمهات الكتب فى الطب؛ ومش من عندى والاخوة المتقدمين فى اوربا عارفين ده كويس ......!!!!!!!!!!!!!

يعنى بوضوح أكتر اللى الأطباء فى هولندا بيطلبوه ؛ ده طلب أقرع وحركة نص كم كمان .....بس أقول أيه إذا كان المسلمين فى كل مكان مصرين وراسهم وألف سيف يبقوا خرفان.....!!!!!!!!!!!!!

(وعاشانن محش يفهم غلط ...كاتب هذه السطور مصرى مسلم)

We have a great government in Egypt

حكومة الوطنى هى حكومة اغلبية

و حرية رأى

فعلاً حكومةالوطنى هى حكومة حرية رأى وحكومة أغلبية(أيوة مكتوب كدة.....؛ عينيك مش بتخدعك) .إزاى بقى يا معلم أقولك بقى خد عندك ياسيدى:

1- الحكومةالموقرة جمعت أغلبية الشعب ضدها ووحدتهم على الرغم من إختلافاتهم (شفت إزاى بقى هى حكومة أغلبية). كما أنها وحدت الأغلبية العظمى وجعلته تحت خط الفقر وكمان لو المواطن فنح بقه علشان يتكلم الحكومة مشكورة بتجمعهم فى السجون و المعتقلات(يسلام عليها كدة وهى بتجمع الشعب فى كل حتة)

2- الحكومة الموقرة ساوت بين الطبقات فى المجتمع...!!! وقبل ماتشتم ياهَندزة خد عندك المثل ده ؛ سفاح بنى مزار لم يقبض عليه إلى الآن(الضحايا من الطبقات الفقيرة) وكمان سفاح المعادى ما حدش قبض عليه( الضحايا من الطبقات العليا)... حلو يا معلم ...؛ صدقت بقى

3- حكومة الوطنى حكومة حرية رأى ؛ خد عندك يا باشا؛كل واحد فى البلد دلوقتى بيعمل اللى هو عايزه من غير لا ضابط ولا رابط . وكمان كل واحد حر فى التعبير عن رأيه وانتقاد الحكومة، والحكومة حرة تعمل اللى على مزاجها (واللى مش عاجبه اللى بتعمله الحكومة بي ...... من........)

الكارثة مستمرة.. والوزراء يستمتعون بالشواطيء
معارك بالشوم والعصي بسبب التسابق علي مياه الشرب النقية

والاجمل من كدة كمان أن الحكومة كتر خيرها بتخلينا نرجع إلى الله(يسلام عليها كدة وهى بتشجعنا على التدين)

صحيفة: قرى مطلة على النيل تؤدي صلاة الاستسقاء

والحكومة كمان بتمرننا على ممارسة الحياة السياسية

٥ آلاف مواطن يتظاهرون ضد «العطش» في الدقهلية

لاء وأيه كمان دى الحكومة بتمرننا على محاربة الاعداء من دلوقتى

حرب المياه علي «ضفاف النيل».. المعارك تتصاعد والمواطنون يرفعون شعار «يا روح ما بعدك روح»

والاجمل من ده وده أن الحكومة أثبتت أن مصر فعلاً فعلاً من عجائب الدنيا السبع أو ممكن نسميها العجيبة الوحيدة كمان. الحكاية ان النائب عبد العليم داوود أخر ماتعب من الكلام مع الحكومة أعلن يوم الاثنين 23 يوليو ان خلاص أن هوممتنع عن الطعام لحد ما أهل دايرته يجيلهم مية (يحلاوة ياولاد..... الحكومة بتربى فينا روح ثورة يوليو ) ؛ النهاردةالاربعاء 25 يوليو قام السيد رئيس مجلس الشعب بالاتصال بالسيد النائب لحل الموضوع(تاهت ولقينها ...؛ شكراً للسيد العضو لأنه عرفنا طريقة نعرف نخلى الحكومة تسمعنا بدل ماهى بتنفض لنا)

بص واسمع ياسيدى كلام النائب على قناة دريم 2

النائب فى مجلس الشعب أمتنع عن الطعام أخر ما الراجل غُلُب مع الحكومة

هذا وقد أصيب كاتب هذه السطور بلوثة عقلية وجنون مؤقت من كُتر الهم اللى بيشوفه فى مصر وقعد يغنى:"سلام مربع للجدعان (الجدعان دول الحكومة..ياشباب) كلٌ بأسمه فلان وفلان " وعقب هذه الاغنية قام الله يحرقه فى نار جهنم(المقصود هو كاتب هذه السطور ...؛مش حد تانى ياوِحشين) بحكاية حكاية غريبة:

إنه فى بلد قُمعية مية مية قامت القوات المفترية بالقبض على واحد النواحى دىّ بتهمة "اللعب فى مناخيره لقلب نظام الحكم" . وقد تم القبض عليه متلبساً باللعب فى مناخيره و تمت مصادرتها بالإفرازات الموجودة فيها التى ستستعمل لقلب نظام الحكم وقد تمت محاكمته على الفعلة دىّ وتم الحكم عليه من قِبل كبير الفواعلية و قعدوه فى السجن بدل السنة....مية،

Does this have an end...???

هل آن لتمثال الملح أن يسقط

(تحديث)

ايه اللى بيجرى فيكى يا مصر...؟؟؟؟ البلد مالها بقيت قاعدة كده من غير ضابط ولا رابط وعندك كل يوم مصيبة أشى احداث دمياط ، و أشى برىء بنى مزار ( الجريمة التى إلى الآن لم يُقبض على مرتكبها الحقيقى)، سفاح المعادى هو كمان ماحدش عرف يقبض عيه لحد دلوقتى وفى وسط هذ الانفلات الامنى الشديد تلاقى حاجة بتاعة 5000 عسكرى من مركزى رايحين يعملوا قرار إزالة ...!!!! تخيل ..!!!!!!! اه والله قرار إزالة فى قلعة الكبش

يقولولك لازم نشجع الاستثمار الحر والصناعة الوطنية وتبص لتلاقى اللى عاملينه فى عبد اللطيف الشريف

طب بص كده على تشحيع الاستثمار( أول جزء ، تانى جزء )

يقولولك انور عصمت السادات ده لازم نسقط عضويته فى مجلس الشعب وتلاقى امم عليها احكام والانقح أن طلعت السادات اتحاكم بتهمة إزدراء المؤسسة العسكرية ؛و واحد عضو فى مجلس الشعب يُقر أنه عنده دليل مادى على جريمة إزدراء أديان ولا حد يدور يشوف الكلام ده صح ولاغلط (طب لو غلط مين اللى لفق ال سى دى ده ولو صح إزاى النائب المحترم يسكت على هذه الجريمة)

السكوت على افعال اسرائيل:تيجى تعرض لك فيلم عن ذبح أسرانا وتتفاخر بيه و الموضوع عدى عليه كام شهر ولا حياة لمن تنادى طب بالذمة لو حد شكك فى الهولوكوست كانت إسرائيل هتعمل فيه ايه...؟؟؟؟

بص يا سيدى أدى حقيقة ما حدث لأنور عصمت السادات

طب بلاش ياعم الكلام كله بص على حكاية القضاء واحترام احكام القضاء وعدم مشروعية التعليق على احكام القضاء وقضاء مصر الشامخ ( الكلام كله صح بس بالنسبة لى انا راجل الشارع....بس)

مش هم بيحترموا القانون، مشيها بيحترموا القانون؛ طب هم نفذوا أحكام القضاء اللى بينادوا بإحترامه ؟؟؟؟!!! بلاش طب هم عملوا فى الاعتداء علىالقاضى محمود حمزة ؛ حد قدم أستجواب فى مجلس الشعب للسيد وزير الداخلية ؟؟؟!!!طب حق القاضى محمود حمزة رجع له ؟؟؟!!! طب ياعم أدى أخرتها الناس عملت زى أفراد الدولة بالضبط وبقوا بيعتدوا على القضاة فى المحكمة كمان مش فى الشارع يا عم اللى جرى ده وخد بالك من كلام الحكومة خد بالك من ايه ..... كلام الحكومة بص ياسيدى بص ياعمى

حد من الحكومة عمل مشكلة عماد الكبير : الناس دلوقتى بتعمل كدة برضه وتصوره زى ما حصل فى دمياط ....!!!!!!! كانت فين الحكومة والناس بتعمل كده فى دمياط ....؟؟؟؟؟

هى الحكومة بس عندها نص مليون عسكرى امن مركزى طب هما فايدتهم ايه...؟؟؟؟ يتصدوا لكام متظاهر لكن وقت الجد مانعرفش نلاقيهم ....!!!.

الصراحة انا دلوقتى خايف احسن تحصل اى مصيبة وكالعادة تكتشف أن البلد نخرها السوس ونروح فى طوكر(مش عارف فين طوكر ده بس هى بتتقال كدة) يعنى حتى محاربة الفساد أو حتى تمنى محاربته دى كانت زمان ؛ فى زمن الفساد الجميل دلوقتى القصة بقيت ربنا يُستر علشان البلد بتغرق بِجَد ... بِجَد .....بِجَد.

أعتقد ان العيب منى ومن كل مصرى شاف حكومته بتعمل كده وما حاسبهاش

المواد الموجودة من صحيفة صوت الامة وبرنامج العاشرة مساء (دريم 2) وبرنامج 90 دقيقة(قناة المحور)

فى بلد قُمعيه مية مية؛ كان فى واحد من اللى بالى بالك قبضوا عليه بتهمة أنه مابيحترمش ديانته دىّ ؛قالهم إزاى ده أنتوا قبتضوا عليا وانا خارج من مكان العبادة و جزمتى فى ايدىّ هىّ؛ قالوا له آه بس كنت بتشرب مياه "غازية"...... !!!!. يا عينى عليكى يا ..... بلد.

التحديث

طب لما نيجى نشوف المكتوب قبل التحديث (وأهو أتكتب من قبل شهرين من التحديث) نلاقى أن الحاجة الوحيدة اللى أتُخذ فيها خطوات (عفواً خطوة واحدة فقط لاغير) هى حكاية الناس اللى عملوا مشكلة فى المحكمة(أقارب عماد الحلدة) والباقى زى ماهو محلك سر ولسه ماحدش جاب حق القاضى محمود حمزة ...!!! لاء وايه جَدِت المشاكل دى

مشاكل البنية لاالاساسية وارتفاع الاسعار

..فعلاً أكلة هنية تمرض مِية و يسلام تم تم يسلام تم تم يسلام ....عالمَيبية (مع الإعتذار للفنان عبد الوهاب)

٥ آلاف مواطن يتظاهرون ضد «العطش» في الدقهلية

البرلمان المصر ى يحذر من إرتفاع شديد فى الاسعار

بس بالمناسبة يعنى مش المية دى من البنية الاساسية وهى نفسها البنية الاساسية دىاللى خرموا دماغنا بيها وكل شوية يقولك البلد ماكانش فيها بنية اساسية ودلوقتى بقى فيها بنية اساسية قوية و...و......و......و كلام كبير من العينة دى طب امال فين أمارة الكلام ...؟؟؟ هو صحيح البلد كانت البنية الاساسية فيها رديئة وتم عمل مشروعات لتحسينها ؛ بس من الواضح أن المشروعات دى للنخبة(الناس اللى معاها واسطة) من الشعب المصرى أما أغليبية الناس فأنهم كالعادة" يمتنعون"

طب وبعدين...؟؟؟؟؟ البلد دى هتروح بعد كدة على فين....؟؟؟؟؛ هنفضل زى ما أحنا كدة بنقع فى بير مالوش قرار ونقعد نولول على زمن الفساد الجميل ولا هنبتدى نعمل حاجة إيجابية (و قانونية) علشان نلحق بلدنا قبل ما الدنيا تطربق على دماغنا و المركب تغرق والحرامية الكبار يسيبوا المركب ويهربوا على برة "كالعادة" (يلاااااا أشمعنى العبارة غرقت والناس سابوهم بيموتوا حاجة بتاعة12- 16 ساعة؟، ولا حد قالوهم أنتوا فين)

وبرضه هأرجع وأقول العيب منى ومن كل مصرى شاف حكومته بتعمل كده وما حاسبهاش

Moslims and Bosnia

البوسنة المسلمين والناس اللى لازم تحط راسها فى الطين

تحل هذه الايام الذكرى السنوية لمذبحة سربرنيتشا. والصراحة فى سؤال حارقنى قوى ؛ هو الناس اللى خارمة دماغنا وليل نهار؛ عاملين أنهم مسلمين وبقية العالم كفرة ، الناس دول عملوا ايه لأخواتنا فى البوسنة. طب الدول اللى عاملة أنها دول إسلامية ؛ليه وقفت تتفرج على أهل البوسنة وهم بيشوفوا الامَرّين....؟؟؟؟؟؟. مش الرسول(صلعم) جه فى خطبة الوداع على جبل عرفة وقال ما معناه:" ولدم إمرىء مسلم أعظم عند الله من حرمة يومكم هذا فى بلدكم هذا". طب شوفوا كام مسلم كده راح فى البوسنة والعراق وافغانستان والشيشان و...و...و.....و..... .

طب الدول اللى عالمة نفسها الاخت الكبرى (اللى كان مجدها فى الافاق ايام زمان ودلوقتى بقيت جنب الحيط) الدول دى عملت ايه ، طب بلاش....؛ الدول دى عملت ايه بعد أحداث أبو غريب (هى يدوبك بعدت عن الاسد الصيف اللى فات).....؟؟؟؟هم بس فالحين قاعدين يتخانقوا على مادة فى الدَستور؛لكن لما يجى وقت الجد محدش بيحط أيده فى بق الاسد ، يا دولة ياكبيرة ياللى أهلك خير اجناد الارض.كدة تسكتو اعلى المذابح دى ...كدة...؛ وقال عاملين مسلمين قال........(ملحوظة هامة :كاتب هذا الكلام مسلم)؛ طب أنتوا بتقفوا قدام ربنا فى الصلاة بأى وش ؛يعنى بتقولوا له أيه ....؟؟؟؟طب إزاى بتدعوه وأنتم مستمرين فى تضييع حقوق العباد ....؟؟؟؛طب أيه هى الحجة اللى هتتحججوا بيها قدامه يوم القيامة.....؟؟؟ أوعوا تكونا معتمدين على أن ربنا غفور رحيم.....؟؟؟!!!!! آه يا عفاريت انتوا مش عارفين أن القصة لو فيها حقوق عباد يبقى لازم هذه الحقوق تُرد قبل ما تطلبوا المغفرة (ربنا غفور رحيم ولكنه عدل ولا يترك حقوق خلقه تضيع).

طب بلاش الكلام ده كله .....؛أسيادنا وتاج راسنا اوربا والدول المتقدمة ليه سابوا 8000 بنى آدم يموتوا فى واحدة من المذابح ....آيوة ياعم واحدة من المذابح؛ (أكبّرلك الفونت كمان علشان تاخد بالك وتصدق ) آيوة يا خويا واحدة من المذابح.(الصراحة على رأى فلاحة لما قالت دم الواحدفيهم أمر لا يغتفر ودم المسلم منا أمر فيه نظر). طب هى دىبرضه مش حقوق إنسان ولّا المسلمين مش بنى آدمين ولّا أيه....؟؟؟؟؟

يللا أهو أسمك مسلم وأسمك بتصلى ولما يجى الخطر عندك يحلها الحلّال ؛ بس أقسم لك لما يجى الخطر عندك هتفتكر وتقول" أُكلت يوم أكل الثور الابيض....أكلت يوم يوم أُكل الثور الابيض" .وهتبكى ساعتهأنت او اللى من بعدك ....(واخد بالك انت أللى من بعدك..!!!) هتبكى بدل الدموع دم وذلك حيث لاينفع الندم. واهو أول القصيدة بان وأنت عارف وأديك أضطريت تتراجع ياروميل؛ودى أول مرة فى حياتك ياروميل؛ ...ومش هتكون الاخيرة ياروميل وياريتك كنت حطيت ايدك فى بق الاسد ياروميل يمكن ساعتها كانت الناس تعمل الف حساب ياروميل وما كانش حد قِدِر يدوس لك على طرف ياروميل.... أدينا بقت روسنا فى الطين ياروميل....!!!!!!!!!!!!!!

ويجعله عامر ...!!! (مع الاعتذار لأحمد رجب)